1 ‘Ona ‘a‘au atu lea o nisi e le tupu, ‘ona latou fa‘apotopoto ai lea ‘iā te ia o toeaina uma o Iuta ‘atoa ma Ierusalema.
2 ‘Ona alu a‘e ai lea o le tupu i le fale o le ALI‘I, o ia ‘atoa ma tagata uma o Iuta ma i latou uma ē na nonofo i Ierusalema, o le ‘au ositaulaga fo‘i, ‘atoa ma le ‘au perofeta ma le nu‘u uma lava, o tamaiti ‘atoa ma ē matutua; ‘ona faitau atu lea e ia, o latou o fa‘alogologo ai, i ‘upu uma lava o le tusi o le feagaiga na maua i le fale o le ALI‘I.
3 ‘Ua tu fo‘i le tupu i le tulaga ma osi ai le feagaiga i luma o le ALI‘I, e mulimuli atu i le ALI‘I, ma ‘ana‘ana i ana poloa‘iga ma ana tulafono, ‘atoa ma ana sauniga, i le loto ‘atoa ma le agaga ‘atoa, e fa‘amauina fo‘i ‘upu o lenei feagaiga ‘ua tusia i lenei tusi. ‘Ua auga fo‘i i le nu‘u uma le feagaiga.
4 ‘Ona fai atu ai lea o le tupu ‘iā Hilikia le ositaulaga sili ma ositaulaga e aupito ane ‘iā te ia, ‘atoa ma leoleo o le faitoto‘a, e ‘aumai i fafo i le malumalu o le ALI‘I o ipu uma na faia mo Paala ma Asaira ma ‘au uma a le lagi; ‘ua ia susunu ai fo‘i i tua o Ierusalema i le fanua o Ketarono, ‘ona ‘ave ai lea o latou lefulefu i Peteli.
5 ‘Ua ia ‘ave‘eseina fo‘i le ‘au ositaulaga ē na fa‘atūina e tupu o Iuta e fa‘amū mea manogi i mea maualuluga i ‘a‘ai o Iuta, ‘atoa ma mea e vagavagai i Ierusalema; o i latou fo‘i ē na fa‘amū mea manogi ‘iā Paala, ma le lā ma le masina ma fa‘ailoga o le lagi, ‘atoa ma ‘au uma a le lagi.
6 ‘Ua ia ‘aumai fo‘i le tupua o Asaira nai le fale o le ALI‘I, ‘ua ‘ave i tua o Ierusalema i le alia o Ketarono, ‘ua susunu ai i le alia o Ketarono ma na tu‘ilili‘ia pei o le efuefu, ‘ona lafo ai lea o lona efuefu i luga o tu‘ugamau o tagata o le nu‘u.
7 ‘Ua ia lepeti fo‘i i fale o ē fa‘asotoma sa i tafatafa o le fale o le ALI‘I, na lalaga ai e fafine o fale mo Asaira i lea mea.
8 ‘Ua ia ‘aumai fo‘i ositaulaga uma na i ‘a‘ai o Iuta, ma na fa‘aleaga i mea maualuluga ‘ua fa‘amū ai mea manogi e le ‘au ositaulaga, pau mai i Kipea pau mai i Peresepa ma na lepeti fo‘i i mea maualuluga o faitoto‘a sa i le mea e ui atu ai i le faitoto‘a o Iosua le ali‘i e pule i le ‘a‘ai, sa i ai i le itū tauagavale o le tagata i le faitoto‘a o le ‘a‘ai.
9 ‘Ae peita‘i e le‘i ō a‘e ositaulaga o mea maualuluga i le fatafaitaulaga o le ALI‘I i Ierusalema, na ‘ona latou ‘a‘ai i le areto lē fa‘afefeteina fa‘atasi ma o latou uso.
10 ‘Ua ia fa‘aleaga fo‘i i Tofeta o i le vanu o le atali‘i o Hinoma, ‘ina ne‘i fa‘aui ane e se tagata i lona atali‘i po o lona afafine i le afi ‘iā Moloka.
11 ‘Ua ia ‘ave ‘ese fo‘i i solofanua na tu‘uina e tupu o Iuta mo le lā i le faitoto‘a o le fale o le ALI‘I, e lata ane i le afeafe o Natana-meleka le ‘au‘auna sili sa i Parevara ma na susunu nofoa fa‘ata‘avalevale o le lā i le afi.
