1 A o‘o i le tausaga e fitu ‘e te fai ai se fa‘asa‘olotoga.
2 O le uiga fo‘i o le fa‘asa‘olotoga lenei; e ta‘itasi le tagata e avatu mea ‘ua ‘aitalafu mai ai lē la te tuā‘oi na te tu‘u fua atu i ai; ‘aua ne‘i fa‘āu atu o ia, ‘ia toe ‘aumai e lē la te tuā‘oi, po o lona uso; auā e ta‘ua lea o le fa‘asa‘olotoga a le ALI‘I.
3 O se tagata ‘ese ‘e te fa‘āu i ai, a o lau mea ‘ua i lou uso ‘e te tu‘u fua atu i ai;
4 ‘ina ‘ia leai se tagata ‘iā te oe e mativa; auā e matuā fa‘amanuia e le ALI‘I le nu‘u ‘ua foa‘iina mai e le ALI‘I lou Atua ‘iā te oe e fai mou tofi ‘e te maua lava;
5 ‘āfai lava ‘e te matuā fa‘alogo i le si‘ufofoga o le ALI‘I lou Atua, ‘ia e ‘ana‘ana e fai i nei poloa‘iga uma lava ‘ou te fai atu ai ‘iā te oe i le aso nei.
6 Auā ‘ua fa‘amanuia oe e le ALI‘I lou Atua, e pei ‘ona ia fetalai mai ai ‘iā te oe; ‘e te avatu fo‘i mea i nu‘u e tele, ‘ae te lē nonō atu; ‘e te pule fo‘i i nu‘u e tele, ‘ae lē pule mai i latou ‘iā te oe.
7 ‘Āfai e ‘iā te oe se tagata mativa o sou uso o i ai i se tasi o au ‘a‘ai i lou nu‘u na foa‘iina mai e le ALI‘I lou Atua ‘iā te oe, ‘aua ne‘i e fa‘ama‘a‘a atu lou loto, pe u‘u mau lou lima i lou uso mativa;
8 a ‘ia e matuā fa‘amafola atu lou lima ‘iā te ia, ma e matuā avatu lava i ai o mea ‘ia tusa ma lona mativa, ‘ua mativa ai o ia.
9 ‘Ia oe, ne‘i ai se ‘upu i lou loto leaga, o lo‘o fa‘apea ifo, “‘Ua lata mai lona fitu o tausaga, o le tausaga o le fa‘asa‘olotoga lea;” ‘ona e mataoge lea i lou uso mativa, ma e lē avatu ‘iā te ia sina mea, ‘ona vala‘au ai lea o ia i le ALI‘I ‘ona o oe, ‘ona fai ai lea ‘iā te oe ma agasala.
10 ‘E te matuā avatu lava ‘iā te ia, ‘aua fo‘i le avatu ‘iā te ia ma le tigā o lou loto; auā ‘ona o lenei mea e fa‘amanuia ai oe e le ALI‘I lou Atua i au galuega uma, ma mea uma lava e tago i ai ou lima.
11 Auā e lē aunoa ‘ona i ai i le nu‘u o le tagata mativa; o le mea lea ‘ou te fai atu ai ‘iā te oe, o lo‘o fa‘apea atu, “‘Ia e matuā fa‘amafola atu lou lima i lou uso, i le ‘ua tigāina, ma lē ‘ua mativa e ‘iā te oe i lou nu‘u.”
12 ‘Āfai e fa‘atauina mai ‘iā te oe lou uso, o se Eperu o le tane, po o se Eperu o le fafine, a ‘au‘auna o ia ‘iā te oe i tausaga e ono; a o‘o i lona fitu o tausaga ‘e te tu‘u fa‘asa‘olotoina atu o ia e oe.
13 Pe a e tu‘u fa‘asa‘olotoina atu o ia e oe, ‘aua ‘e te tu‘uina atu o ia ma le leai o sana mea;
14 a ‘ia e matuā foa‘iina atu ‘iā te ia ni au mamoe, ma ni mea mai le mea e soli ai lau saito, ma lau tu‘ugāuaina; o mea ‘ua fa‘amanuia ai oe e le ALI‘I lou Atua ‘e te foa‘iina atu ai ‘iā te ia.
15 ‘Ia e manatua fo‘i na fai oe ma ‘au‘auna i le nu‘u o Aikupito, na lavea‘iina fo‘i oe e le ALI‘I lou Atua; o le mea lea ‘ou te fai atu ai lenei mea ‘iā te oe i le aso nei.
16 Pe ‘āfai fo‘i e fai mai o ia ‘iā te oe, “‘Ou te lē alu ‘ese ‘iā te oe;” auā ‘ua alofa o ia ‘iā te oe ma lou ‘āiga, auā fo‘i ‘ua lelei ‘iā te ia ‘ina fa‘atasi ma oe:
17 ‘ona e tago lea i se au, ma tui ai lona taliga i le puipui o le faitoto‘a, ‘ona ‘avea ai lea o ia ma ‘au‘auna ‘iā te oe e fa‘avavau. E fa‘apea fo‘i ‘ona e faia i lau ‘au‘auna fafine.
18 ‘Aua ne‘i fa‘afaigatā ‘iā te oe pe a e tu‘u fa‘asa‘olotoina atu o ia e oe, auā ‘ua tusa o ia ‘iā te oe ma ni ‘au‘auna tauia se to‘alua, i lona ‘au‘auna ‘iā te oe i tausaga e ono; e fa‘amanuia fo‘i oe e le ALI‘I lou Atua i mea uma lava ‘e te faia.
19 O ulua‘i tama uma lava, o po‘a e fānau mai i au povi ma au mamoe ‘e te fa‘asāina mo le ALI‘I lou Atua; ‘aua ne‘i ai sau galuega e fai i le ulua‘i tama a lau povi, ‘aua fo‘i ‘e te seleina fulufulu o se ulua‘i tama a au mamoe.
20 ‘E te ‘ai ai i luma o le ALI‘I lou Atua i lea tausaga ma lea tausaga i le mea e filifilia e le ALI‘I, o oe ‘atoa ma lau ‘āiga.
21 ‘Āfai fo‘i o i ai se mea e ponā ai, e pipili, pe tauaso, po o se mea e ponā ‘ua leaga, ‘aua lava ‘e te faitaulaga ai i le ALI‘I lou Atua.
22 ‘E te ‘ai ai i lau ‘a‘ai; o lē ‘ua leaga ma lē ‘ua mamā la te ‘a‘ai ai, e pei o le sevi ma le ‘aila.
23 A o le toto, ‘aua ‘e te ‘ai ai; ‘e te sasa‘aina lea i le ‘ele‘ele e pei o le suāvai.#