1 Oho setjhaba sa ka, mamela thuto ya ka. Sekehela mantswe a molomo wa ka ditsebe.
2 Ke ahlamisa molomo wa ka ho hlahisa dipolelo tsa dikelello le ho bolela dithuto tsa kgale.
3 Seo re se utlwileng, seo re se tsebileng, seo bontata rona ba re boleletseng sona, re ke ke ra se patela bana ba bona;
4 re tla phetela ditloholo tsa rona dithoko tsa Jehova, le matla a hae, le mehlolo e entsweng ke yena.
5 O beetse Jakobo bopaki, o beile molao Iseraeleng, oo a laetseng bontata rona hore ba o tsebise bana ba bona,
6 e le hore o tsejwe ke moloko o hlahlamang, e leng bana ba tlang ho tswalwa,
7 hore le bona ba o bolelle bana ba bona, ba ke ba itshepele Modimo, ba se ke ba lebala diketso tsa Modimo, mme ba boloke ditaelo tsa wona;
8 ba se ke ba etsisa bontata bona, bao e bileng moloko o ikgantshang, o hanyetsang, moloko o sa kang wa tsamaya ka pelo e tiileng, oo moya wa wona o sa kang wa tshepeha ho Modimo.
9 Bana ba Efraime ba hlometseng, ba tshwereng diqha, ba ile ba baleha tsatsing la ntwa;
10 ha ba ka ba boloka selekane sa Modimo, ba hana ho tsamaya ka molao wa wona;
11 ba lebala ketso tsa wona tse phahameng le meeka ya wona, eo o ba bontshitseng yona.
12 O entse meeka mahlong a bontata bona naheng ya Egepeta, dithoteng tsa Tsowane.
13 Wa phatlola lewatle, wa ba tshedisa lona, wa emisa metsi jwaloka qubu;
14 motshehare wa ba tsamaisa ka leru, le bosiu bohle ka kgabo ya mollo.
15 Wa patsola mafika lefeelleng, wa ba nosa teng jwaloka hola ba enwa madibeng a maholo,
16 wa ntsha dinokana lefikeng, wa phallisa metsi ka diphororo.
17 Leha ho le jwalo, ba nna ba o sitelwa, ba nna ba kwenehela Mookamedi ya phahameng, lefeelleng.
18 Ba leka Modimo dipelong tsa bona, ka ho kopa ho fepuwa kamoo ba lakatsang kateng; ba seba Modimo, ba re:
19 Na Modimo o ka tseba ho re tekela tafole lefeelleng na?
20 O fedile wa otla lefika, mme metsi a phorosetsa, dinoka tsa phalla; hleka o ka re fa le bohobe, le ho otla setjhaba sa wona ka dinama na?
21 Yanayare Jehova ha a utlwa dipolelo tseo, a halefa, mollo wa tukela Jakobo, bohale ba phahamela Iseraele,
22 hobane ba sa ka ba dumela ho Modimo, ba sa ka ba tshepa thuso ya wona.
23 Leha ho le jwalo, wa laela maru hodimo, wa bula menyako ya mahodimo;
24 wa ba nesetsa manna ho ba fepa, wa ba fa mabele a lehodimo;
25 ba eja e mong le e mong bohobe ba dinatla; wa ba romela dijo, ba kgora.
26 Wa fokisa moya wa botjhabela sebakeng, ka matla a wona wa tlisa moya wa borwa,
27 wa ba nesetsa nama e ka ka lerole, le dinonyana tse mapheo tse kale ke lahlabathe la mawatle,
28 wa di wesetsa dipakeng tsa ditente tsa bona, ka nqa tsohle ho meaho ya bona.
29 Yaba ba ja, ba kgora hampe; wa ba romela seo ba neng ba se lakaditse.
30 Yare ba eso ho kgodisise takatso ya bona, nama ha e sa le molomong wa bona, bohale ba Modimo ba ba tukela,
31 wa hlahisetsa banna ba matla polao, wa rapalatsa bahlankana ba Iseraele fatshe.
32 Leha ho le jwalo, ba boela ba sitwa, ba se ke ba dumela meeka ya wona.
33 Wa fedisa matsatsi a bona hang, le dilemo tsa bona ka tshenyeho e phakisisang.
34 Enereha o ba bolaya, yaba hona ba o batlang, ba kgutlang, ba batla Modimo,
35 ba elellwa hoba Modimo ke lefika la bona, le hoba Modimo, Mookamedi ya phahameng, ke Molopolli wa bona.
