1 Bokang Jehova! Rorisang Jehova, hobane o molemo; hobane mohau wa hae ke o sa feleng!
2 Ke mang ya ka tsebang ho bolela diketso tse phahameng tsa Jehova, le ho bina dithoko tsa hae kaofela?
3 Ho lehlohonolo ba bolokang melao, ba etsang ka ho loka kamehla!
4 Jehova, o nkgopole ka baka la lereko la hao ho setjhaba sa hao; o ntlele ka poloko ya hao,
5 ke tle ke bone lehlohonolo la bakgethwa ba hao, ke ithabise ka thabo ya setjhaba sa hao, ke ithorise hammoho le lefa la hao.
6 Re sitilwe jwaloka bontata rona, re entse bokgopo le bobe.
7 Bontata rona ha ba ka ba nahana mehlolo ya hao Egepeta, ha ba ka ba elellwa bongata ba mehauhelo ya hao, ba mpa ba ikgantsha pela lewatle, Lewatle le Lefubedu.
8 Leha ho le jwalo, o ba bolokile ka baka la lebitso la hae, a tle a bonahatse matla a hae.
9 A kgalemela Lewatle le Lefubedu, la epsha; a ba tsamaisa hara madiba jwaloka hoja ke nahathothe.
10 A ba namolela letsohong la ya ba hloileng, a ba lwela letsohong la sera;
11 metsi a kgurumetsa batubi ba bona, ha ho a ka ha sala le a mong.
12 Yaba ba dumela mantswe a hae, ba bina dithoko tsa hae.
13 Empa ba phakisa ba lebala diketso tsa hae, ha ba ka ba tshepa merero ya hae;
14 ba kenwa ke takatso nahathothe, ba leka Modimo feelleng.
15 A ba nea ka takatso ya bona, empa a ba romela lefu le bolayang.
16 Ba honohela Moshe diahelong, le Aarone, mokgethwa wa Jehova.
17 Yaba lefatshe le a ngamoha, mme la metsa Dathane, la hohlometsa letshwele la Abirame.
18 Mollo wa hotela hara phutheho ya bona, malakabe a timetsa ba babe.
19 Ba iketsetsa namane Horebe, ba kgumamela setshwantsho se tsholotsweng,
20 kganya ya bona ba e fetola setshwantsho sa kgomo e fulang jwang.
21 Ba lebala Modimo, Molopolli wa bona, o neng o entse ntho tse kgolo Egepeta,
22 le mehlolo naheng ya Kama, le meeka Lewatleng le Lefubedu.
23 Wa re, o a ba fedisa; empa Moshe, mokgethwa wa wona, a kena dipakeng tsa wona le bona ho faposa bohale ba wona, hore ba se ke ba fediswa.
24 Ba kgesa naha e lakatsehang; ha ba ka ba dumela dipallo tsa wona,
25 ba mpa ba dumaduma ditenteng tsa bona, mme ha ba ka ba ela lentswe la Jehova hloko.
26 Ka baka leo, a emisa letsoho la hae, a hlapanya, a re o tla ba diha feelleng,
27 le ho lahlela lesika la bona hara ditjhaba, le ho ba hasanyetsa dinaheng tsohle.
28 Ba kgomarela Baale-Peore, ba eja mahlabelo a hlabetsweng bafu;
29 ba halefisa Modimo ka diketso tse mpe tsa bona, ho fihlela lefu le befileng le kena hara bona.
30 Ke ha Finease a hlaha, a pheteletsa Modimo, mme lefu leo la kgutsa;
31 taba eo a e ballwa, ya eba ho loka ho yena kamehla le mehla, le ka ho sa feleng.
32 Ba o baka bohale metsing a Meriba, mme Moshe a hlahelwa ke kotsi ka baka la bona;
33 hobane ba halefisa moya wa hae, mme a bua ka molomo wa hae ka potlako.
34 Hape, ha ba ka ba fedisa ditjhaba, jwalokaha Jehova a ne a ba laetse,
35 ba mpa ba ikopanya le ditjhaba, ba ithuta mekgwa ya tsona;
36 ba sebeletsa ditshwantsho tsa tsona, ya eba leraba ho bona.
37 Ba hlabela medimo ya bohata bara le baradi ba bona,
38 ba tsholla madi a se nang molato, madi a bara ba bona le a baradi ba bona, bao ba ba hlabetseng ditshwantsho tsa Kanana; mme naha ya silafala ke madi.
39 Ba itshela ditshila ka mesebetsi ya bona le ka diketso tsa bootswa ba bona.
40 Yaba kgalefo ya Jehova e tukela setjhaba sa hae, mme lefa la hae ya eba ntho e manyala ho yena;
41 a ba neela matsohong a ditjhaba; ba ba hloileng ba ba busa;
42 ba tujwa ke dira tsa bona, ba kokobetswa tlasa matsoho a tsona.
43 Hangata Jehova a ba lopolla, empa ba nna ba ikgantsha mererong ya bona, ba itahla ka bokgopo ba bona.
44 Leha ho le jwalo, a nna a tadima matshwenyeho a bona, a utlwa medumaelo ya bona;
45 a nna a elellwa selekane sa hae bakeng sa bona, a ba hauhela ka baka la mohau wa hae o moholo,
46 mme a ba fumantsha mohau ho bohle ba neng ba ba isitse kgolehong.
47 Jehova, Modimo wa rona, o re lopolle, o re bokelle, o re ntshe hara ditjhaba, re tle re binele lebitso la hao le halalelang, re ithorise kganyeng ya hao.
48 Ho roriswe Jehova, Modimo wa Iseraele, ho nka ho sa simoloheng ho isa ho sa feleng! Mme setjhaba kaofela se ke se re: Amen! Bokang Jehova!