1 O lenei, Isaraelu e, fa‘alogologo mai ia i tulafono ma fa‘amasinoga ‘ou te a‘oa‘o atu ai ‘iā te ‘outou tou te faia, ‘ina ‘ia ‘outou ola ai, ‘ina ‘ia ‘outou ō atu ai fo‘i, ma fai mo ‘outou le nu‘u ‘ua foa‘iina atu ‘iā te ‘outou e le ALI‘I le Atua o ‘outou tamā.
2 ‘Aua tou te fa‘aopoopo se ‘upu i ‘upu ‘ou te fai atu ai ‘iā te ‘outou, ‘aua fo‘i tou te ‘ave‘eseina ai se ‘upu; ‘ina ‘ia ‘outou tausiusi i poloa‘iga a le ALI‘I lo ‘outou Atua ‘ou te fai atu ai ‘iā te ‘outou.
3 ‘Ua ‘outou iloa i o ‘outou mata le mea na faia e le ALI‘I ‘ona o Paalapeoro, auā o tagata uma lava na mulimuli atu ‘iā Paalapeoro ‘ua fa‘aumatia i latou nai ‘iā te oe e le ALI‘I lou Atua.
4 A o ‘outou e na pipi‘i atu i le ALI‘I lo ‘outou Atua, o lo‘o ola mai ‘outou uma i le aso nei.
5 Fa‘auta, na ‘ou a‘oa‘o atu ‘iā te ‘outou i tulafono ma fa‘amasinoga e pei ‘ona poloa‘i mai ai ‘iā te a‘u le ALI‘I lo‘u Atua, ‘ina ‘ia ‘outou faia fa‘apea i le nu‘u tou te ō atu ai e fai mo ‘outou.
6 O lenei, ‘ia ‘outou tausiusi i ai, ma ‘ia ‘outou faia, auā o le mea lea tou te popoto ai, ma atamamai ai i luma o nu‘u, e fa‘alogologo i nei tulafono uma; ‘ona fa‘apea ane lea, “E moni lava o le nu‘u popoto ma le atamamai lenei nu‘u mamalu.”
7 Auā o ifea se nu‘u mamalu ‘ua latalata i ai lo latou atua, e pei o le ALI‘I lo tatou Atua ‘ua latalata mai i mea uma lava ‘ua tatou vala‘au atu ai ‘iā te ia?
8 O ifea fo‘i se nu‘u mamalu e i ai tulafono ma fa‘amasinoga tonu, e pei o lenei tulafono uma ‘ua ‘ou tu‘uina atu ‘iā te ‘outou i le aso nei?
9 Tau ‘ina fa‘aeteete oe ‘iā te oe, ma ‘ia e matuā fa‘aeteete lava ‘iā te oe, ne‘i galo ‘iā te oe nei mea na iloa ai e ou mata, ne‘i te‘a ‘ese ai lou loto i aso uma o lou olaga, a ‘ia e fa‘ailoa atu i lau fānau, ma le fānau a lau fānau;
10 fa‘ailoa atu le aso na e tu ai i luma o le ALI‘I lou Atua i Horepa, ‘ina o fetalai mai le ALI‘I ‘iā te a‘u, “‘Inā fa‘apotopoto mai ia ‘iā te a‘u le nu‘u, ‘ia latou fa‘alogologo mai i a‘u ‘upu, ‘ina ‘ia a‘oa‘oina ai i latou, ‘ina ‘ia matata‘u mai ‘iā te a‘u i aso uma lava latou te ola ai i le fogā‘ele‘ele, ma ‘ia latou a‘oa‘o ai ‘iā latou fānau.”
11 ‘Ona ‘outou fa‘alatalata atu lea ma tutū i lalo o le mauga, na mū fo‘i le mauga i le afi, ‘ua o‘o lava i le lagi; sa i ai fo‘i le pouliuli, ma ao ma le pogisā.
12 ‘Ona fetalai mai lea o le ALI‘I ‘iā te ‘outou mai totonu o le afi, ‘Ua ‘outou fa‘alogologo i le si‘ufofoga, a ‘ua ‘outou lē iloa atu se mea e tino a‘i mai, na o le si‘ufofoga lava.
13 ‘Ua na fa‘aalia fo‘i ‘iā te ‘outou lana feagaiga na ia poloa‘i mai ai ‘iā te ‘outou tou te faia o ‘upu ia e sefulu; na ia tusi ai fo‘i i luga o papama‘a e lua.
14 Na poloa‘i mai fo‘i le ALI‘I ‘iā te a‘u i ia ona po, e a‘oa‘o atu ‘iā te ‘outou i tulafono ma fa‘amasinoga tou te faia i le nu‘u tou te ō atu i ai e fai mo ‘outou.
