1 Ke tla bina mehauhelo ya Jehova ka ho sa yeng kae; molomo wa ka o tla tumisa botshepehi ba hao ho isa ditloholwaneng,
2 hobane ke itse: Mohau wa hao o entswe moaho o sa feleng; o theile botshepehi ba hao mahodimong.
3 O itse: Ke entse selekane le mokgethwa wa ka, ke hlapantse ho Davida, mohlanka wa ka, ka re:
4 Ke tla tiisa leloko la hao ka ho sa yeng kae, ke tiise terone ya hao ho isa melokong yohle. (Sela.)
5 Jehova, mahodimo a tumisa mehlolo ya hao, a bolela botshepehi ba hao phuthehong ya bahalaledi.
6 Hobane, phahameng ya mahodimo, ke mang ya ka itekantshang le Jehova? Ke mang ya tshwanang le Jehova hara bara ba Modimo?
7 Modimo o tshabeha mokgatlong o moholo wa bahalaledi, o tshajwa ke bohle ba o teelang hare.
8 Jehova, Modimo wa makgotla, ke mang ya matla jwaloka wena, Jehova? O teetswe hare ke botshepehi ba hao.
9 O laola boikgantsho ba lewatle: ha le emisa maqhubu a lona, wena o a a kokobetsa.
10 O thumakantse Egepeta jwaloka motho ya bolailweng, o hasantse dira tsa hao ka letsoho la hao le matla.
11 Mahodimo ke a hao, le lefatshe ke la hao; o theile lefatshe le tsohle tsa lona.
12 O bopile leboya le borwa; Thabore le Hermone di rorisa lebitso la hao.
13 Matla a dutse letsohong la hao, seatla sa hao se tiile, letsoho le letona la hao le phahamile.
14 Ho loka le kahlolo ke motheo wa terone ya hao, mohau le nnete di tsamaya pela sefahleho sa hao.
15 Ho lehlohonolo setjhaba se tsebang pitso ya terompeta! Se tsamaya leseding la sefahleho sa hao, Jehova,
16 se ithabisa kamehla ka lebitso la hao, se ithorisa ka ho loka ha hao.
17 Hobane o kganya ya sona le matla a sona, mme lenaka la rona le phahamiswa ke ho rata ha hao.
18 Hobane thebe ya rona ke Jehova, morena wa rona ke Mohalaledi wa Iseraele.
19 Mohlang oo, o kile wa bua ka pono ho bakgethwa ba hao, wa re: Ke thusitse mohale, ke phahamisitse eo ke mo kgethileng hara setjhaba;
20 ke bone Davida, mohlanka wa ka, ke mo tlotsitse ka ole ya ka ya kgalalelo.
21 Seatla sa ka se tla mo ahisa, letsoho la ka le mo tiise.
22 Sera se ke ke sa mo tsometsa, molotsana a ke ke a mo kokobetsa.
23 Bahanyetsi ba hae ke tla ba ripitla pela hae, ke otle dira tsa hae.
24 Botshepehi ba ka le mohau wa ka di tla ba le yena, mme lenaka la hae le tla hola lebitsong la ka;
25 ke tla bea seatla sa hae hodima lewatle, le letsoho le letona la hae hodima dinoka.
26 Yena o tla bitsa ho nna, a re: Ke wena ntate, Modimo wa ka, le lefika la poloko ya ka!
27 Mme nna ke tla mmea letsibolo la ka, le ya phahamileng hara marena a lefatshe.
28 Ke tla mmolokela mohau wa ka ka ho sa yeng kae; selekane sa ka le yena e tla ba sa mehla le mehla.
29 Ke tla etsa moloko wa hae hore e be o sa feleng, mme terone ya hae e ya nne e tiye ha mahodimo a ntse a le teng.
30 Ekare ha bara ba hae ba tlohela molao wa ka, ba sa ye ka ditaelo tsa ka,
31 ha ba tlola dikeletso tsa ka, ba sa boloke ditaelo tsa ka,
32 ke tla otla ditlolo tsa bona ka thupa, le bokgopo ba bona ka phafa;
33 empa nke ke ka ba amoha mohau wa ka, mme nke ke ka etsa botshepehi ba ka leshano;
34 nke ke ka senya selekane sa ka, mme nke ke ka fetola lentswe le tswileng molomong wa ka.
35 Ke hlapantse ho hong kgalalelong ya ka, ka re: Nke ke ka iketsa ya leshano ho Davida!
36 Moloko wa hae o tla nne o be teng ka ho sa feleng, terone ya hae e tla nne e be teng pela ka jwaloka letsatsi;
37 e tla tiya ka ho sa yeng kae jwaloka kgwedi. Paki e mahodimong e a tshepeha. (Sela.)
38 Leha ho le jwalo, o lelekile motlotsuwa wa hao, o mo lahlile, o mo halefetse;
39 o nyedisitse selekane seo o neng o se entse le mohlanka wa hao, o silafaditse moqhaka wa hae ka ho o lahlela fatshe.
40 O heleditse marako a hae kaofela, o rapaladitse diqhobosheane tsa hae.
41 Bafeti kaofela ba mo senyetsa, o entswe sekgobo sa ba mathoko.
42 O phahamisitse letsoho le letona la batubi ba hae, o thabisitse dira tsa hae kaofela;
43 o thithibantse bohale ba lerumo la hae, mme ha o a ka wa mo tiisa ntweng.
44 O fedisitse kganya ya hae, o rapaladitse terone ya hae fatshe;
45 o kgutshofaditse matsatsi a botjha ba hae, wa mo kgurumetsa ka dihlong. (Sela.)
46 Jehova, o tla nne o ipate ho isa kae? Kgalefo ya hao e tla tuka jwaloka mollo ho isa neneng?
47 Hopola hore bophelo ba ka bo bokgutshwanyane, le hore bana bohle ba batho o ba bopetse lefeela!
48 Motho ke mang ya phelang, mme a sa tlo ka a bona ho shwa? Ke mang ya ka lopollang moya wa hae matleng a nqalo ya bafu? (Sela.)
49 Morena, e kae mehauhelo ya hao ya pele, eo, botshepehing ba hao, o e baletseng Davida ka kano?
50 Morena, hopola dihlong tsa bahlanka ba hao; o elellwe kamoo pelong ya ka ke jereng nyatso ya ditjhaba tse ngata kateng;
51 o elellwe le ditshomo tsa dira tsa hao, Jehova, e leng ditshomo tse somang mehato ya motlotsuwa wa hao!
52 Ho roriswe Jehova ka ho sa feleng! Amen, e, amen.