1 Rorisang Jehova, hobane o molemo, hobane mohau wa hae ke o sa feleng.
2 Balopollwa ba Jehova ba ke ba rialo, bao a ba lopolotseng matsohong a sera,
3 a ba latileng dinaheng tsohle, botjhabela le bophirimela, leboya le borwa.
4 Ba nnile ba solla feelleng, nahathothe, ba sa fumane motse wa ho aha;
5 ba ne ba shwele ke tlala le ke lenyora, meya ya bona e ne e idibana kahare ho bona.
6 Ba howa ho Jehova matswalong a bona, a ba lopolla ditsielehong tsa bona;
7 a ba tsamaisa ka tsela e lokileng, ba tle ba fihle motseng moo ba ka ahang teng.
8 A ba ke ba lebohe Jehova ka mohau wa hae le ka mehlolo ya hae ho bana ba batho;
9 hobane o kgodisitse moya o nyorilweng, mme a sitsa moya o lapileng ka menono.
10 Ba nnile ba aha lefifing le moriting wa lefu, e le ba tlamilweng ka bomadimabe le ditshepe.
11 Erekaha ba nnile ba eba manganga ditabeng tsa Modimo, ba nyedisa keletso ya Mookamedi ya phahameng;
12 ke moo a kokobeditseng dipelo tsa bona tlasa bohloko; ba imelwa, ba sa thuswe ke motho.
13 Ba howa ho Jehova matswalong a bona, a ba bona, a ba lopolla ditsielehong tsa bona;
14 a ba ntsha lefifing le moriting wa lefu, a roba ditlamo tsa bona.
15 A ba ke ba lebohe Jehova ka mohau wa hae le ka mehlolo ya hae ho bana ba batho;
16 hobane o robakile menyako ya koporo, a thuhakanya mekwallo ya tshepe.
17 Mahlanya a nnile a hlomodisetswa tsela ya wona ya lonya le makgopo a wona.
18 Ba ne ba se ba tennwe ke dijo tsohle, ba se ba fihlile menyakong ya lefu.
19 Ba howa ho Jehova matswalong a bona, a ba lopolla ditsielehong tsa bona;
20 a romela lentswe la hae, a ba fodisa, a ba ntsha mabitleng a bona.
21 A ba ke ba lebohe Jehova ka mohau wa hae le ka mehlolo ya hae ho bana ba batho!
22 Ba mo hlahisetse mahlabelo a teboho, ba bolele diketso tsa hae ka dipina.
23 Ba tsamayang lewatleng ka dikepe, ba hwebang metsing a maholo,
24 e bile dipaki tsa mesebetsi ya Jehova, le tsa mehlolo eo a e entseng madibeng.
25 A bolela, mme a tsosa moya wa sefefo, o emisang maqhubu a lewatle.
26 Ba phahama ho isa hodimodimo, ba theohela le ho isa bodibeng; meya ya bona ya qhibidiha ka ho tsieleha.
27 Ba tshwarwa ke modikwadikwane, ba thekesela jwaloka hola ba tahilwe, mme bohlale ba bona kaofela bo ne bo felle.
28 Ba howa ho Jehova matswalong a bona, a ba lopolla ditsielehong tsa bona.
29 A kgutsisa sefefo, a se fetola moya o mosesane, maqhubu a itholela;
30 ba thaba ha maqhubu a itholetse, a ba isa moo ba neng ba rata ho ya teng.
31 A ba ke ba lebohe Jehova ka mohau wa hae le ka mehlolo ya hae ho bana ba batho!
32 A ba ke ba mo phahamise phuthehong ya setjhaba, mme ba mo roke mokgatlong wa ba baholo.
33 O ne a fetole dinoka lefeella, le didiba tsa metsi naha e tshehla.
34 Lehwatata le behang a le fetola mobu wa letswai, ka baka la bolotsana ba baahi ba lona.
35 A fetola lefeella naha ya metsi, le naha e tshehla didiba tsa metsi;
36 teng a ahisa ba lapileng, teng ba thea metse ho aha ho yona.
37 Ba itjalla dithite, ba hloma merara, mme ba eja ditholwana tse behwang ke yona.
38 A ba hlohonolofatsa, a ba ngatafatsa haholo, ha a ka a fokotsa bongata jwa makgomo a bona.
39 Yaba ba fokodiswa, ba imelwa ke botubo le dikotsi le maswabi.
40 A tshollela nyediso ho marena, a a sollisa lefeelleng le sa nang tsela;
41 a tlosa ba lesitsi bomadimabeng ba bona, a ba tsosetsa bana ba bangata ba ka ka mehlape ya dinku.
42 Ba lokileng ba bona hoo, mme ba thaba; empa ba bolotsana kaofela ba thibana melomo.
43 Motho ya hlalefileng o kae? A ke a lemohe ditaba tseo, a ele mehauhelo ya Jehova hloko.