1 O lenei, ‘ia e alofa atu i le ALI‘I lou Atua, ma ‘ia e tausiusi i ana sauniga, ma ana tulafono, ma ana fa‘amasinoga, ma ana poloa‘iga i aso uma lava.
2 ‘Ia ‘outou iloa fo‘i i le aso nei, auā ‘ou te lē fai atu ‘iā ‘outou fānau o ē na lē iloa, ma ‘ua lē va‘ai atu i le a‘oa‘iga a le ALI‘I lo ‘outou Atua, o lona silisili, ma lona ‘a‘ao malosi, ma lona ‘a‘ao fa‘aloaloa,
3 ma ona vāvega, ma ana galuega na ia faia i Aikupito ‘iā Farao le tupu o Aikupito, ‘atoa ma lona nu‘u uma;
4 ma mea na faia e ia i le itūtau‘a a Aikupito, ‘iā latou solofanua ma o latou kariota, ‘ona ia fa‘alofia ifo i latou i le suāsami o le sami Ulaula ‘ina o latou tuliloa ‘iā te ‘outou; ‘ua fa‘aumatia fo‘i i latou e le ALI‘I, ‘ua o‘o mai i nei ona po;
5 ma mea na ia faia ‘iā te ‘outou i le vao, ‘ua o‘o i lo ‘outou ō mai i le mea nei;
6 ‘atoa ma mea na ia faia ‘iā Tatano ma Apiramo o atali‘i o Eliapo, o le atali‘i o Reupena, ‘ina ‘ua fa‘amaga le gutu o le ‘ele‘ele, ma folo ifo ‘iā te i latou, ma o latou ‘āiga, ma o latou fale ‘ie, ‘atoa ma a latou mea uma i luma o Isaraelu uma lava;
7 a ‘ua va‘ai atu o ‘outou lava mata i mea tetele uma ‘ua faia e le ALI‘I.
8 Lenei la, ‘ia ‘outou tausiusi i poloa‘iga uma lava ‘ou te fai atu ai ‘iā te ‘outou i le aso nei, ‘ina ‘ia ‘outou malolosi ai, tou te o‘o atu ai, ma fai mo ‘outou le nu‘u o le a ‘outou ō atu i ai e fai mo ‘outou;
9 ‘ina ‘ia ‘outou nofo tulu‘i i le lau‘ele‘ele na tautō ai le ALI‘I i o ‘outou tamā e foa‘iina atu ‘iā te i latou ma a latou fānau, o le nu‘u e tafe ai le suāsusu ma le meli.
10 Auā o le nu‘u a e alu i ai e fai mo oe, e lē pei o le nu‘u o Aikupito na ‘outou ō mai ai, na e lūlūina ai lau saito, ma fa‘asūsūina ai i lou vae, pei o se fanua o la‘au iti e ‘aina;
11 a o le nu‘u a ‘outou ō atu i ai e fai mo ‘outou, o le nu‘u lea o mauga ma vanu e inu lava i le suātimu mai le lagi.
12 O le nu‘u e tausia e le ALI‘I lou Atua, e lē aunoa ‘ona silasila i ai o le ALI‘I lou Atua, e āfua mai i le amataga o le tausaga e o‘o atu lava i le gata‘aga o le tausaga.
13 ‘Āfai fo‘i tou te matuā fa‘alogo i a‘u poloa‘iga ‘ou te fai atu ai ‘iā te ‘outou i le aso nei, ia ‘outou alofa atu i le ALI‘I lo ‘outou Atua, ma ‘au‘auna ‘iā te ia ma o ‘outou loto ‘atoa ma o ‘outou agaga ‘atoa,
14 ‘ona ‘ou foa‘iina atu lea o le timu i lo ‘outou nu‘u i ona tausaga, o le timuga muamua ma le timuga mulimuli, ‘e te fa‘apotopoto ai fo‘i lau saito, ma lau uaina, ma lau suāu‘u.
15 ‘Ou te tu‘uina atu fo‘i la‘au iti i lou lau‘ele‘ele ma au manu; ‘e te ‘ai fo‘i, ma e mā‘ona ai.
