1 A fai e maua se tagata ‘ua fasiotia i le lau‘ele‘ele ‘ua foa‘iina mai e le ALI‘I lou Atua ‘iā te oe e fai mou o lo‘o ta‘atia i le vao, ‘ae lē iloa po o ai na na fasi ‘iā te ia;
2 ‘ia ō atu ou toeaina ma ou fa‘amasino, ma ‘ia latou fuatia atu o vā o lē ‘ua fasiotia ma ‘a‘ai e vagavagai;
3 o le ‘a‘ai fo‘i e lata i lē ‘ua fasiotia ‘ia ‘ave e toeaina o lea ‘a‘ai se povi fafine, ‘ua na lē fai se galuega, ‘ua na lē toso i le amo;
4 ‘ia ta‘ita‘iina fo‘i e toeaina o lea ‘a‘ai le povi fafine i se alia e tafe pea, e lē galueina e tagata, e lē lūlūina ai fo‘i ni saito, ‘ona latou vāea ai lea le ua o le povi fafine i le alia;
5 ‘ona fa‘alatalata atu ai lea o ositaulaga, o le fānauga Levi; auā ‘ua filifilia i latou i le ALI‘I lou Atua e ‘au‘auna ‘iā te ia, ma fa‘amanuia atu i le suafa o le ALI‘I; o a latou ‘upu fo‘i e tonu ai finauga uma ma fasiga uma lava;
6 o toeaina uma fo‘i o lea ‘a‘ai, ‘ua lata i lē ‘ua fasiotia, latou te fafano o latou lima i luga o le povi fafine ma vāea lona ua i le alia;
7 ‘ona latou, fai mai lea, e fa‘apea mai, “E le‘i fa‘amaligiina lenei toto e o matou lima, e le‘i va‘ai i ai fo‘i o matou mata.
8 Le ALI‘I e, ‘ia e fa‘amāgalo mai i lou nu‘u o Isaraelu, ‘ua e togiolaina; ‘aua fo‘i ‘e te fa‘ae‘e mai i lou nu‘u o Isaraelu le toto o lē ‘ua lē sala.” ‘Ona fa‘amāgaloina ai lea o i latou a‘i le toto.
9 ‘Ona e tu‘u‘eseina ai lea ‘iā te oe o le toto o lē ‘ua lē sala, pe a e faia le mea tonu i luma o le ALI‘I.
10 A ē alu atu e tau ai le tau‘a ma ou fili, pe a tu‘uina mai fo‘i i latou ‘iā te oe e le ALI‘I lou Atua, ma e ‘ave i latou o tagata o tau‘a,
11 ma e iloa se fafine lālelei i na tagata o tau‘a, ‘ua e mana‘o fo‘i i ai, ma e ‘ave e fai mau avā;
12 ‘ona e ‘aumai lea ‘iā te ia i lou fale; ‘ona tafi lea e ia o lona ulu, ma salasala e ia ona atigilima;
13 ‘ia tō ‘ese fo‘i e ia lona ‘ofu fa‘atagata o tau‘a, ma nofo o ia i lou fale, e tagi fo‘i o ia i lona tamā ma lona tinā i le masina ‘atoa ‘ona e alu ane lea ‘iā te ia, e fai fo‘i oe māna tane, e fai fo‘i o ia mau avā.
14 ‘Āfai fo‘i e leai sou fiafia ‘iā te ia, ‘ona e tu‘uina atu lea o ia ‘ia sa‘o lona loto; ‘ae ‘aua lava ne‘i e fa‘atau ‘iā te ia i tupe, ‘aua fo‘i ‘e te fai o ia ma pologa, auā ‘ua e fa‘asaunoa ‘iā te ia.
15 ‘Āfai e to‘alua avā a se tasi tagata, ‘ua fiafia ia i le tasi, ‘ae ‘ino‘ino i le tasi, ma ‘ua la fānanau ‘iā te ia o a la tama tane, o lē ‘ua ia fiafia i ai ma lē ‘ua ‘inosia; ‘āfai fo‘i e lua‘i fānau mai le tama a lē ‘ua ‘inosia;
16 a o‘o i le aso na te tofia ai ana mea i ona atali‘i, e lē mafai ‘ona ‘avea ma ulumatua le tama a lē ‘ua ia fiafia i ai, ‘ae tu‘ua le tama a lē ‘ua ‘inosia, auā o le ulumatua ia;
17 a ‘ia fa‘ailogaina lava e ia o le ulumatua, o le tama lea a lē ‘ua ‘inosia, i lona avatu ‘iā te ia o vaega e lua i mea uma lava ‘ua ‘iā te ia; auā o ia le amataga o lona malosi; e ona le tofi o le ulumatua.
18 ‘Āfai e vaogatā ma le finauvale le atali‘i o se tasi tagata, e lē fa‘alogo i le ‘upu a lona tamā, po o le ‘upu a lona tinā, pe a uma ‘ona la a‘oa‘i atu i ai, ‘ae lē fa‘alogo lava o ia ‘iā te i lā‘ua;
19 ‘ona tago ai lea o lona tamā ma lona tinā ‘iā te ia, ma avatu ‘iā te ia i toeaina o lana ‘a‘ai, i le faitoto‘a o lana ‘a‘ai;
20 ‘ona fai atu lea o i lā‘ua i toeaina o lana ‘a‘ai, “o la ma tama nei ‘ua vaogatā ma le finauvale ia, e le‘i fa‘alogo lava ‘iā ma ‘upu; o le ‘ai tele fo‘i ia, ma le inu ‘ia ‘onā.”
21 ‘Ona fetogi ai lea o tagata uma o lana ‘a‘ai ‘iā te ia i ma‘a, ‘ia oti o ia; ‘ona e tu‘u‘eseina ai lea o le leaga ‘iā te oe; e fa‘alogo ai fo‘i Isaraelu uma lava, ma latou matata‘u ai.
22 ‘Āfai fo‘i o se tagata ‘ua na fai se agasala e tatau ‘ona oti ai o ia, a o‘o ‘iā te ia le oti, ‘ua e fa‘atautau fo‘i ‘iā te ia i se la‘au;
23 ‘aua ne‘i aoina lona tino i le la‘au, a ‘ia e tanu lava ‘iā te ia i lea aso; (auā ‘ua fa‘afanoina e le Atua lē ‘ua fa‘atautauina;) ‘ina ne‘i leaga ai lou lau‘ele‘ele ‘ua foa‘iina mai e le ALI‘I lou Atua ‘iā te oe e fai mou tofi.#