12 ‘Ua lepeti fo‘i e le tupu o fatafaitaulaga na i luga o le afeafe aupitoaluga o Aasa na faia e tupu o Iuta, ‘atoa ma fatafaitaulaga na faia e Manase i lotoā uma e lua o le fale o le ALI‘I, ‘ona tele vave atu ai lea nai lea mea ma sasa‘a atu o latou, efuefu i le alia o Ketarono.
13 ‘Ua fa‘aleaga fo‘i e le tupu mea maualuluga sa i luma o Ierusalema i le itū taumatau o le mauga o le malaia, na faia e Solomona le tupu o Isaraelu mo Asaira le mea leaga a sa Saitonū mo Kimosa fo‘i le, mea leaga a Moapi mo Melekoma fo‘i le mea leaga a le fānauga a Amoni.
14 ‘Ua ia tu‘inini‘i fo‘i tupua ma na vavae i lalo tupua o Asaira, ‘ona fa‘atūtūmu ai lea o mea sa latou i ai i ivi o tagata.
15 O le fatafaitaulaga fo‘i sa i Peteli, o le mea maualuga na faia e Ierepoamo le atali‘i o Nepata, o lē na fa‘atupu le agasala ‘iā Isaraelu, na ia lepeti i lea lava fatafaitaulaga ‘atoa ma le mea maualuga, ma na susunu le mea maualuga, ‘ua tu‘inini‘i ai pei o le efuefu, ‘ua na susunu fo‘i le tupua o Asaira.
16 ‘Ona fāliu lea o Iosia, ‘ua iloa atu ai tu‘ugamau na i ai i le mauga, ‘ua ‘a‘auina atu ai nisi e ‘aumai ivi a‘i tu‘ugamau, ‘ona susunu ai lea i luga o le fatafaitaulaga, ‘ua fa‘aleaga ai, e tusa ma le afioga a le ALI‘I na ‘alaga mai ai e le tagata o le Atua, o lē na ‘alaga mai ia ‘upu.
17 ‘Ona fai atu ai lea o ia, “O le a lenā fa‘ailoga ‘ou te iloa atu ai?”‘Ona fai mai ai lea o tagata o le ‘a‘ai ‘iā te ia, “O le tu‘ugamau lea o le tagata o le Atua na sau mai Iuta ma ‘alaga mai i na lava mea ‘ua e faia i le fatafaitaulaga i Peteli.”
18 ‘Ona fai atu ai lea o ia, “Tu‘u pea ‘iā te ia, ‘aua ne‘i ‘ave‘esea e se tagata ona ivi.”‘Ona sao ai lea ona ivi ‘atoa ma ivi o le perofeta na sau mai Samaria.
19 O fale uma fo‘i o mea maualuluga sa i ‘a‘ai o Samaria, na faia e tupu o Isaraelu e fa‘a‘ono‘ono i le ALI‘I, ‘ua ‘ave‘eseina e Iosia, ‘ua ia fai fo‘i i ai fa‘apei o mea uma na ia faia i Peteli.
20 ‘Ua ia fasiotia le ‘au ositaulaga o mea maualuluga sa i ai i luga o fatafaitaulaga ma na susunu ai ivi o tagata; ‘ona fo‘i atu ai lea o ia i Ierusalema.
21 ‘Ona poloa‘i ai lea o le tupu i le nu‘u uma lava, ‘ua fa‘apea atu, “‘Ia ‘outou fai le paseka i le ALI‘I lo ‘outou Atua, fa‘apei ‘ona tusia i le tusi o lenei feagaiga.”
22 Auā e le‘i faia lava se paseka fa‘apei o lenei talu i ona po o fa‘amasino ē na fa‘amasino ‘iā Isaraelu, ‘atoa ma ona po uma o tupu o Isaraelu ma tupu o Iuta;
23 na o le paseka lava lenei na faia i le ALI‘I i Ierusalema i le sefulu ma le valu o tausaga o le tupu o Iosia.
