1 Modimo o fela o le molemo ho Iseraele, ho ba pelo tse hlwekileng.
2 Haele nna, leoto la ka le batlile le kgoptjwa, mehato ya ka e batlile e thella;
3 hobane ke ne ke honohela baikakasi, ha ke bona lehlohonolo la banyefodi.
4 Hobane ha ba tsebe matshwenyeho ho isa lefung la bona, mmele wa bona o otleha hantle;
5 ba dutse kantle ho mahlomola a batho, mme ha ba otlwe jwaloka ba bang.
6 Ka baka leo, boikgohomoso bo ba ngomela jwaloka lepetu, sehloho se ba aparetse jwaloka kobo.
7 Mafura a rotola mahlo a bona, mehopolo ya pelo tsa bona e a itlhahisa.
8 Ke basomi, ke ba bolotsana, ba bolela ho tuba; ba bua ka puo tse phahameng.
9 Ba phahamisetsa melomo ya bona mahodimong, mme maleme a bona a lelera lefatsheng.
10 Ke ka baka leo setjhaba se retelehetseng ka nqa ho bona; se rata ho inwesa metsing a mangata,
11 se re: Na Modimo o ka tseba jwang? Mookamedi ya phahameng a ka ba le tsebo jwang?
12 Ba tadimeng ba babe bao! Ba iketla kamehla, ba totisa matlotlo a bona.
13 Ke feela ha ke hlwekisitse pelo ya ka, leha ke hlatswitse matsoho a ka bosweung;
14 ke otlwa ka matsatsi wohle, ke lauwa kameso yohle.
15 Hola nka re: Ke tla bua jwalo, moo e ka be e le ho eka moloko wa bana ba hao.
16 Yaba ke a nahana hore ke utlwisise taba tseo, mme ka fihlela hoba ke mosebetsi o thata,
17 ho fihlela ha ke kena sehalalelong sa Modimo, ya eba moo ke elang bofello ba batho bao hloko.
18 Ka re: O mpa o ba beile nqalong tse thellang, wa ba diha, mme ba senyehile.
19 Ba fedile jwang hanghang! Ba timela, ba senyeha, ba wa ba tshohile hampe.
20 Ha eba jwaloka toro phaphamong, wa ba tsosa jwalo, Morena; o entse seriti sa bona ntho feela e nyedisehang.
21 Enereha pelo ya ka e ntse e tlokoma, ke utlwa tsenene e hlaba lethekeng la ka,
22 ke ne ke le letlaopa le sa tsebeng letho, ke ne ke le jwaloka phoofolo pela hao.
23 Empa jwale ke ntse ke o kgomarela, o ntataisa ka letsoho la ka le letona.
24 O tla ntsamaisa ka keletso ya hao, mme qetellong o ntholle kganyeng ya hao.
25 Ke na le mang mahodimong haese wena? Kantle ho wena ha ke kgahliswe ke letho lefatsheng.
26 Nama ya ka le pelo ya ka di ntse di fela; lefika la pelo ya ka le kabelo ya ka ke Modimo, ka ho sa yeng kae!
27 Hobane ba o kwenehelang ba tla fela. O timetsa bohle ba yang ho itshilafaletsa hole le wena.
28 Empa haele nna, ho ba haufi le Modimo, ke molemo ho nna; ke beile setshabelo sa ka ho Morena Jehova, ke tle ke tsebe ho bolela mesebetsi ya hao kaofela.