1 Jehova, ke bea tshepo ya ka ho wena; ke se ke ka swabiswa le ka mohla o le mong.
2 O mpoloke ka ho loka ha hao, ke tle ke phonyohe; o sekehele tsebe ya hao ho nna, o nthuse.
3 O be ho nna lefika leo ke fumanang kaho ho lona, ke tle ke ipalehelle teng kamehla. O laetse hore ke bolokehe, hobane o lefika la ka le qhobosheane ya ka.
4 Modimo wa ka, o nnamolele diatleng tsa monyefodi, le letsohong la molotsana, le la motubi.
5 Hobane wena, Morena, o tshepo ya ka; esale le botjheng ba ka, ke beile tshepo ya ka ho wena, Jehova.
6 Esale le popelong ya mme, ke itshetlehile ka wena. Ke wena ya nntshitseng maleng a hae; o tla nne o roriswe ke nna kamehla.
7 Ho ba bangata ke ka mohlolo; empa wena o setshabelo sa ka se matla.
8 Molomo wa ka o tletse dithoko tsa hao, ke ntse ke o rorisa ka matsatsi wohle!
9 O se ke wa ntahla mehleng ya botsofadi ba ka; ha matla a ka a fela, o se ke wa ntlohela.
10 Hobane dira tsa ka di ntsheba ka dipelo tsa tsona,
11 ba hloyang moya wa ka ba rera hammoho, ba re: Modimo o mo tlohetse; mo phalleleng, le mo tshware; hobane ha a na mmoloki!
12 Oho Modimo, o se be hole le nna! Modimo wa ka, o phakise ho tla nthusa!
13 A di ke di swabiswe, di fele, dira tsa moya wa ka tse batlang tahleho ya ka, di ke di apeswe ke dihlong le nyediso!
14 Empa nna, ke tla tshepa kamehla, ke nne ke bolele dithoko tsohle tsa hao.
15 Molomo wa ka o tla bolela ho loka ha hao le poloko ya hao ka matsatsi wohle, hobane ha ke tsebe palo ya ditshitso tsa hao.
16 Ke tla tla, ke ntse ke bina diketso tsa hao tse phahameng; Morena Jehova, ke tla roka ho loka ha hao feela.
17 Modimo, o nthutile esale le botjheng ba ka, mme ke ntse ke tumisa mehlolo ya hao ho fihlela la kajeno.
18 Modimo, o se ke wa ntlohela ho fihlela botsofading bo boputswa; ke tle ke bolele diketso tsa hao ho moloko o tlang, le matla a hao ho bohle ba sa tlang ho tswalwa.
19 Ho loka ha hao, Modimo, ho phahamile ho fihla lehodimong. O entse ntho tse kgolo, Modimo; ya ka ka wena ke mang?
20 Wena ya re hlahiseditseng ditsietsi tse ngata tse bohloko, o tla boela o re fe bophelo, o be o re nyolle maleng a lefatshe.
21 Ekeletsa boholo ba ka, o kgutle, o ntshedise.
22 Le nna ke tla o rorisa ka pesalterine, ke bolele nnete ya hao, Modimo wa ka; ke tla o binela ka harepa, Mohalaledi wa Iseraele!
23 Nyakallo e tla be melomong ya ka, ha ke bina dithoko tsa hao, e tla ba le moyeng wa ka oo o o lopolotseng;
24 le lona leleme la ka le tla bolela ho loka ha hao ka matsatsi wohle; hobane ba batlang tahleho ya ka ba apesitswe ke dihlong le nyediso.