5 O tiisitse lefatshe metheong ya lona; le ke ke la sisinyeha le ka mohla o le mong.
6 O ne o le kgurumeditse ka bodiba jwaloka hoja ke kobo, metsi a ne a eme dithabeng;
7 eitse ha o kgalemela, a baleha; ha a utlwa lentswe la diaduma tsa hao, a phakisa a itshuthisa;
8 dithaba tsa phahama, diphula tsa kokobella dibakeng tseo o neng o di lokiseditse tsona.
9 O beetse metsi meedi hore a se hlole a e tlola, a se ke a boela a apesa lefatshe.
10 O kollisa didiba dikgutlong; metsi a tsona a iphallela pakeng tsa dithaba;
11 di nwesa diphoofolo tsohle tsa naha; dipitsi tsa naha di itlosa lenyora ho tsona.