1 Jehova, o ntekile, mme o ntsebile,
2 O tseba ha ke dula, leha ke tsoha; o tseba mohopolo wa ka, o le hole.
3 O ntekola leha ke tsamaya, leha ke robala, o tsebisisa ditsela tsa ka kaofela.
4 Hobane, ere lentswe le eso ho be lelemeng la ka, o se o le tseba kaofela, Jehova.
5 O ntika kapele le kamorao, letsoho la hao le dutse ho nna.
6 Tsebo eo ke mohlolo ho nna; e phahamile haholo, ke sitwa ho e fihlela.
7 Nka ya kae, ka ba hole le moya wa hao? Nka balehela kae, ka ba hole le sefahleho sa hao?
8 Ha nka nyolohela mahodimong, o teng; leha nka ya robala nqalong ya bafu, le moo o teng!
9 Leha nka kalla mapheo a mafube, ka ya ikahela bofellong ba lewatle, le teng seatla sa hao se ka ntsamaisa, mme letsoho la hao le letona le ka ntshwara.
10 Ha nka re: A nke ke patwe ke lefifi, le teng bosiu bo tla ela pela ka.
11 Ho wena esita le lefifi le ke ke la eba letsho, bosiu bo ka ela jwaloka motshehare, lefifi la eba jwaloka lesedi.
12 Efela ke wena o bopileng letheka la ka; o ntohile popelong ya mme.
13 Ke o boka ka baka la mohlolo wa popeho ya ka.
14 Mesebetsi ya hao e a makatsa, moya wa ka o tseba teng haholoholo.
15 Mmopo wa ka ho o a ka wa pateha ho wena, ha ke ntse ke bopjwa sephiring, ke lohuwa ditho botebong ba lefatshe.
16 Mahlo a hao a bone moloho wa tsona; matsatsi a ka a ngodilwe kaofela hammoho bukeng ya hao; a ne a se a badilwe, a eso ho be teng.
17 Modimo, mehopolo ya hao e ntshita hakakang! Palo ya yona e kgolo hakakang!
18 Ha ke rata ho e bala, e fetisa lehlabathe ka palo; leha ke phaphama, ke sa ntse ke le ho wena.
19 Oho Modimo, o ke o bolaye e mobe. Lona, batho ba madi, suthelang hole le nna:
20 hobane bao e leng dira ho wena, ba o bolela hampe, ba ntse ba tlaela ka lebitso la hao.
21 Jehova, ha ke re, ke hloile ba o hloileng? Ha ke re, ke halefetse ba o phahamelang?
22 Ke ba hloile ka hloyo ya sebele, ho nna ke dira.
23 Modimo, o ntlhohlotse, o lekole pelo ya ka;
24 o nteke, o tsebe mehopolo ya ka, o tadime hoba a tsela ya bokgopo e teng ho nna na, mme o ntsamaise tseleng e isang bophelong bo sa feleng.