1 Ho bokwe Jehova, lefika la ka, ya rutang matsoho a ka ntwa, le menwana ya ka hlabano;
2 ke thuso ya ka, le qhobosheane ya ka, tora ya ka e phahameng, le monamoledi wa ka, thebe ya ka, le palehelo ya ka; ke yena ya kokobetsang setjhaba sa katlasa ka.
3 Jehova, motho keng, ha o tla mo tseba, le ngwana motho, ha o tla mo hlokomela?
4 Motho o tshwana le pudulo, mme matsatsi a hae a ka leswiti le fetang.
5 Jehova, sekamisa mahodimo a hao, o theohe; o ame dithaba, di kubelle!
6 Tjhatjhamedisa mahadima, o ba qhalanye; o phose metsu ya hao, o ba timetse!
7 Nanabetsa matsoho a hao, o dutse phahameng, o ntopolle, o nnyolle metsing a maholo, o nntshe letsohong la bana ba baditjhaba,
8 bao molomo wa bona o bolelang lefeela, bao tsoho le letona la bona e leng letsoho la thetso.
9 Oho Modimo, ke rata ho o binela sefela se setjha, ke rata ho o rorisa ka thomo ya dikgole tse leshome,
10 wena ya neang marena poloko, wena ya namoletseng mohlanka wa hao, Davida lerumong le bolayang.
11 O ntopolle, o nntshe letsohong la bana ba baditjhaba, bao molomo wa bona o bolelang lefeela, bao letsoho le letona la bona e leng letsoho la thetso.
12 Ekare ha bara ba rona ba hola botjheng ba bona jwaloka dimela, mme baradi ba rona ba le jwaloka ditshiya tse dintlha tse kgabisitsweng ka mokgwa wa matlo a borena;
13 mediko ya rona ha e tletse dijo tsa mefuta yohle; makgomo a rona ha a atile ka dikete, a fula metebong ya rona ka mashome a dikete;
14 marole a rona ha a tswala, mme dikgeo, le ho patelwa, le mekgosi mapatlelong a rona di le siyo:
15 ho lehlohonolo setjhaba seo ho leng jwalo ho sona! Ho lehlohonolo setjhaba seo Jehova e leng Modimo wa sona!