1 ‘Ua finagalo le ALI‘I e ‘ava‘e ‘iā Elia i le lagi i le asiosio, ‘ona la ō lea o Elia ma Elisaia nai Kilikala.
2 ‘Ona fai atu lea o Elia ‘iā Elisaia, “Nofo ia oe ‘i‘inei, auā ‘ua ‘auina a‘u e le ALI‘I i Peteli.”A ‘ua tali mai Elisaia, “O lo‘o soifua le ALI‘I, ‘ua e ola fo‘i oe, ‘ou te lē tu‘ua lava oe.” ‘Ona la ō ifo ai lea i Peteli.
3 ‘Ona ō mai lea ‘iā Elisaia o so‘o o le ‘au perofeta ‘ua i Peteli, ‘ua fai mai ‘iā te ia, “‘Ua e iloa ‘ea, o le aso nei o le a ‘ave ‘ese ai e le ALI‘I lou matai ‘iā te oe?”‘Ona fai atu ai lea o ia, “‘Ua ‘ou iloa lava; sōia le fai mai ai.”
4 ‘Ona fai atu lea o Elia ‘iā te ia, “Elisaia e, nofo ia oe ‘i‘inei, auā ‘ua ‘auina a‘u e le ALI‘I i Ieriko.”A ‘ua fai mai o ia, “O lo‘o soifua le ALI‘I, ‘ua e ola fo‘i oe, ‘ou te lē tu‘ua lava oe.” ‘Ona la o‘o atu ai lea i Ieriko.
5 ‘Ona sōsō mai lea ‘iā Elisaia o so‘o o le ‘au perofeta ‘ua i Ieriko, ‘ua fai mai ‘iā te ia. “‘Ua e iloa ‘ea o le aso nei o le a ‘ave ‘ese ai e le ALI‘I lou matai ‘iā te oe?”‘Ona fai atu ai lea o ia, “‘Ua ‘ou iloa lava; sōia le fai mai ai.”
6 ‘Ona fai atu lea o Elia ‘iā te ia, “Nofo ia oe ‘i‘inei, auā ‘ua ‘auina a‘u e le ALI‘I i Ioritana.”‘Ona fai mai lea o ia, “O lo‘o soifua le ALI‘I, ‘ua e ola fo‘i oe, ‘ou te lē tu‘ua lava oe.” ‘Ona la sāvavali atu ai lea.
7 ‘Ua ō atu fo‘i tagata e to‘alimagafulu o isi so‘o o le ‘au perofeta, ‘ua tutū mamao i le mea e iloa atu ai; ‘ua tutū fo‘i i lā‘ua i le ‘auvai o Ioritana.
8 ‘Ua tago Elia i lona ‘ofu tele, ‘ua ta‘ata‘ai, ‘ua taia a‘i le vai, ‘ona vaeluaina ai lea i le tasi itū ma le tasi itū. ‘Ona la sāvavali atu ai lea i le ‘iliti vai matūtū.
9 ‘Ua uma ‘ona la sopo‘ia atu, ‘ona fai atu lea o Elia ‘iā Elisaia, “Fai mai ia pe se a se mea ‘ou te faia mo oe manū e le‘i ‘ave‘eseina a‘u ‘iā te oe.”‘Ona fai mai ai lea o Elisaia, “‘Ia fa‘alua mai lou agaga ‘iā te a‘u.”
10 ‘Ona fai atu ai lea o ia, “O le mea faigatā ‘ua e fai mai ai; ‘āfai ‘e te iloa mai a‘u pe a ‘ave‘eseina a‘u ‘iā te oe, ‘ona fa‘apea lea ‘iā te oe; ‘ae ‘āfai e leai, ‘ona lē fa‘apea lea.”
11 ‘Ua sāvavali atu pea i lā‘ua, o tautalatala fano; fa‘auta fo‘i, o le nofoa afi fa‘ata‘avalevale ma solofanua afi, ‘ua te‘a ‘ese‘ese ai i lā‘ua, ‘ona alu a‘e ai lea o Elia i le asiosio i le lagi.
12 ‘Ua iloa fo‘i e Elisaia, ‘ona ‘alaga lea o ia, “Lo‘u tamā e, lo‘u tamā e, le kariota o Isaraelu ma ana ‘au e ti‘eti‘e i solofanua.” ‘Ua na lē toe iloa atu o ia;‘Ona tago lea o ia i lona lava ‘ofu, ‘ua saei lua.
