1 Taba tse monate di bela pelong ya ka; ke re, ke qapela morena; leleme la ka a le ke le be jwaloka lesiba la mongodi ya masene!
2 Ka botle o fetisa bana ba batho, mosa o tsholoha melomong ya hao; ka baka leo, Modimo o o hlohonolofaditse ka ho sa feleng.
3 O mohale! o itlamelle sabole ya hao lehlakoreng la hao; ke hlopheho ya hao le kganya ya hao!
4 Kganyeng ya hao o hlwelle koloing ya hao ya hlolo, o lwanele nnete le molemo le ho loka; letsoho le letona la hao le ke le o rute diketso tse makatsang!
5 Metsu ya hao e ntjhotjho; ditjhaba di tla wela pela maoto a hao; o tla hlaba pelo tsa bao e leng dira ho morena.
6 Terone ya hao ke terone ya Modimo; e tiile ka ho sa feleng; lere la borena ba hao ke lere la ho loka!
7 O rata ho loka, mme o hloile bokgopo. Ka baka leo, Modimo, Modimo wa hao, o o tlotsitse ka ole ya nyakallo ho fetisa balekane ba hao.
8 Mirra le aloe le kasia di arubetsa diaparo tsa hao; o thabiswa ke modumo wa diharepa matlung a borena a kgabisitsweng ka manaka a ditlou.
9 Baradi ba marena ba hara ba ratwang ke wena; mofumahadi wa hao o letsohong la hao le letona, a hlophehile ka kgauta ya Ofire.
10 Mamela, moradi wa ka, o lemohe, o sekehe ditsebe! Lebala setjhaba sa heno le ntlo ya ntatao!
11 Morena o lakatsa botle ba hao; erekaha e le morena wa hao, o mo utlwe.
12 Moradi wa Tire o tla o nyehela, ba baholo hara setjhaba ba o ananele.
13 Kahare ho ntlo, moradi wa morena o dutse bokgabaneng feela; seaparo sa hae ke lesela le homilweng ka kgauta.
14 O iswa ho morena hodima diphate tse mebalabala; thaka tsa hae tsa barwetsana di tla ho wena kamora hae,
15 di tliswa ka thabo le nyakallo, di kena tlung ya morena.
16 Ditulong tsa bontatao ho tla dula bara ba hao, o tla ba bea mahosana lefatsheng lohle.
17 Ke tla hopodisa lebitso la hao melokong yohle e tlang ho tla; ka baka leo, ditjhaba di tla o rorisa kamehla, ka ho sa feleng.