1 ‘Ua alu atu fo‘i Mose, ma fai atu i ‘upu nei ‘iā Isaraelu uma.
2 ‘Ua fa‘apea atu ‘iā te i latou: “O o‘u tausaga ‘ua selau ma le luafulu ia i le aso nei; ‘ou te lē toe lava ‘ona ‘ou alu atu ma toe sau; ‘ua fetalai mai fo‘i le ALI‘I ‘iā te a‘u, ‘‘E te lē sopo‘ia atu lenei Ioritana.’
3 O le ALI‘I lou Atua, o ia na te sopo‘ia atu i ou luma, o ia na te fa‘aumatia ia nu‘u i ou luma, ‘ae fai ai mou; o Iosua, o ia na te sopo‘ia atu i ou luma, e pei ‘ona fetalai mai ai o le ALI‘I.
4 E faia fo‘i e le ALI‘I ‘iā te i latou e pei ‘ona faia e ia ‘iā Sekono ma Oko, o tupu o sa Amorī, ma o lā‘ua lau‘ele‘ele, sa fa‘aumatia i lā‘ua e ia.
5 E tu‘uina mai fo‘i i latou e le ALI‘I i o ‘outou luma, ‘ina ‘ia ‘outou faia ‘iā te i latou e tusa ma poloa‘iga uma ‘ua ‘ou poloa‘i atu ai ‘iā te ‘outou.
6 ‘Ia ‘outou fa‘amalolosi, ma ‘outou loto tetele; ‘aua tou te fefefe, ‘aua fo‘i ne‘i matata‘u i o latou luma; auā o le ALI‘I lou Atua, lua te ō fa‘atasi ma ia; na te lē tu‘una oe, na te lē lafoa‘i ‘iā te oe.”
7 ‘Ua vala‘au atu fo‘i Mose ‘iā Iosua, ‘ua na fai atu fo‘i ‘iā te ia i luma o Isaraelu uma, “‘Ia e fa‘amalosi, ma ‘ia e loto tele; auā tou te ō ma le nu‘u nei i le nu‘u sa tautō ai le ALI‘I i o latou tamā na te foa‘iina atu ‘iā te i latou; ‘e te tofitofia fo‘i mo i latou.
8 O le ALI‘I fo‘i, o ia na te savali i ou luma; lua te fa‘atasi ma ia, na te lē tu‘una oe, na te lē lafoa‘i ‘iā te oe; ‘aua ‘e te fefe, ‘aua fo‘i ‘e te mata‘u.”
9 ‘Ua tusia fo‘i e Mose lenei tulafono, ‘ona avatu ai lea i le ‘au ositaulaga o le fānauga a Levi, o ē tau‘ave le ‘atola‘au o le feagaiga a le ALI‘I, ‘atoa fo‘i ma toeaina uma o Isaraelu.
10 ‘Ua fai atu fo‘i Mose ‘iā te i latou, ‘ua fa‘apea atu, “A uma tausaga e fitu, pe a o‘o i le fa‘apotopotoga i le tausaga o le fa‘asa‘olotoga, i le tausamiga o fale apitaga,
11 pe a ō atu Isaraelu uma ia iloa i latou i luma o le ALI‘I lou Atua i le mea e filifilia e ia, ‘ia e faitau atu ai lenei tulafono i luma o Isaraelu uma lava ‘ia latou fa‘alogo ai.
12 ‘Ia e fa‘apotopotoina le nu‘u, o tane, ma fafine, ma tamaiti, ‘atoa ma le tagata ‘ese e ‘iā te oe i au ‘a‘ai, ‘ina ‘ia latou fa‘alogologo ai, ma ia a‘oa‘oina i latou, ma ‘ia latou matata‘u i le ALI‘I lo ‘outou Atua, ma latou ‘ana‘ana e fai o ‘upu uma lava o lenei tulafono.
13 O a latou fānau fo‘i, e na lē iloa, ‘ia latou fa‘alogologo, ma ia a‘oa‘oina i latou ‘ia matata‘u i le ALI‘I lo ‘outou Atua, i aso uma lava tou te ola ai i le lau‘ele‘ele tou te sopo‘ia atu ai Ioritana e fai mo ‘outou.”
14 ‘Ua fetalai mai le ALI‘I ‘iā Mose, “Fa‘auta, ‘ua lata mai lou aso ‘e te oti ai; ‘ia e vala‘au ‘iā Iosua, ma ‘ia ‘oulua tutū mai i le fale fetāfa‘i o le fa‘apotopotoga, ‘ina ‘ia ‘ou poloa‘i atu ‘iā te ia.” ‘Ona ō ai lea o Mose ma Iosua, ‘ua la tutū mai i le fale fetāfa‘i o le fa‘apotopotoga.
15 ‘Ona fa‘aali mai lea o le ALI‘I i le fale fetāfa‘i i le ao fa‘aniutū; ‘ua tu fo‘i le ao fa‘aniutū i le faitoto‘a o le fale fetāfa‘i.