13 ‘Ua ia ‘ava‘e fo‘i le ‘ofu tele o Elia na pa‘ū ifo ‘iā te ia, ‘ona fo‘i atu ai lea, ‘ua tu i le ‘auvai o Ioritana.
14 ‘Ona tago lea o ia i le ‘ofu tele o Elia na pa‘ū ifo ‘iā te ia, ‘ua na taia a‘i le vai ma fai ane, “O ifea ‘ea le ALI‘I le Atua o Elia?” ‘Ona taia fo‘i lea e ia le vai, ‘ona vaeluaina ai lea i le tasi itū ma le tasi itū; ‘ona sopo‘ia atu ai lea e Elisaia.
15 ‘Ua iloa mai fo‘i o ia e so‘o o le ‘au perofeta ‘ua i Ieriko i le mea e iloa atu ai, ‘ona latou fai ane ai lea, “‘Ua ‘iā Elisaia le agaga o Elia.” ‘Ona latou ō ai lea e fa‘afetaia‘i ‘iā te ia, ‘ua latou ifo to‘ele ‘iā te ia.
16 ‘Ona latou fai mai lea ‘iā te ia, “Fa‘auta mai, ‘ua i au ‘au‘auna tagata malolosi e to‘alimagafulu, se‘i latou ō e sā‘ili i lou matai, ‘ina ne‘i si‘itia o ia e le Agaga o le ALI‘I ma lafoina i se mauga po o se vanu.”A ‘ua fai atu o ia, “‘Aua tou te ‘a‘auina atu.”
17 ‘Ua latou fa‘atauānau mai ‘iā te ia, ‘ua o‘o ‘ina mā o ia, ‘ona fai atu ai lea o ia, “‘Inā ‘a‘au ia.” ‘Ona latou ‘a‘auina atu ai lea o tagata e to‘alimagafulu. ‘Ua aso tolu o latou sā‘ili ai; a ‘ua lē iloa o ia.
18 ‘Ona latou toe fo‘i mai lea ‘iā te ia, (auā sa nofo o ia i Ieriko), ‘ona fai atu lea o ia ‘iā te i latou, “‘Ou te le‘i fai atu ‘ea ‘iā te ‘outou, ‘Aua tou te ō?”
19 ‘Ua fai mai tagata o le ‘a‘ai ‘iā Elisaia, “Fa‘auta mai ia, e lelei le mea e tu ai le ‘a‘ai nei, pei ‘ona e silafia, le ali‘i e; a ona leaga o le vai, e lafulafuā fo‘i le fanua.”
20 ‘Ona fai atu ai lea o ia, “‘Aumai ia ‘iā te a‘u se tanoa fou ma tu‘u i ai se masima.” ‘Ona latou ‘aumai ai lea ‘iā te ia.
21 ‘Ona alu atu lea o ia i le puna o le vai, ‘ua lafo i ai le masima ma fai atu, “O lo‘o fa‘apea ‘ona fetalai mai o le ALI‘I, ‘Ua ‘ou fa‘amāgaloina lenei vai; e lē toe tupu mai ai le oti po o le lafuā.”
22 ‘Ona māgalo ai lea o le vai, ‘ua o‘o lava i le aso nei, e tusa ma le ‘upu a Elisaia, na ia fai atu ai.
23 ‘Ua alu a‘e ia nai lea mea i Peteli; o lo‘o alu a‘e ia i le ala, ‘ona ō mai lea o tamaiti mai le ‘a‘ai, ‘ua latou tauemu ‘iā te ia, ‘ua fai mai ‘iā te ia, “Le ulu tula e, alu a‘e ia. Le ulu tula e, alu a‘e ia.”
24 ‘Ona fāliu lea o ia i tua, ‘ua va‘ai atu ‘iā te i latou, ‘ua fetu‘u atu fo‘i ‘iā te i latou i le suafa o le ALI‘I. ‘Ona ō mai ai lea o urosa fafine e lua mai le vao, ‘ua saei i tama e to‘afagafulu ma le to‘alua o i latou.
25 ‘Ona alu atu lea o ia nai lea mea i le mauga o Karamelu; ‘ona fo‘i atu lea o ia a‘i lea mea i Samaria.#