15 O lenei, ‘ia matuā fa‘aeteete ‘outou ‘iā te ‘outou, auā na ‘outou lē iloa lava se mea na tino a‘i mai i le aso na fetalai mai ai le ALI‘I ‘iā te ‘outou i Horepa a‘i totonu o le afi.
16 Ne‘i leaga ‘outou ‘iā te ‘outou, ma ‘outou faia mo ‘outou se tupua ‘ua ta, o le fa‘atusa o se tupua e tasi, o le fa‘atusa o se tane, po o se fafine;
17 o se fa‘atusa o se tasi manu e tata‘a, o se fa‘atusa o se manulele e lele i lugā,
18 o se fa‘atusa o se tasi mea e totolo i le ‘ele‘ele, po o se fa‘atusa o se tasi i‘a o i sami i lalo o le lau‘ele‘ele;
19 ne‘i tepa a‘e fo‘i ou mata i le lagi, ma e iloa le lā, ma le masina, ma fetū, o ‘au uma o le lagi, ne‘i tōsina ai oe e ifo i ai, ma ‘au‘auna i ai, o mea ia na tofia mai e le ALI‘I lou Atua i nu‘u uma o le lalolagi.
20 Auā na ‘ave ‘outou e le ALI‘I, ma na ‘aumaia ‘outou a‘i le ‘ogāumu e tunu ai u‘amea, nai Aikupito lava, ‘ina ‘ia ‘avea ma nu‘u e fai mōna tofi, pei ‘ona fai i le aso nei.
21 Na to‘asā mai fo‘i le ALI‘I ‘iā te a‘u ‘ona o a ‘outou ‘upu, ma na tautō ai ‘ou te lē sopo‘ia atu Ioritana, ‘ou te lē alu atu fo‘i i le nu‘u lelei, o le a foa‘i atu ‘iā te oe e le ALI‘I lou Atua e fai mou tofi.
22 Auā e oti a‘u i le nu‘u nei, ‘ou te lē sopo‘ia atu Ioritana; a o ‘outou, tou te sopo‘ia atu, ma fai mo ‘outou lenā nu‘u lelei.
23 ‘Ia ‘outou lava, ne‘i galo ‘iā te ‘outou le feagaiga a le ALI‘I lo ‘outou Atua na ia osia ma ‘outou, ‘ona ‘outou fai lea mo ‘outou se tupua ‘ua ta, o le fa‘atusa lava o se mea e tasi ‘ua vaoia mai ai e le ALI‘I lou Atua.
24 Auā o le ALI‘I lou Atua o le afi ma‘ama‘ai ia, o le Atua fuā ia.
25 A o‘o ‘ina fai o lau fānau, ma ni fānau a lau fānau, a loa fo‘i ‘ona ‘outou mau i le nu‘u, a leaga ‘outou ‘iā te ‘outou, a ‘outou faia fo‘i se tupua ‘ua ta, o se fa‘atusa o se mea e tasi, ma faia mea leaga i luma o le ALI‘I lou Atua, e fa‘a‘ono‘ono ai ‘iā te ia;
26 ‘ou te vala‘au atu i le aso nei i le lagi, ma le lalolagi, e fai ma molimau ‘iā te ‘outou, e vave ‘ona matuā fano ‘outou a‘i le nu‘u tou te sopo‘ia atu ai Ioritana e fai mo ‘outou; tou te lē nofo tulu‘i ai, ‘ae matuā fa‘aumatia ‘outou.
27 E fa‘ata‘ape‘ape e le ALI‘I ‘iā te ‘outou i nu‘u ‘ese‘ese e to‘aitiiti fo‘i ni o ‘outou e totoe i nu‘u e ta‘ita‘iina ai ‘outou e le ALI‘I;
28 tou te ‘au‘auna ai atua na faia e lima o tagata, o la‘au ma ma‘a, o ē lē va‘ai, ma latou lē fa‘alogologo, latou te lē ‘a‘ai, ma latou le sogisogi,
29 ‘Ae ‘āfai tou te toe sā‘ili i le ALI‘I lou Atua i lea mea, ‘ona e maua lea o ia, pe ‘āfai ‘e te sā‘ili ‘iā te ia ma lou loto ‘atoa ma lou agaga ‘atoa.
30 A o‘o ‘iā te oe le puapuagā, a maua fo‘i oe e ia mea uma lava i aso amulī, ‘āfai ‘e te toe fo‘i atu i le ALI‘I lou Atua ma e fa‘alogo i lona si‘ufofoga,
31 (auā o le ALI‘I lou Atua, o le Atua alofa ia,) na te lē tu‘una oe, na te lē fa‘aumatia oe, e lē galo fo‘i ‘iā te ia le feagaiga ma ou tamā, na ia tautō ai ‘iā te i latou.
