1 ‘Aua ne‘i alu i le fa‘apotopotoga a le ALI‘I se tagata ‘ua manu‘a ‘ua momomoina ona fuāmanava, po ‘ua vavae‘eseina lona aualuma.
2 ‘Aua ne‘i alu se tama toifale i le fa‘apotopotoga a le ALI‘I; ‘aua lava ne‘i alu o ia i le fa‘apotopotoga a le ALI‘I e o‘o lava i le sefulu o augatupulaga.
3 ‘Aua ne‘i alu so sa Amorī, po so sa Moapī i le fa‘apotopotoga a le ALI‘I; e o‘o lava i le sefulu o augatupulaga, ‘aua ne‘i latou o i le fa‘apotopotoga a le ALI‘I e o‘o i le fa‘avavau;
4 auā na latou le fa‘afetaia‘i atu ‘iā te ‘outou i le ala ma ni areto ma ni vai, ‘ina o ‘outou ō mai mai Aikupito; auā fo‘i na latou fa‘a‘oloa ‘iā Palaamo le atali‘i o Peoro, nai Petoru i Mesopotamia, na te fa‘afano ‘iā te oe.
5 ‘Ae le‘i finagalo le ALI‘I lou Atua e fa‘afofoga ‘iā Palaamo; a ‘ua fa‘aliliuina e le ALI‘I lou Atua le fa‘afano e fai ma fa‘amanuia ‘iā te oe, auā na alofa mai le ALI‘I lou, Atua ‘iā te oe.
6 ‘Aua ne‘i e fai; se mea e filemū ai i latou, pe manuia ai i latou i ou aso uma lava e fa‘avavau.
7 ‘Aua ‘e te ‘ino‘ino i so sa Etomā, auā o lou uso lea; ‘aua ‘e te ‘ino‘ino i se Aikupito auā sa fai oe ma tagata ‘ese i lona nu‘u.
8 O atali‘i e fānau mai ‘iā te i latou i lona tolu o tupulaga e ō i latou i le fa‘apotopotoga a le ALI‘I.
9 Pe a ō atu ‘au e tau le tau‘a ma ē ita mai ‘iā te oe, ia oe, ne‘i e faia se mea leaga.
10 ‘Āfai o ‘iā te ‘outou se tagata e o‘o ‘iā te ia le leaga i le po, ‘ia alu ia i tua o le toagalauapi, ‘aua ne‘i toe fo‘i mai o ia i le toagalauapi
11 a o‘o i le afiafi, ‘ona tā‘ele ai lea o ia i le vai; a goto fo‘i le lā, ‘ia toe fo‘i mai o ia i le toagalauapi.
12 ‘Ia ‘iā te oe fo‘i se mea i tua o le toagalauapi, ‘e te alu atu fo‘i i ai;
13 ia ‘iā te oe fo‘i sina suō i lau ‘au‘upega; a e ui fo‘i i le vao, ‘ia e ‘eli a‘i, ‘ona e liliu lea, ma tanu lou otaota;
14 auā o lo‘o savali le ALI‘I lou Atua i totonu o lau toagalauapi, e lavea‘i ‘iā te oe, ma tu‘uina mai ē ‘ua ita ‘iā te oe i ou luma; o le mea lea e fa‘apa‘iaina, ai lau toagalauapi ne‘i silasila e ia se mea leaga o ‘iā te oe, ma liliu ‘ese o ia ‘iā te oe.
15 ‘Aua ‘e te tu‘uina atu i lona matai le ‘au‘auna ‘ua sola mai ‘iā te oe i lona matai;
16 e mau o ia ‘iā te oe, i lou nu‘u, i le mea e filifilia e ia i se tasi o au ‘a‘ai, e lelei ‘iā te ia; ‘aua ne‘i e fa‘asauā ‘iā te ia.
17 ‘Aua ne‘i ai se fafine talitane o afafine o Isaraelu; ‘aua fo‘i ne‘i ai se tane fa‘asotoma o atali‘i o Isaraelu,
18 ‘Aua ne‘i e avatu i le fale o le ALI‘I lou Atua le totogi o le fafine talitane, po o le tau o se ulī, e fai ma mea na tautō ai; auā e ‘inosia nei mea e lua e le ALI‘I lou Atua.
19 ‘Aua ne‘i e avatu i lou uso se mea e totogi fa‘asili mai ai; o le totogi fa‘asili mai i ario, po o le totogi fa‘asili mai i mea e ‘ai, po o le totogi fa‘asili mai i nisi mea uma e totogi fa‘asili mai ai;
20 ‘e te avatu mea e totogi fa‘asili mai ai i le tagata ‘ese; a o lou uso, ‘aua ‘e te avatu i ai ni mea e totogi fa‘asili mai ai; ‘ina ‘ia fa‘amanuia mai ai le ALI‘I lou Atua ‘iā te oe i mea uma lava ‘e te faia i ou lima, i le nu‘u ‘e te alu i ai e fai mou.
21 ‘Āfai ‘e te tautō i se tautoga i le ALI‘I lou Atua, ‘aua ne‘i e fa‘atuai ‘ona avatu ai; auā e matuā su‘eina atu ai ‘iā te oe e le ALI‘I lou Atua; e fai lea ma agasala ‘iā te oe.
22 ‘Ae ‘āfai ‘e te lē tautō lava, e lē se agasala lea ‘iā te oe.
23 O le ‘upu ‘ua mavae atu i lou gutu ‘ia e ‘ana‘ana i ai ma e faia, o le taulaga e loto ‘ina fai, e tusa ma lau tautoga i le ALI‘I lou Atua, ‘ua folafolaina e oe.
24 Pe a e alu i le tōvine o lē lua te tuā‘oi, ‘e te ‘ai vine faitalia oe se‘ia e mā‘ona; ‘ae ‘aua ‘e te fafao nisi i lau ‘ato.
25 Pe a e alu i le saito o lo‘o tu o lē lua te tuā‘oi, ‘e te tau mai ona fua i lou lima; ‘ae ‘aua ‘e te selesele i lau selesaito le saito o lo‘o tu o lē lua te tuā‘oi.#