24 ‘Ua ‘ave‘eseina fo‘i e Iosia ē sa i ai aitu vavalo, ma taulāitu ma fa‘atagata ma tupua ‘atoa ma mea ‘inosia uma na iloa i le nu‘u o Iuta ma Ierusalema, ‘ina ‘ia fa‘ataunu‘uina e ia o ‘upu o le tulafono na tusia i le tusi na maua e le ositaulaga o Hilika i le fale o le ALI‘I.
25 E le‘i muamua ‘iā te ia se tupu e tusa ma ia, o lē na liliu atu i le ALI‘I ma lona loto ‘atoa ma lona agaga ‘atoa ma lona malosi ‘atoa, e tusa ma le tulafono uma a Mose; talu ai fo‘i e le‘i tu mai sē e tusa ma ia.
26 E ui lava i lea e le‘i liliu‘eseina e le ALI‘I lona to‘asā matuā tele na ia to‘asā ai ‘iā Iuta, ‘ona o mea fa‘a‘ono‘ono uma na fa‘a‘ono‘ono ai Manase ‘iā te ia.
27 A ‘ua fa‘apea mai le ALI‘I, “‘Ou te ‘ave ‘ese ‘iā Iuta fo‘i i o‘u luma, fa‘apei ‘ona ‘ou ‘ave ‘ese ‘iā Isaraelu; ‘ou te tia‘i fo‘i le ‘a‘ai nei o Ierusalema na filifilia e a‘u, ‘atoa fo‘i ma le fale na ‘ou fai atu ai, E i ai lo‘u igoa.”
28 O toe o mea na faia e Iosia ma mea uma na ia faia, e le‘i tusia ‘ea ia mea i le tusi o tala i nofoa‘iga a tupu o Iuta?
29 O lana nofoa‘iga na alu a‘e ai Farao Neko le tupu o Aikupito i le vaitafe o Eufirate e si‘i ai le tau‘a i le tupu o Asuria; ‘ona alu atu ai lea o le tupu o Iosia e tau ma ia; ‘ua la feiloa‘i i Mekito, ‘ona fasioti ai lea e Farao Neko ‘iā Iosia.
30 ‘Ua ‘ave fo‘i o ia ‘ua oti, i le kariota e ana ‘au‘auna a‘i Mekito, ‘ua ‘aumai ‘iā te ia i Ierusalema ma tanu ‘iā te ia i lona tu‘ugamau.‘Ona ‘ave ai lea e tagata o le nu‘u ‘iā Ioasasa le atali‘i o Iosia ma fa‘au‘u ‘iā te ia ‘ia fai o ia ma tupu, e sui a‘i lona tamā.
31 O le luafulu ma le tolu o ona tausaga na fai ai Ioasasa ma tupu, e tolu fo‘i masina na ia tupu ai i Ierusalema. O le igoa o lona tinā o Hamutala, le afafine o Ieremia o le Lipena.
32 ‘Ua ia faia le amio leaga i luma o le ALI‘I, pei o mea uma na faia e ona tamā.
33 ‘Ua noanoa e Farao Neko ‘iā te ia i Ripelu i le nu‘u o Amato, ‘ina ‘ia lē fai o ia ma tupu i Ierusalema; ‘ua ia fa‘asalaina fo‘i le nu‘u o taleni ario e selau ma le taleni auro.
34 ‘Ua tofia e fai ma tupu e Farao Neko o Eliakimo le atali‘i o Iosia, e fai ma sui o lona tamā o Iosia, a ‘ua liliu lona igoa ‘iā Ioakima; ‘ona ia ‘ave ai lea o Ioasasa, ‘ua o‘o fo‘i o ia i Aikupito, ‘ua oti ai.
35 ‘Ona avatu ai lea e Ioakima le ario ma le auro ‘iā Farao, a ‘ua na togitū taulaga a le nu‘u e avatu ai le ario, pei o le poloa‘iga a Farao, ta‘itasi le tagata e tusa ma lana togiga, na ia fa‘atauānau lava o ario ma auro a‘i tagata o le nu‘u e avatu ai ‘iā Farao Neko.
36 O le luafulu ma le lima o ona tausaga na fai ai Ioakima ma tupu; e sefulu ma le tasi tausaga na tupu ai o ia i Ierusalema. O le igoa o lona tinā o Seputu o le afafine o Petaia o le Ruma.
37 ‘Ua ia faia fo‘i le amio leaga i luma o le ALI‘I, fa‘apei o mea uma na faia e ona tamā.