1 A fa‘aumatia e le ALI‘I lou Atua o nu‘u ‘ua foa‘iina mai o lo latou lau‘ele‘ele e le ALI‘I lou Atua, pe a e fai ai mou, ma e nofo i o latou ‘a‘ai ma o latou fale;
2 ‘ona o vavae‘eseina lea o ‘a‘ai e tolu mo oe, i lou lau‘ele‘ele ‘ua foa‘iina mai o le ALI‘I lou Atua ‘iā te oe e fai mou.
3 ‘Ia e teuteu se ala mo oe, ma ‘ia e vaetoluina itū o lou lau‘ele‘ele, e foa‘iina mou tofi e le ALI‘I lou Atua, ‘ina ‘ia sōsōla i ai o i latou uma o ē fasioti tagata.
4 O le ‘upu fo‘i lenei i le fasioti tagata, e sola i ai, e ola ai o ia; o lē na te fasioti i lē la te tuā‘oi ma le lē iloa, e le‘i mua‘i ita fo‘i ‘iā te ia;
5 a ‘ua la ō ma lē la te tuā‘oi i le vao e ta la‘au, ‘ua ta ifo le tai lona lima e ta ai le la‘au i le matau, ‘ona mole atu ai lea o le u‘amea a‘i le ‘au, ‘ua lavea ai lē la te tuā‘oi, ‘ua oti ai o ia; o ia lava na te sola i se tasi o ia ‘a‘ai, e ola ai.
6 ‘Ina ne‘i tuliloaina le fasioti tagata e lē na te taui ma sui le toto, a o tigā lona loto, ma maua atu ‘iā te ia, auā ‘ua mamao le ala, ‘ona fasioti ai lea ‘iā te ia; ‘ae lē tatau ‘iā te ia le oti, auā e le‘i mua‘i ita o ia ‘iā te ia.
7 O le mea lea ‘ou te fai atu ai ‘iā te oe, e fa‘apea atu: ‘Ia e vavae‘eseina mo oe o ‘a‘ai e tolu.
8 ‘Āfai fo‘i e fa‘alauteleina e le ALI‘I lou Atua lou lau‘ele‘ele, e fa‘apei ‘ona ia tautō i ou tamā; ma foa‘iina mai ‘iā te oe le lau‘ele‘ele uma lava ‘ua na fetalai mai e avatu i ou tamā;
9 ‘āfai ‘e te ‘ana‘ana e fai o nei poloa‘iga uma, ‘ou te fai atu ai ‘iā te oe i le aso nei, ‘ia alofa atu i le ALI‘I lou Atua, ma savali i ona ala i aso uma lava; ‘ona e toe fa‘aopoopo lea mo oe o ‘a‘ai e tolu, i na ‘a‘ai e tolu;
10 ‘ina ne‘i fa‘amaligiina le toto o lē ‘ua lē sala i lou lau‘ele‘ele ‘ua foa‘iina mai e le ALI‘I lou Atua ‘iā te oe e fai mou tofi, ‘ina ne‘i ‘iā te oe le sala ‘ona o le toto.
11 ‘Ae ‘āfai e ita se tagata i lē la te tuā‘oi, ma lamalama ‘iā te ia, ma tula‘i atu, ma fasi ‘iā te ia ‘ia oti ‘ona sola lea o ia i se tasi o ia ‘a‘ai;
12 ‘ona ‘a‘auina atu lea nisi e toeaina o lona ‘a‘ai e ‘a‘amiina atu ai o ia, ma tu‘uina atu o ia i le pule a lē na te tauia ma sui le toto, ‘ia oti ai o ia.
13 ‘Aua ne‘i e alofa ‘iā te ia, a ‘ia e tu‘u‘eseina le sala o le toto o lē ‘ua lē sala i Isaraelu, ‘e te lelei ai.
14 ‘Aua ‘e te si‘i le tuā‘oi o lē lua te tuā‘oi, o le tuā‘oi sa faia ē na mua i lou fanua o le a fai mou tofi i le nu‘u e foa‘iina e le ALI‘I lou Atua ‘iā te oe e fai mou.
15 ‘Aua ne‘i tula‘i atu se molimau e to‘atasi o molimau i se amioletonu a se tagata, po o se agasala, i agasala uma lava e agasala ai o ia; a o mau a ē molimau e to‘alua, po o mau a ē molimau o to‘atolu e fa‘amaoni ai le mea.
16 ‘Āfai e tula‘i atu se molimau fa‘asauā e molimau ai se amio leaga a se tagata;
17 ‘ona tutū ai lea o ia tagata e to‘alua ‘ua i ai le finauga, i luma o le ALI‘I, i luma o le ‘au ositaulaga ma fa‘amasino, e i ai i ia ona po;
18 ‘ona matuā su‘esu‘e lea e fa‘amasino; fa‘auta fo‘i, ‘āfai o le molimau o le molimau pepelo ia, ‘ua na tala pepelo i lona uso
19 ‘ona ‘outou faia lea ‘iā te ia, e pei ‘ona manatu o ia, e fai i lona uso; ‘ona e tu‘u‘eseina ai lea o le leaga ai ‘iā te oe.
20 ‘Ona fa‘alogo ai lea, ma matata‘u ai nisi uma lava, ma latou le toe faia se mea leaga fa‘apea i lou nu‘u.
21 ‘Aua ne‘i e alofa ‘iā te ia; a ‘ia sui atu le ola i le ola, o le mata i le mata, o le nifo i le nifo, o le lima i le lima, ma le vae i le vae.#