1 O le tolu o tausaga o Hosea le atali‘i o Ele le tupu o Isaraelu na fai ai ma tupu Esekia le atali‘i o Aasa le tupu o Iuta.
2 O le luafulu ma le lima o ona tausaga na fai ai o ia ma tupu; o tausaga e luafulu ma le iva na tupu ai o ia i Ierusalema. O le igoa, fo‘i o lona tinā o Avi o le afafine o Sakaria.
3 ‘Ua ia faia le amiotonu i luma o le ALI‘I, fa‘apei o mea uma na faia e Tavita lona tamā.
4 ‘Ua ia ‘ave‘eseina mea maualuluga, ‘ua ia tu‘ipalaina fo‘i tupua, ‘ua na vavae i lalo fo‘i tupua o Asaira, ‘ua na tu‘inini‘ia fo‘i le gata ‘apamemea na faia e Mose; auā e o‘o lava i ona po ia na fa‘amū i ai mea manogi e le fānauga a Isaraelu, na na ta‘ua ai fo‘i, o le fasi ‘apamemea.
5 ‘Ua ia fa‘atuatua i le ALI‘I le Atua o Isaraelu; ‘ua leai fo‘i se la te tutusa ma ia i tupu uma o Iuta na mulimuli ‘iā te ia, ‘atoa fo‘i ma ē na muamua ‘iā te ia.
6 ‘Ua ia pipi‘i lava i le ALI‘I, ‘ua lē tu‘ua lava lona mulimuli atu ‘iā te ia, a ‘ua tausi lava ana poloa‘iga na poloa‘i mai ai le ALI‘I ‘iā Mose.
7 Sa ‘iā te ia le ALI‘I, na manuia ai fo‘i o ia i mea uma na ia alu i ai, ‘ua fōua fo‘i e ia le tupu o Asuria, ma ‘ua lē ‘au‘auna ‘iā te ia.
8 ‘Ua ia fasia Filisitia e o‘o lava i Kasa ma ona nu‘u; o le pae o tagata leoleo ‘atoa ma le ‘a‘ai nofo ‘olo.
9 O le fa o tausaga o le tupu o Esekia, o le fitu fo‘i lea o tausaga o Hosea le atali‘i o Ele le tupu o Isaraelu, na alu a‘e ai o Salemanesa le tupu o Asuria i Samaria, ‘ua ia vagaia.
10 ‘Ua mavae fo‘i tausaga e tolu ‘ona ā‘ea ai lea; o le tausaga e ono o Esekia, o le tausaga e iva fo‘i lea o Hosea le tupu o Isaraelu, na ā‘ea ai Samaria.
11 ‘Ona fa‘atāfeaina lea o Isaraelu i Asuria e le tupu o Asuria, ‘ua na tu‘u atu ‘iā te i latou i Hala ma Havoli e lata ane i le vaitafe o Kosane, ‘atoa ma ‘a‘ai o Metai.
12 Auā na latou lē fa‘alogo i le si‘ufofoga o le ALI‘I lo latou Atua, a ‘ua soli lana feagaiga, ‘atoa ma mea uma na poloa‘i mai ai Mose le ‘au‘auna a le ALI‘I, ‘ua latou lē fa‘alogo i ai ma ‘ua lē faia.
13 O le sefulu ma le fa o tausaga o le tupu o Esekia na si‘i ai le tau‘a e Sanerivi le tupu o Asuria i ‘a‘ai nofo ‘olo uma o Iuta ma na ā‘ea ai.
14 ‘Ona tu‘u atu ai lea e Esekia le tupu o Iuta o le sāvali i le tupu o Asuria i Lakisa, ‘ua fa‘apea atu, “‘Ua ‘ou sesē; ‘ia e toe afio ‘ese ‘iā te a‘u; a o le mea ‘e te totogi mai ai ‘iā te a‘u, ‘ou te faia, lea.” ‘Ona totogi mai ai lea e le tupu o Asuria ‘iā Esekia le tupu o Iuta o taleni ario e tolu selau ma taleni auro e tolugafulu.