16 ‘Ona fetalai mai lea o le ALI‘I ‘iā Mose, “Fa‘auta, o le a e ta‘oto fa‘atasi ma ou tamā; ‘ona tutū lea o lenei nu‘u, ma latou mulilulua i atua o tagata ‘ese o le nu‘u latou te o i ai, o fa‘atasi ai ma i latou, latou te lafoa‘i mai fo‘i ‘iā te a‘u, ma latou soli i la‘u feagaiga na ‘ou osia ma i latou.
17 ‘Ona tupu ai lea o lo‘u ita ‘iā te i latou i lea aso, ‘ona ‘ou lafoa‘i lea ‘iā te i latou, ma ‘alo o‘u mata ‘iā te i latou, e fa‘aumatia fo‘i i latou, e o‘o ‘iā te i latou o mea leaga e tele ma mea e tigā ai; ‘ona fai ane lea o i latou i lea aso, ‘E lē ‘ua o‘o ‘ea nei mea leaga ‘iā te i tatou ‘ina ‘ua lē o ‘iā te i tatou lo tatou Atua?’
18 E matuā ‘alo o‘u mata i lea aso ‘ona o mea leaga uma ‘ua latou faia, ‘ina ‘ua latou fa‘asaga i atua ‘ese.
19 O lenei, ‘ia ‘outou tusia lenei pese mā ‘outou, ma a‘oa‘o ai i le fānauga a Isaraelu; ‘ia lē te‘a i o latou gutu, ‘ina ‘ia ‘avea lenei pese ma molimau ‘iā te a‘u i le fānauga a Isaraelu.
20 Auā pe a ‘ou fa‘ao‘o atu ‘iā te i latou i le lau‘ele‘ele sa ‘ou tautō ai i o latou tamā, e tafe ai le suāsusu ma le meli; pe a uma fo‘i ‘ona latou ‘a‘ai, ma latou mā‘o‘ona, ma puputa ai i latou; ‘Ona fa‘asaga lea o i latou i atua ‘ese, ma ‘au‘auna atu i ai, ma ‘ino‘ino mai ‘iā te a‘u, ma soli i la‘u feagaiga.
21 A o‘o fo‘i ‘iā te i latou o mea leaga e tele, ma mea e tigā ai, ‘ona fai lea o lenei pese ma molimau ‘iā te i latou; auā e lē galo ai i gutu o a latou fānau, auā ‘ua ‘ou iloa o latou manatu na latou faia i le aso nei, a o le‘i fa‘ao‘oina e a‘u o i latou i le nu‘u ‘ua ‘ou tautō ai.”
22 ‘Ua tusi fo‘i e Mose lenei pese i lea lava aso, ‘ua na a‘oa‘o atu ai fo‘i i le fānauga a Isaraelu.
23 ‘Ua poloa‘i atu fo‘i o ia ‘iā Iosua le atali‘i o Nuno, ‘ua fa‘apea atu, “‘Ia e fa‘amalosi, ma ‘ia e loto tele; auā ‘e te fa‘ao‘oina atu le fānauga a Isaraelu i le nu‘u sa ‘ou tautō ai ‘iā te i latou; ‘ou te i ai fo‘i ‘iā te oe.”
24 ‘Ua uma fo‘i ‘ona tusia e Mose o ‘upu o lenei tulafono i le tusi, ‘ua o‘o ‘ina ‘atoa,
25 ‘ona fai atu lea o Mose i sa Levī, o ē sa tau‘ave le ‘atola‘au o le feagaiga a le ALI‘I, ‘ua fa‘apea atu,
26 “‘Ia ‘outou ‘ave le tusi o lenei tulafono, ma tu‘u ai i le itū o le ‘atola‘au o le feagaiga a le ALI‘I lo ‘outou Atua, ‘ina ‘ia i ai ē fai ma molimau ‘iā te oe.
27 Auā ‘ua ‘ou iloa lou fouvale, ma lou ua ma‘a‘a; fa‘auta, o lo‘o fouvale ‘outou i le ALI‘I, o lo‘o o tatou ola fa‘atasi i le aso nei; e le atili ai ‘ea pe a ‘ou oti?
28 ‘Ia ‘outou fa‘apotopoto mai ‘iā te a‘u o toeaina uma o ‘outou itū‘āiga, ma o ‘outou faipule, ‘ina ‘ia ‘ou fai atu nei ‘upu ‘iā latou fa‘alogo ai ‘ou te vala‘au fo‘i i le lagi ma le lalolagi e fai ma molimau ‘iā te i latou.
29 Auā ‘ua ‘ou iloa pe a mavae lo‘u oti, ‘ona matuā leaga lea o ‘outou, ma ‘outou ō ‘ese i le ala ‘ua ‘ou poloa‘i atu ai ‘iā te ‘outou e o‘o fo‘i ‘iā te ‘outou mea leaga i aso amulī auā e faia e ‘outou mea leaga i luma o le ALI‘I, i lo ‘outou fa‘a‘ono‘ono ‘iā te ia i le galuega a o ‘outou lima.”
30 ‘Ua fai atu fo‘i Mose a o fa‘alogologo mai le fa‘apotopotoga uma o Isaraelu o ‘upu o lenei pese, ‘ua o‘o ‘ina ‘atoa.