1 Sa i Samaria fo‘i o atali‘i o Aapo e to‘afitugafulu. ‘Ua tusi fo‘i e Ieu o tusi ma avatu ai i Samaria, i ali‘i o Isereelu o toeaina, ‘atoa fo‘i ma i latou na tausi i fānau a Aapo, ‘ua fa‘apea atu,
2 “A o‘o atu lenei tusi ‘iā te ‘outou, o ‘iā te ‘outou atali‘i o lo ‘outou ali‘i, e ‘iā te ‘outou fo‘i kariota ma solofanua, o le ‘a‘ai fo‘i e nofo ‘olo, ‘atoa ma ‘au‘upega;
3 ‘ia ‘outou filifili se atali‘i o lo ‘outou ali‘i, o sē ‘ua sili ma le tatau, ‘ia ‘outou fa‘anofo fo‘i ‘iā te ia i le nofoāli‘i o lona tamā ma ‘ia ‘outou sauni tau mai ‘ona o le ‘āiga o lo ‘outou ali‘i.”
4 A ‘ua matuā matata‘u lava i latou, ‘ua fa‘apea ane, “Fa‘auta, e le‘i tutū tupu e to‘alua i ona luma, pe fa‘apefea ‘ona tatou tutū ai?”
5 ‘Ona ‘ave ai lea ‘iā Ieu o le fe‘au a lē na pule i le ‘āiga ma lē na pule i le ‘a‘ai ma toeaina, ‘atoa ma ē tausia tama, ‘ua fa‘apea mai, “O au ‘au‘auna i matou, matou te faia mea uma ‘e te fetalai mai ai; matou te le faia se tupu; ‘inā faia ia oe o le mea ‘e te finagalo i ai.”
6 ‘Ona toe tusi fa‘alua atu ai lea o ia ‘iā te i latou, ‘ua fa‘apea atu, “‘Āfai ‘ua ‘iā te a‘u ‘outou, ma ‘outou usiusita‘i i a‘u ‘upu, ‘ia ‘outou ‘aumai i ulu o ia tagata o atali‘i o lo ‘outou ali‘i, i le tou ō mai ai ‘iā te a‘u i Isereelu a taeao i le itūlā fa‘apenei.”Na i ai fo‘i atali‘i o le tupu e to‘afitugafulu tagata i ali‘i o le ‘a‘ai, na latou tausi ‘iā te i latou.
7 ‘Ua o‘o atu le tusi ‘iā te i latou, ‘ona latou ‘ave ai lea o atali‘i o le tupu, ma latou fasioti i tagata e to‘afitugafulu, ‘ua fafao fo‘i o latou ulu i ‘ato, ma avatu ai ‘iā te ia i Isereelu.
8 ‘Ona sau ai lea o le sāvali, ‘ua ta‘u mai ‘iā te ia, ‘ua fa‘apea mai, “‘Ua latou ‘aumai ulu o atali‘i o le tupu.” ‘Ona fai atu ai lea o ia, “‘Ia ‘outou tu‘uina i faupuega e lua i le puipui o le faitoto‘a se‘ia taeao.”
9 ‘Ua o‘o i le taeao, ‘ona alu atu ai lea o ia, ‘ua tu atu, ma fai atu i le nu‘u uma, “‘Ua amiotonu ‘outou, fa‘auta mai, na ‘ou fōua e a‘u lo‘u ali‘i ma fasioti ‘iā te ia; a o ai ‘ea na fasioti ‘iā te i latou nei uma?
10 O lenei, ‘ia ‘outou iloa e lē i‘uvale se mea e tasi o afioga a le ALI‘I, sa fetalai mai ai le ALI‘I i le ‘āiga o Aapo; a ‘ua faia e le ALI‘I le mea sa na fetalai mai ai i lana ‘au‘auna o Elia.”
11 Na fasia e Ieu o i latou uma na totoe o le ‘āiga o Aapo i Isereelu, ‘atoa ma ali‘i uma sa ‘iā te ia ma ana aumea ma ana ositaulaga, ‘ua o‘o ‘ina le fa‘atotoe e ia se to‘atasi ‘iā te ia.