15 ‘Ona avatu ai lea e Esekia o ario uma na i ai i le fale o le ALI‘I ma mea e teu ai ‘oloa i le fale o le tupu.
16 O ona po ia na fofo‘e ‘ese ai e Esekia o auro sa i puipui o le malumalu o le ALI‘I, ‘atoa ma pou na ufiufi i le auro e Esekia le tupu o Iuta, ‘ua na avatu ai i le tupu o Asuria.
17 ‘Ua ‘a‘auina mai fo‘i e le tupu o Asuria o Taretana ma Ravesarisa ma Ravesaki ma ‘au e tele mai Lakisa i le tupu o Esekia i Ierusalema. ‘Ona latou ō a‘e ai lea, ‘ua o‘o i Ierusalema. ‘Ua ō a‘e i latou, ‘ona ō mai ai lea, ‘ua tutū latalata ane i le alāvai o le vailepa, aupitoaluga, o i le ala tele o le fanua o le ta ‘ofu.
18 ‘Ua latou vala‘au mai i le tupu, ‘ona ō atu ai lea ‘iā te i latou o Eliakimo le atali‘i o Hilikia o lē na pule i le ‘āiga ma Sevena, le tusi‘upu ma Ioaa le atali‘i o Asafo le fātua‘iupu.
19 ‘Ona fai mai ai lea o Ravesaki ‘iā te i latou, “‘Ia ‘outou fai atu ‘iā Esekia, O lo‘o fa‘apea ‘ona fetalai mai o le tupu silisili, o le tupu o Asuria, Pe se a lea fa‘atuatuaga ‘ua e fa‘atuatua i ai?
20 ‘Ua e fa‘apea ane (a o ‘upu fa‘atauva‘a lava) ‘ua ‘iā te oe le poto ma le malosi e fai a‘i tau‘a. O lenei, pe ‘e te fa‘atuatua ‘iā te ai, ‘ua e fōua ai a‘u?
21 Fa‘auta nei, ‘ua e to‘ona‘i i lea to‘oto‘o u ‘ua gapēpē o Aikupito, pe a toto‘o i ai se tagata e tuia ai lona lima o ati; e fa‘apea lava Farao le tupu o Aikupito ‘iā te i latou uma o ē fa‘atuatua ‘iā te ia.
22 ‘Ae ‘āfai tou te fa‘apea mai ‘iā te a‘u, ‘Matou te fa‘atuatua i le ALI‘I lo matou Atua;’ e lē o ia ‘ea ‘ua ‘ave‘eseina ai e Esekia o ana mea maualuluga ma ona fatafaitaulaga ma ‘ua fai atu ‘iā Iuta ma Ierusalema, ‘‘Ia ‘outou tapua‘i i luma o lenei fatafaitaulaga o i Ierusalema?’
23 O lenei, ‘inā ‘aumai ia ni mea e tu‘u fa‘afa‘atau i lo‘u ali‘i le tupu o Asuria, ‘ona ‘ou avatu ai lea ‘iā te oe o solofanua e lua afe, pe ‘āfai ‘e te mafaia e oe ‘ona ia tofu ma se ti‘eti‘e ai.
24 ‘Ae mafai fa‘apefea ‘ona e tulia se tasi ta‘ita‘i o ‘au‘auna e aupito ‘ona fa‘atauva‘a a lo‘u ali‘i, a e fa‘atuatua i Aikupito e maua ai kariota ma ‘au e ti‘eti‘e i solofanua?
25 Fā‘i ‘ea ‘ua ‘ou sau nei e aunoa ma le ALI‘I i lenei mea e fa‘aumatia ai? Na fetalai mai le ALI‘I ‘iā te a‘u, ‘ou te alu a‘e i lenei nu‘u ‘ia fa‘aumatia.”
