Teuteronome
Le mataupu 30
O LE TUSI PA'IA - Ekalesia Katoliko Roma
O le Alofa tele i ē Salamō ma toe fo‘i i le Atua
1A o‘o fo‘i ‘iā te oe o nei mea, uma, o le manuia ma le malaia, ‘ua ‘ou tu‘uina atu i ou luma, ma e manatu i ai i nu‘u uma ‘ua tulia ai oe e le ALI‘I lou Atua,
2ma e toe fo‘i mai i le ALI‘I lou Atua, o oe ma au fānau, ma lou loto ‘atoa ma lou agaga ‘atoa; ma e fa‘alogo i lona si‘ufofoga i mea uma lava ‘ou te fai atu ai ‘iā te oe i le aso nei;
3‘ona fa‘aa‘e lea e le ALI‘I lou Atua o lau tāfeaga, ma alofa atu ‘iā te oe, ma toe fa‘apotopoto mai ‘iā te oe a‘i nu‘u uma ‘ua fa‘ata‘ape‘apeina ai oe e le ALI‘I lou Atua.
4‘Āfai e tulia ni o ‘outou i le tulu‘iga o le lagi, e fa‘apotopotoina mai ai oe e le ALI‘I lou Atua, na te ‘aumai ai oe;
5e fa‘ao‘oina mai fo‘i oe e le ALI‘I lou Atua i le nu‘u sa fai mou tamā, e fai fo‘i ia mou; na te agalelei fo‘i ‘iā te oe, ma fa‘ato‘ateleina oe ia sili i ou tamā.
6E fa‘aperitomeina fo‘i e le ALI‘I lou Atua o lou loto, ma loto o lau fānau, ‘ina ‘ia e alofa atu i le ALI‘I lou Atua ma lou loto ‘atoa, ma lou agaga ‘atoa, ‘ina ‘ia e ola ai.
7E fa‘ae‘e atu fo‘i e le ALI‘I lou Atua o na mala uma i ē ita ‘iā te oe, ma ē ‘ino‘ino ‘iā te oe, o ē fa‘asauā ‘iā te oe;
8‘e te toe fo‘i mai e fa‘alogo i le si‘ufofoga o le ALI‘I, ma e faia ana poloa‘iga uma ‘ou te fai atu ai ‘iā te oe i le aso nei.
9E fa‘ateleina fo‘i e le ALI‘I lou Atua ‘iā te oe i mea uma lava e faia i ou lima, o lau fānau, ma fānau a au manu vaefā, ma fua o lou lau‘ele‘ele, ‘ia lelei ai; auā e toe fiafia le ALI‘I ‘iā te oe ‘ina ‘ia lelei ai, e pei ‘ona ia fiafia i ou tamā;
10pe ‘āfai ‘e te fa‘alogo i le si‘ufofoga o le ALI‘I lou Atua, e tausi i ana poloa‘iga ma ana sauniga ‘ua tusia i le tusi o lenei tulafono; pe ‘āfai fo‘i ‘e te fo‘i mai i le ALI‘I lou Atua ma lou loto ‘atoa, ma lou agaga ‘atoa.
11Auā o lenei poloa‘iga ‘ou te fai atu ai ‘iā te oe i le aso nei, e lē faigatā ‘iā te oe, e lē mamao fo‘i ia.
12“E lē o i le lagi ia, ‘ina ‘ia e fa‘apea ane, o ai sē alu a‘e i le lagi mo i tatou, e ‘aumai ai ‘iā te i tatou, ‘ina ‘ia tatou fa‘alogo i ai, ma ia tatou faia?”
13E lē o i tala atu o le sami ia, ‘ina ‘ia e fa‘apea ane, “O ai se sopo‘ia atu le sami mo i tatou, e ‘aumai ai ‘iā te i tatou, ‘ina ‘ia tatou fa‘alogo i ai, ma ‘ia tatou faia?”
14‘Ae matuā lata mai lava le ‘upu ‘iā te oe, o i lou gutu, ma lou loto, ‘ina ‘ia e faia.
15Fa‘auta mai, na ‘ou tu‘uina atu i ou luma i le aso nei o le ola ma le manuia, o le oti fo‘i ma le malaia;
16i la‘u e fai atu ai ‘iā te oe i le aso nei, ‘ina ‘ia e alofa atu i le ALI‘I lou Atua, ma e savali i ona ala, ma e tausi i ana poloa‘iga, ma ana tulafono, ma ana fa‘amasinoga, ‘ina ‘ia e ola ai, ma ia fa‘ato‘ateleina ai; e fa‘amanuia fo‘i e le ALI‘I lou Atua ‘iā te oe i le nu‘u ‘e te alu i ai e fai mou.
17‘Ae ‘āfai e liliu ‘ese lou loto, ma e lē fa‘alogo, ‘ae tōsina oe, ma e ifo atu i atua ‘ese, ma ‘au‘auna i ai,
18‘ou te fa‘ailoa atu ‘iā te ‘outou i le aso nei, e matuā fa‘aumatia ‘outou, e lē nofo tulu‘i ‘outou i le lau‘ele‘ele ‘e te sopo‘ia atu ai Ioritana, ma alu i ai e fai mou.
19‘Ou te vala‘au i le lagi ma le lalolagi i le aso nei e fai ma molimau ‘iā te ‘outou, ‘ua ‘ou tu‘uina atu i ou luma o le ola ma le oti, o le manuia ma le malaia; o lenei, ‘ia e filifili i le ola, ‘ina ‘ia ola ai oe ‘atoa ma lau fānau;
20ma ‘ia e alofa atu i le ALI‘I lou Atua, ma e fa‘alogo i lona si‘ufofoga, ma ‘ia e pipi‘i atu ‘iā te ia; auā o lou ola ia, ma lē na te fa‘afualoaina ou aso; ‘ina ‘ia e mau i le lau‘ele‘ele sa tautō ai le ALI‘I i ou tamā, o Aperaamo, ma Isaako, ma Iakopo, e foa‘iina atu ‘iā te i latou.#