1 Kganya ya hao, Jehova, se e nee rona; se e nee rona, o mpe o e nee lebitso la hao, ka baka la mohau wa hao le la nnete ya hao!
2 Ke kang ha ditjhaba di tla re: Na jwale Modimo wa bona o kae?
3 Athe Modimo wa rona o mahodimong; o etsa tsohle tseo o di ratang.
4 Ditshwantsho tsa bona ke silefera le kgauta, mosebetsi wa matsoho a batho.
5 Di na le melomo, mme ha di bue; di na le mahlo, mme ha di bone;
6 di na le ditsebe, mme ha di utlwe; di na le dinko, mme ha di fofonele;
7 di sitwa ho tshwara ka diatla tsa tsona; ka maoto a tsona ha di tsamaye, ha ho lentswe le tswang mmetsong wa tsona.
8 Kamoo di leng kateng, ba di etsang ba tla ba jwalo, le bohle ba beang tshepo ya bona ho tsona.
9 Iseraele, o itshepele Jehova: ke yena thuso ya bona le thebe ya bona.
10 Ntlo ya Aarone, o itshepele Jehova: Ke yena thuso ya bona le thebe ya bona.
11 Lona ba tshabang Jehova, itshepeleng Jehova: ke yena thuso ya bona le thebe ya bona.
12 Jehova o re hopotse; o tla re hlohonolofatsa; o tla hlohonolofatsa ntlo ya Iseraele; o tla hlohonolofatsa ntlo ya Aarone;
13 o tla hlohonolofatsa ba tshabang Jehova, ba banyenyane le ba baholo.
14 Jehova o tla le atisa, lona le bana ba lona.
15 Le bahlohonolofatswa ba Jehova, ya entseng mahodimo le lefatshe.
16 Haele mahodimo, ke mahodimo a Jehova, mme lefatshe o le neile bana ba batho.
17 Hase bafu ba ka rokang Jehova, leha e le ba theohelang nqalong e kgutsitseng;
18 empa rona, re tla boka Jehova, jwale le ho isa ho bo sa feleng! Bokang Jehova!