12 ‘Ona tula‘i ai lea o ia, ‘ua alu atu, o le a alu i Samaria, ‘ua i le fale e fusi ai mamoe e leoleo mamoe, sa i le ala lea.
13 ‘Ona maua ai lea e Ieu uso o Aasaia le tupu o Iuta; ‘ua na fai atu fo‘i, “O ai ‘ea ‘outou na?”‘Ona fai mai ai lea o i latou, “O uso o Aasaia i matou, O lo‘o ō ifo fo‘i i matou e fealofani ma alo o le tupu, ‘atoa ma alo o le masiofo.”
14 ‘Ona fai atu ai lea o Ieu, “‘Inā pu‘e ola ia ‘iā te i latou.” ‘Ona latou pu‘e ola lea ‘iā te i latou, ma fasioti ‘iā te i latou, i le lua o le fale e fusi ai mamoe, o tagata e to‘afagafulu ma le to‘alua; e le‘i fa‘atoe lava e ia so latou.
15 ‘Ua alu ‘ese ia i lea mea, ‘ona iloa ai lea e ia o Ionatapa le atali‘i o Rakapa, ‘ua fa‘afetaia‘i mai ‘iā te ia. ‘Ona alofa atu ai lea ‘iā te ia, ‘ua fai atu i ai, “Po ‘ua tonu mai ‘ea lou loto, fa‘apei o lo‘u loto i lou loto?”‘Ona fai mai ai lea o Ionatapa, “O lea lava.” ‘Āfai ‘ua fa‘apea, “‘Aumai ia lou lima.”‘Ona ‘aumai ai lea e ia o lona lima; ‘ona ia ‘ava‘e ai lea o ia ‘ia la fa‘atasi i le kariota.
16 ‘Ona fai atu ai lea o ia, “‘Ia tā ō ma a‘u, ‘e te iloa ai lo‘u mā‘elegā i le ALI‘I.” ‘Ua latou fai atu ‘iā te ia e ti‘eti‘e i lona kariota.
17 ‘Ua o‘o ia i Samaria, ‘ona fasi uma ai lea e ia i ē na totoe o sa Aapō i Samaria, ‘ua o‘o ‘ina fa‘aumatia o ia, fa‘apei o le afioga a le ALI‘I, na ia fetalai mai ‘iā Elia.
18 ‘Ona fa‘apotopoto ai lea e Ieu o le nu‘u uma, ‘ua fai atu ‘iā te i latou, “Sa ‘au‘auna fa‘aitiiti Aapo ‘ia Paala, ‘ae tele ‘ona ‘au‘auna o Ieu ‘iā te ia.
19 O lenei, ‘inā fa‘apotopoto mai ia ‘iā te a‘u o perofeta uma a Paala, o ana ‘au‘auna uma, ‘atoa ma ana ositaulaga uma; ‘aua ne‘i nofo se tasi; auā o le a fai la‘u taulaga tele ‘iā Paala; ai sē nofo e lē ola ia.” A ‘ua faia lea mea e Ieu ma le fa‘a‘ole‘ole, ‘ina ‘ia fa‘aumatia e ia o ē ‘au‘auna ‘iā Paala.
20 ‘Ua fai atu Ieu, “Tala‘i ia o se nunu ‘iā Paala.” ‘Ona latou tala‘i ai lea.
21 ‘Ua ‘ave fo‘i le fe‘au a Ieu ‘iā Isaraelu uma; ‘ona ō mai ai lea ‘au‘auna uma lava a Paala, e le‘i toe se tasi tagata e lē o sau. ‘Ua latou ulufale fo‘i i le fale o Paala, ‘ua tumu saisai ai le fale o Paala.
22 ‘Ona fai atu ai lea o Ieu i lē na leoleo i le fale e tu‘u ai ‘ofu, “‘Aumai ia o ‘ofu mo i latou uma o ē ‘au‘auna ‘iā Paala.” ‘Ona ‘aumai ai lea e ia o ‘ofu mo i latou.