36 Empa melomo ya bona ya nna ya o thetsa, maleme a bona a bua leshano ho wona,
37 pelo tsa bona ha di a ka tsa o kgomarela ho tiya, mme ha ba ka ba tiisetsa selekaneng sa wona.
38 Lerekong la wona wa tshwarela bokgopo ba bona, ha o a ka wa ba timetsa; wa itshwara kgalefong hangata; ha o a ka wa nea bohale bohle ba wona sebaka,
39 wa hopola hobane ke batho feela, ka phefumoloho e ikelang, e sa hloleng e boya.
40 Ba o kwenehela hangata hakakang lefeelleng! ba nna ba o kgathatsa hakakang nahathothe!
41 Ba boela ba leka Modimo, ba halefisa Mohalaledi wa Iseraele.
42 Ha ba ka ba hlola ba hopola letsoho la wona leha e le letsatsi leo o ba lopolotseng direng ka lona,
43 mohla o etsang mehlolo fatsheng la Egepeta, le dimakatso naheng ya Tsowane.
44 Wa fetola dinoka tsa bona madi, ba ba ba sitwa ho nwa metsi a melatswana ya tsona.
45 Wa ba romela menwang e neng e ba qeta, le dihohwana tse neng di ba tshwenya.
46 Ka diboko wa fedisa masimo a bona, le ka tsie ditholwana tsa tshebetso ya bona.
47 Wa bolaya merara ya bona ka sefako, le difate tsa bona tsa sikomora ka lebabo.
48 Wa otla makgomo a bona ka sefako, le mehlape ya bona ka letolo le tjhesang.
49 Wa ba betsa ka mollo wa bohale ba wona, ka kgalefo, tsheno, matswalo, ka lekgotla la mangeloi a bohale.
50 Wa nna wa nea kgalefo ya wona sebaka, ha o a ka wa qenehela meya ya bona; empa ka lefu la sewa wa timetsa bophelo ba bona,
51 Wa otla matsibolo kaofela naheng ya Egepeta, sehlooho sa bonna ba bona ditenteng tsa Kama.
52 Wa ntsha setjhaba sa wona jwaloka dinku, wa ba tsamaisa lefeelleng jwaloka mohlape.
53 Wa ba qhoba hamonate, ba sa tshohe letho, mme lewatle la kwahela dira tsa bona.
54 Wa ba fihlisa naheng ya wona e kgethehileng, thabeng e neng e hapuwe ke letsoho la wona le letona;
55 wa lelekisa matjhaba pela bona, wa ba arolela lefa la bona ka thapo, mme wa kenya meloko ya Iseraele ditenteng tsa yona.
56 Empa ba leka Modimo, ba ikgantshetsa Mookamedi ya phahameng, ha ba ka ba boloka ditaelo tsa wona;
57 ba fetoha bakwenehi le ba mano jwaloka bontata bona, ba eba jwaloka seqha se thetsang;
58 ba baka bohale ba wona ka dinqalo tsa bona tse diphahameng, le poulelo ya wona ka ditshwantsho tsa medimo ya bona.
59 Modimo ha o bona hoo, wa halefa haholo, wa tenwa hampe ke Iseraele.
60 Yaba o tlohela tabernakele ya Silo, tente eo o neng o dutse ho yona hara batho,
61 wa lesa kganya ya wona ya iswa kgolehong, le bokgabane ba wona ba wela matsohong a dira;
62 setjhaba sa wona wa se neela lerumo, wa halefela lefa la wona.
63 Wa fedisa bahlankana ba bona ka mollo, mme barwetsana ba bona ha ba ka ba etsetswa mekete ya manyalo.
64 Baprista ba bona ba dihuwa ke lerumo, mme bahlolohadi ba bona ha ba ka ba lla.
65 Yaba Morena o phaphama jwaloka motho ya robetseng, jwaloka mohale ya hoiswang ke veine,
66 a suthisa dira tsa hae, a ba jarisa dihlong tse sa feleng.
67 Leha ho le jwalo, a lahla tente ya Josefa, mme ha a ka a kgetha leloko la Efraime;
68 empa a kgetha leloko la Juda le thaba ya Sione eo a e ratang.
69 A tiisa sehalalelo sa hae jwaloka dithaba, jwaloka lefatshe leo a le theetseng mehla e sa feleng.
70 A kgetha Davida, mohlanka wa hae, a mo nka merakeng ya dinku;
71 a mo tlosa dinkung tsa ditswetse, e tle e be modisa wa Jakobo, setjhaba sa hae, le wa Iseraele, lefa la hae.
72 Mme Davida a ba moalosi wa bona ka pelo e hlwekileng, a ba tsamaisa ka letsoho le hlalefileng.