15 Јован сведочеше за Него и велеше зборувајќи: „Ова е Тој за Кого реков: Оној, Кој иде по мене, Тој е пред мене, бидејќи постоеше порано од мене!“
16 И од Неговата полнота ние сите примивме благодат врз благодат;
17 зашто Законот беше даден преку Мојсеј, а благодатта и вистината станаа преку Исуса Христа.
18 Бога никој никогаш не Го видел; Единородниот Син, Кој е во пазувите на Отецот – Тој Го објави.
19 И тоа е сведоштвото на Јован, кога Јудејците испратија од Ерусалим свештеници и левити за да го прашаат: „Кој си ти?“
20 Тој призна и не одрече, туку објави: „Не сум јас Христос.“
21 И го прашаа: „Кој си, тогаш? Илија ли си ти?“ И рече: „Не сум.“ „Пророк ли си?“ И одговори: „Не.“