26 ‘Ona fa‘apea atu ai lea o Eliakimo le atali‘i o Hilikia ma Sevena ma Ioaa, ‘iā Ravesaki, “‘Ia e fetalai mai i au ‘au‘auna i le gagana a Arama, auā matou te lagona ai; ‘ae ‘aua ‘e te fetalai mai ‘iā te i matou i le gagana a Iuta ma lē fa‘alogo mai o tagata o i luga o le pā.”
27 ‘Ona tali mai ai lea o Ravesaki ‘iā te i latou, “‘Ua ‘auina mai ‘ea a‘u e lo‘u ali‘i i lou ali‘i ‘atoa ma oe e tautala atu ai i ia ‘upu, ‘ae le‘i ‘auina ‘ea i tagata o ē nonofo i luga o le pā, ‘ina ‘ia latou topalega, ma feinu i o latou lava miaga fa‘atasi ma ‘outou?”
28 ‘Ona tu mai ai lea o Ravesaki, ‘ua ‘alaga ‘ua leo tele i le gagana a Iuta, ‘ua fa‘apea mai lana ‘upu, “Fa‘alogologo mai ia i le afioga a le tupu silisili, o le tupu o Asuria;
29 o lo‘o fa‘apea ‘ona fetalai mai o le tupu: ‘‘Aua ne‘i ‘olegia ‘outou e Esekia, auā na te lē mafaia ‘ona lavea‘i ‘iā te ‘outou a‘i lona lima.
30 ‘Aua ne‘i fa‘atupuina fo‘i e Esekia so ‘outou fa‘atuatua i le ALI‘I, o lo‘o fa‘apea ane o ia, E lavea‘i mai lava le ALI‘I ‘iā te i tatou, e lē tu‘uina atu fo‘i lenei ‘a‘ai i le lima o le tupu o Asuria.’
31 ‘Aua ne‘i ‘outou fa‘alogo ‘iā Esekia; auā o lo‘o fa‘apea ‘ona fetalai mai o le tupu o Asuria, ‘‘Inā ‘aumai ‘iā te a‘u se mea alofa ma ia ō mai ‘iā te a‘u, ‘ona ‘outou ‘a‘ai ai lea ta‘itasi i lona lava vine, e ta‘itasi fo‘i i lona lava mati ma ‘outou feinu fo‘i ta‘itasi i le vai o lona lava vai‘eli,
32 se‘ia ‘ou alu atu e ‘ave ‘iā te ‘outou i le nu‘u fa‘apei o le ‘outou lava nu‘u, o le nu‘u o i ai saito ma uaina, o le nu‘u o i ai areto ma tōvine, o le nu‘u o i ai le suāu‘u olive ma le meli; ‘ina ‘ia ola ‘outou, ‘ae lē oti; ‘aua fo‘i tou te fa‘alogo ‘iā Esekia i lona fa‘a‘ole‘ole ‘iā te ‘outou, o lo‘o fa‘apea ane, E lavea‘i mai le ALI‘I ‘iā te i tatou.
33 Pe ai se atua o i se nu‘u ‘ua na lavea‘i i lona nu‘u a‘i le lima o le tupu o Asuria?
34 Po o ifea atua o Amato ma Arepa? Po o ifea atua o Sefavaima, o Ena ma Iva? Po ‘ua latou lavea‘i ‘ea i Samaria ai lo‘u lima?
35 Po o ai ni atua uma o nu‘u na lavea‘i i o latou nu‘u a‘i lo‘u lima, ‘ina ‘ia lavea‘i o le ALI‘I i Ierusalema a‘i lo‘u lima?’”
36 A ‘ua fa‘alologo le nu‘u, ‘ua latou le tali atu se ‘upu ‘iā te ia, auā sa fa‘apea mai le poloa‘iga a le tupu, “‘Aua ne‘i tali atu ‘iā te ia.”
37 ‘Ona ō mai ai lea o Eliakimo le atali‘i o Hilikia lē pule i le ‘āiga ma Sevena le tusi‘upu ma Ioaa le atali‘i o Asafo le fātua‘iupu, ‘iā Esekia ma o latou ‘ofu ‘ua saei, ‘ua latou tala mai ‘iā te ia o ‘upu a Ravesaki.#