1 ‘Āfai e faia e tagata se fefinaua‘iga, ma latou ō mai i le fa‘amasinoga, ‘ina ‘ia fa‘amasinoina ai i latou e fa‘amasino; ‘ona latou ta‘uamiotonuina atu lea lē ‘ua amiotonu, ‘ae fa‘asalaina lē ‘ua amioleaga.
2 ‘Āfai fo‘i e tatau ‘ona sasaina o lē ‘ua amioleaga, ‘ona fai atu lea e le fa‘amasino e fa‘ata‘atia ‘iā te ia, ma sasaina o ia i ona luma, ‘ia fa‘atatau le faitau o ona ta i lana amio leaga.
3 A fagafulu ona ta, sōia ‘ae ‘aua ne‘i fa‘asili a‘i; ne‘i fa‘aopoopo o ia i ai, ma ta ‘iā te ia i ni ta e tele, ‘ona ‘inosia ai lea o lou uso i ou luma.
4 ‘Aua ne‘i e fusi le gutu o le povi a o solisolia e ia le saito.
5 ‘Āfai e mau fa‘atasi le uso, a oti se tasi o i lā‘ua, e leai sana fānau, ‘aua ne‘i nofo tane le avā a lē ‘ua oti i se tasi tagata ‘ese; a ‘ia alu i ai le uso o lana tane, ‘ia fai māna avā, ma tausi tama ‘iā te ia.
6 ‘Ona avatu ai lea o le igoa o lona uso, ‘ua oti i le tama ulumatua e fānau mai ‘iā te ia, ‘ina ne‘i sōloia lona igoa ‘iā Isaraelu.
7 ‘Āfai fo‘i e le loto lea tagata, e fai māna le avā a lona uso, ‘ona alu a‘e ai lea o le avā a lona uso i toeaina i le faitoto‘a o le ‘a‘ai, ma fai atu, “E lē mafai le uso o la‘u tane ‘ona fa‘atumau mo lona uso se igoa ‘iā Isaraelu, e lē fia tausi tama mai o ia ‘iā te a‘u.”
8 ‘Ona ‘a‘ami lea ‘iā te ia e toeaina o lona ‘a‘ai, ‘ona tautala lea o i latou ‘iā te ia; ‘āfai fo‘i e tu mai o ia, ma fai mai, “‘Ou te lē fia fai avā ‘iā te ia;”
9 ‘ona sōsō atu lea o le avā a lona uso ‘iā te ia i luma o toeaina, ma tō ‘ese lona se‘evae a‘i lona vae, ma feanu i ona luma, ma fai ane, e fa‘apea, “E fa‘apenā lava ‘ona fai i le tagata na te lē mafaia ‘ona ati a‘e le ‘āiga o lona uso.”
10 ‘Ona ta‘ua lea o lona igoa i Isaraelu, “o le ‘āiga o lē ‘ua tō‘eseina lona se‘evae.”
11 A femisa‘i tagata, o lea tagata ma lea tagata, ‘ona sōsō atu lea o le avā a le tasi na te lavea‘iina lana tane a‘i le lima o lē na te fasi ‘iā te ia, ‘ona tago atu lea o lona lima, ma papalu ‘iā te ia;
12 ‘ona e tutū ‘ese lava lea o lona tapulima, ‘aua ‘e te alofa ‘iā te ia.
13 ‘Aua ne‘i ‘iā te oe i lau taga o ma‘a ‘ese‘ese e fua ai, o le latele ma lē la‘itiiti.
14 ‘Aua ne‘i ‘iā te oe i lou fale o efa ‘ese‘ese, o lē latele ma lē la‘itiiti.
15 A ‘ia ‘iā te oe le ma‘a fua ‘ato‘atoa ma le tonu, ‘ia ‘iā te oe fo‘i o le efa ‘ato‘atoa ma le tonu; ‘ina ‘ia fa‘afualoa ai ou aso i le lau‘ele‘ele ‘ua foa‘iina mai e le ALI‘I lou Atua ‘iā te oe.
16 Auā e ‘inosia e le ALI‘I lou Atua o i latou uma o ē faia ia mea, e ta‘itasi uma o ē faia le amioletonu.
17 ‘Ia e manatua le mea na faia e Amaleka ‘iā te oe i le ala, ‘ina ‘ua ‘outou ō mai nai Aikupito;
18 ‘ina ‘ua fa‘afetaia‘i mai o ia ‘iā te oe i le ala, ma ‘ua na fafasi i ou tagata na mulimuli, o ē na vaivai uma na mulimuli atu ‘iā te oe, a o lailoa ma le lavā; e le‘i mata‘u fo‘i o ia i le Atua.
19 Pe a o‘o fo‘i ‘ina avatu e le ALI‘I lou Atua o le mālōlōga ‘iā te oe i ē ita ‘iā te oe uma lava o ē vagavagai ‘iā te oe, i le nu‘u ‘ua foa‘iina mai e le ALI‘I lou Atua ‘iā te oe e fai mou tofi, ‘ia fai mou lava, ‘ia e sōloi‘esea le fa‘amanatuga o Amaleka a‘i le lalolagi; ‘aua ne‘i galo ‘iā te oe.#