16 ‘Ia ‘outou, ne‘i pelogia o ‘outou loto, tou te ō ‘ese ai ma ‘au‘auna i atua ‘ese, ma ifo i ai;
17 ‘ona tupu ai lea o le to‘asā o le ALI‘I ‘iā te ‘outou, ‘ona pupuni ai lea e ia o le lagi, ‘ina ‘ia leai ni timu, ‘ia lē fua mai fo‘i le lau‘ele‘ele ni ona fua; ‘ona ‘outou vave fano ai lea ma te‘a i le nu‘u lelei o le a foa‘i mai e le ALI‘I ‘iā te ‘outou.
18 O lenei, ‘ia ‘outou tu‘u nei ‘upu i o ‘outou loto ma o ‘outou manatu, ‘ia fusi fo‘i e fai ma fa‘ailoga i o ‘outou lima, e ‘avea fo‘i ma pale i le vā o ‘outou mata.
19 ‘Ia ‘outou a‘oa‘o atu ai ‘iā ‘outou fānau, ma tautalatala a‘i pe a e nofo i lou fale, pe a e savali fo‘i i le ala, pe a e ta‘oto, pe a e tula‘i fo‘i.
20 ‘Ia e tusi ai fo‘i i pou o lou fale ‘atoa ma puipui;
21 ‘ina ‘ia fa‘ateleina ai o ‘outou aso ma aso o a ‘outou fānau i le lau‘ele‘ele na tautō ai le ALI‘I i o ‘outou tamā, e avatu ‘iā te i latou, ‘ia pei o aso e i ai le lagi i luga o le lalolagi.
22 Auā ‘āfai tou te matuā tausiusi i nei poloa‘iga uma lava ‘ou te fai atu ai ‘iā te ‘outou ia faia, ia ‘outou alofa atu i le ALI‘I lo ‘outou Atua, ‘ia sāvavali i ona ala uma lava, ma ia pipi‘i atu ‘iā te ia;
23 ‘ona tulia lea e le ALI‘I o ia nu‘u uma lava a‘i o ‘outou luma, tou te fai ai fo‘i mo ‘outou o nu‘u e sili ‘ona to‘atele ma le malolosi ‘iā te ‘outou.
24 E fai mo ‘outou o mea uma lava e solia e o ‘outou alofivae; e gata mai i le vao e o‘o i Lepanona, e gata mai fo‘i i le vaitafe o le vaitafe o Eufirate e o‘o atu i le sami tupito, e ‘avea ia ma o ‘outou tuā‘oi.
25 E lē tu mai se tagata e tete‘e ‘iā te ‘outou, o le ALI‘I lo ‘outou Atua na te tu‘uina atu le mata‘u ma le fefe ‘ona o ‘outou i le nu‘u uma lava o le a sāvavali i ai ‘outou, fa‘apei ‘ona fetalai mai o ia ‘iā te ‘outou.
26 Fa‘auta mai, ‘ou te tu‘uina atu i o ‘outou luma i le aso nei le manuia ma le malaia;
27 o le manuia pe ‘āfai tou te fa‘alogo i poloa‘iga a le ALI‘I lo ‘outou Atua, ‘ou te fai atu ai ‘iā te ‘outou i le aso nei;
28 a o le malaia pe ‘āfai tou te lē fa‘alogo i poloa‘iga a le ALI‘I lo ‘outou Atua, ‘ae ō ‘ese i le ala ‘ou te fai atu ai ‘iā te ‘outou i le aso nei, tou te mulimuli ai i atua ‘ese ‘ua ‘outou lē iloa.
29 A i‘u ‘ina fa‘ao‘oina atu oe e le ALI‘I lou Atua i le nu‘u o le a e alu i ai e fai mo oe, ‘ona e tu‘uina lea o le manuia i le mauga o Keresema, ma le malaia i le mauga o Evalu.
30 E lē o i ai ‘ea ia mauga i tala atu o Ioritana i le itū e alu ifo ai le la, i le nu‘u o sa Kananā e o nonofo i le ‘ele‘ele laugatasi e fesagai ma Kilikala, e latalata ane i aluna o Morē?
31 Auā a ‘outou sopo‘ia atu Ioritana e o‘o atu e fai mo ‘outou le nu‘u o le a foa‘i mai ‘iā te ‘outou e le ALI‘I lo ‘outou Atua, e faia fo‘i mo ‘outou, ma ‘outou nonofo ai,
32 ‘ia ‘outou tausiusi ia fai, o tulafono uma, ma fa‘amasinoga ‘ou te tu‘uina atu i o ‘outou luma i le aso nei.