1 Phahamisetsang ho Modimo mehoo ya thabo, lona mafatshe wohle!
2 Rokang kganya ya lebitso la wona, le o tlotlise ka dithoko.
3 Ereng ho Modimo: Mesebetsi ya hao e tshabeha hakakang! Ka baka la boholo ba matla a hao, dira tsa hao di ipea katlase ho wena;
4 lefatshe lohle le tla o kgumamela, le o binele, le hodise lebitso la hao! (Sela.)
5 Tloong, le bone mesebetsi ya Modimo; o tshabeha ho etseng ha wona bakeng sa bana ba batho!
6 O ile wa pshesa bodiba ba lewatle, ba tshela noka ka maoto, ra ba ra ithabela ho wona.
7 Ka matla a wona o ntse o busa ka ho sa yeng kae; mahlo a wona a fadimeha hodima ditjhaba; bakwenehi ba se ke ba ikgodisa. (Sela.)
8 Rorisang Modimo wa rona, lona ditjhaba; utlwahatsang modumo wa dithoko tsa wona!
9 O pholositse meya ya rona, ha o a ka wa lesa maoto a rona a kgothometseha.
10 Hobane wena, Modimo, o re lekile, wa re tshekisa ka mollo jwalokaha ho tshekiswa silefera,
11 o nnile wa re tshwasa ka letlowa, wa bea phahlo e boima mathekeng a rona;
12 o nnile wa kallisa batho hodima dihlooho tsa rona, ra kena mollong le metsing; empa wa ba wa re nyolla teng ho re kgatholosa menonong.
13 Ke tla kena ka tlung ya hao ka ditjheso, ke o lefele dikano tsa ka tse tswileng melomong ya ka,
14 tse boletsweng ke molomo wa ka, ha ke ne ke le matswalong.
15 Ke tla o hlahisetsa ditjheso tsa nku tse nonneng, le monko wa mafura a dipheleu, ke o hlabele dipohwana le diphooko. (Sela.)
16 Tloong, le mamele, lona kaofela ba tshabang Modimo, ke tla le bolella seo o se entseng bakeng sa moya wa ka.
17 Ke howeleditse ho wona ka molomo wa ka, thoko ya wona eba lelemeng la ka.
18 Hola eba ke hopotse bokgopo pelong ya ka, Morena a ka be a sa ka a nkutlwa;
19 empa Modimo o nkutlwile, o mametse lentswe la thapelo ya ka.
20 Modimo a o ke o bokwe kamoo o sa kang wa lahla thapelo ya ka kateng, o sa kang wa ntima mohau wa wona.