32 Auā ‘ia e su‘esu‘e i aso anamua na muamua ‘iā te oe, talu le aso na faia ai tagata e le Atua i le lalolagi; ‘iā ē su‘esu‘e fo‘i, ia, amata i le tasi tulu‘iga o le lagi, e o‘o atu i le tasi tulu‘iga o le lagi, pe ai se mea e pei o lenei mea tele, pe na fa‘alogoina e se tasi se mea la te tutusa?
33 Pe na fa‘alogologo se nu‘u i le si‘ufofoga o le Atua ‘ua tulei mai i totonu o le afi, fa‘apei ‘ona e fa‘alogologo i ai, ‘ae ola mai pea?
34 Pe na sauni ‘ea e le Atua ‘ona afio atu, ma ‘ave mōna le tasi nu‘u a‘i totonu o le tasi nu‘u, i tofotofoga, ma fa‘ailoga, ma vāvega, ma le tau‘a, ma le ‘a‘ao malosi, ma le ‘a‘ao fa‘aloaloa, ‘atoa ma mea mata‘utia tele lava, fa‘apei o mea uma na faia e le ALI‘I lo ‘outou Atua ‘iā te ‘outou i o ‘outou luma i Aikupito.
35 ‘Ua fa‘ailoaina atu ‘iā te oe ‘ina ‘ia e iloa, o le ALI‘I o ia lava le Atua, e leai se tasi na o ia lava.
36 ‘Ua na tulei mai lona si‘ufofoga mai le lagi ‘ia lagona e oe, ‘ina ‘ia a‘oa‘o mai o ia ‘iā te oe; ‘ina ‘ia fa‘ailoa mai fo‘i ‘iā te oe lana afi tele i le lalolagi, na e fa‘alogologo fo‘i i ana afioga a‘i totonu o le afi.
37 Na ia alofaina ou tamā o le mea lea na ia filifilia ai a latou fānau, ‘ina ‘ua mavae atu i latou, ‘ua na ‘aumaia fo‘i oe i ona luma i lona mana tele nai Aikupito;
38 ‘ina ‘ia tulia nai ou luma o nu‘u e sili ona malolosi ma le to‘atele ‘iā te oe, ‘ina ‘ia fa‘ao‘o ‘iā te oe, ma ‘ia avatu lo latou lau‘ele‘ele e fai mou tofi, fa‘apei ‘ona fai i le aso nei.
39 ‘Ia e iloa fo‘i i le aso nei, ma ia mafaufau ai lou loto, o le ALI‘I o ia lava le Atua i le lagi i lugā, ‘atoa ma le lalolagi nei, e leai lava se tasi.
40 O lenei, ‘ia e tausiusi i ana tulafono ma ana poloa‘iga ‘ou te fai atu ai ‘iā te oe i le aso nei, ‘ina ‘ia manuia ai oe ma au fānau pe a mavae atu oe, ‘ina ‘ia e nofo tulu‘i ai i le lau‘ele‘ele ‘ua foa‘i mai ‘iā te oe e le ALI‘I lou Atua i aso uma lava.
41 ‘Ona vavae‘eseina lea e Mose o ‘a‘ai e tolu i le itū mai o Ioritana i le mea e alu a‘e ai le la;
42 ‘ina ‘ia sola i ai o le fasioti tagata, o lē na te fasioti i lē la te tuā‘oi ma le lē iloa, e le‘i mua‘i ita fo‘i i ai; e sola fo‘i o ia i se tasi o ia ‘a‘ai, ‘ona ola ai lea o ia.
43 O ‘a‘ai ia, o Peseri i le vao i le ‘ele‘ele laugatasi, o sa Reupenā; ma Ramota i Kiliata, o sa Katō; ma Koleni o i Vasana, o sa Manasē.
44 O le tulafono lenei sa tu‘uina atu e Mose i le fānauga a Isaraelu;
45 o mau lava ia, ma tulafono, ma fa‘amasinoga na fai atu ai Mose i le fānauga a Isaraelu ‘ina ‘ua latou ō mai nai Aikupito,
46 i le itū mai o Ioritana i le vanu e feagai ma Petepeoro, i le lau‘ele‘ele o Sekono le tupu o sa Amorī, sa nofo i Hesepona, o ia na fasia e Mose ma le fānauga a Isaraelu ‘ina ‘ua latou ō mai mai Aikupito.
47 ‘Ua latou fai mo latou lona lau‘ele‘ele, ma le lau‘ele‘ele o Oko le tupu o Vasana, o tupu e to‘alua o sa Amorī i le itū mai o Ioritana i le mea e alu a‘e ai le la;
48 ‘e gata mai i Aroeru i le ‘auvai o le alia o Arinona, e gata mai i le mauga o Seona, o Heremoni lea;
49 ma le ‘ele‘ele laugatasi uma i le itū mai o Ioritana i sasa‘e, e o‘o lava i le sami o i le ‘ele‘ele laugatasi i lalo o Asetota-peseka.