23 ‘Ona alu ai lea o Ieu, o i lā‘ua ma Ionatapa le atali‘i o Rakapa, i le fale o Paala ma na fai atu i ē ‘au‘auna ‘iā Paala, “Su‘esu‘e ia ma ia iloa ‘ina ne‘i ‘i‘inei ‘iā te ‘outou sē ‘au‘auna i le ALI‘I, ‘ia na o ē ‘au‘auna ‘iā Paala lava.”
24 ‘Ua latou ulufale atu e fai ai taulaga ma taulaga mū; ‘ona tofia lea i fafo e Ieu o tagata e to‘avalugafulu, ‘ua fai atu fo‘i, “A sao se tasi o ia tagata ‘ua ‘ou ‘aumai i o ‘outou lima, e suia o ia i so ‘outou.”
25 ‘Ua uma ‘ona faia le taulaga mū, ‘ona fai atu ai lea o Ieu i le ‘au e fa‘afeao ma ē ta‘i ‘au, “Ulufale atu ia, ‘inā fasioti ‘iā te i latou, ne‘i sao i fafo se tasi.” ‘Ona latou fasioti ai lea ‘iā te i latou i le pelu, ‘ua lafoa‘i fo‘i i latou i fafo e le ‘au e fa‘afeao ma ē ta‘i ‘au. ‘Ona latou ō ai lea i le ‘a‘ai o le fale o Paala.
26 ‘Ona latou ‘aumai ai lea i fafo o tupua a‘i le fale o Paala ma latou susunu ai.
27 ‘Ua latou lepeti i le tupua o Paala, ‘ua latou lepeti fo‘i i le fale o Paala, ‘ua fai ai ma maliuga, ‘ua o‘o lava i le aso nei.
28 O lenei, ‘ua fa‘aumatia Paala e Ieu, i Isaraelu.
29 ‘Ae peita‘i ‘ua lē liliu ‘ese lava Ieu i agasala a Ierepoamo le atali‘i o Nepata, o lē na fa‘atupu le agasala ‘iā Isaraelu; o tama‘i povi auro fo‘i ia na i ai i Peteli ‘atoa fo‘i ma Tanu.
30 ‘Ona fetalai mai lea o le ALI‘I ‘iā Ieu, “‘Ua lelei lau mea na fai ‘ina ‘ua e faia le mea tonu i o‘u luma, ma ‘ua e faia i le ‘āiga o Aapo e tusa ma mea uma na ‘ou loto i ai, o le mea lea e nonofo ai ou atali‘i i le nofoāli‘i o Isaraelu e o‘o i le fa o tupulaga.”
31 ‘Ae le‘i ‘ana‘ana Ieu e savali i le tulafono a le ALI‘I le Atua o Isaraelu ma lona loto ‘atoa; ‘ina ‘ua lē liliu ‘ese i agasala a Ierepoamo, o lē na fa‘atupu le agasala ‘iā Isaraelu.
32 O ia ona po na amata ai e le ALI‘I ‘ona fa‘aitiitiina o Isaraelu; na fasia fo‘i e Asaeli o i latou i itū uma o Isaraelu,
33 e amata i Ioritana i le alu a‘e ai le la, o le nu‘u uma o Kiliata, o sa Katō ma sa Reupenā, ‘atoa ma sa Manasē, e amata i Aroeru e latalata i le alia o Arinona, o Kiliata ‘atoa ma Vasana.
34 O toe o mea na faia e Ieu ma mea uma na ia faia, ‘atoa ma lona fitafita uma, e le‘i tusia ‘ea i le tusi o tala i nofoa‘iga a tupu o Isaraelu?
35 ‘Ua ta‘oto fo‘i Ieu fa‘atasi ma ona tamā; ‘ua latou tanu ‘iā te ia i Samaria; ‘ona soloa‘i ane ai lea o Ioasasa lona atali‘i e fai ma tupu.
36 O aso fo‘i na fai ai Ieu ma tupu ‘iā Isaraelu i Samaria, e luafulu ma le valu o tausaga ia.