1 ‘Ua alu a‘e fo‘i Mose nai le ‘ele‘ele laugatasi o Moapi i le mauga o Nepo, i le tumutumu o Peseka, e fesagai ma Ieriko. ‘Ona fa‘asino atu lea e le ALI‘I ‘iā te ia le nu‘u uma lava o Kiliata e o‘o lava i Tanu.
2 o Nafatali uma fo‘i, ma le nu‘u o Efaraima, ma Manase, ma le nu‘u uma o Iuta, e o‘o atu lava i le sami tupito,
3 ma le itū i saute, ma le ‘ele‘ele laugatasi o le vanu o Ieriko, o le ‘a‘ai o la‘au o pama, e o‘o atu i Soara.
4 ‘Ua fetalai mai fo‘i le ALI‘I ‘iā te ia, “O le nu‘u lenā na ‘ou tautō ai ‘iā Aperaamo, ma Isaako, ma Iakopo, ‘ua fa‘apea atu, ‘‘Ou te foa‘iina atu i lau fānau;’ ‘ua ‘ou fa‘aali atu ai ‘iā te oe i ou mata, a ‘e te lē sopo‘ia atu i ai.”
5 ‘Ua oti fo‘i Mose le ‘au‘auna a le ALI‘I i lea mea i le nu‘u o Moapi, e pei ‘ona fetalai mai ai o le ALI‘I.
6 ‘Ua ia tanu fo‘i ‘iā te ia i le vanu i le nu‘u o Moapi, e fa‘afeagai ma Petepeora; ‘ae lē iloa e se tagata lona tu‘ugamau ‘ua o‘o mai lava i le aso nei.
7 ‘Ua oti fo‘i Mose ‘ina ‘ua selau ma le lua sefulu ona tausaga; e le‘i puaoa ona mata, e le‘i mavae fo‘i lona malosi.
8 ‘Ua fētāgisi fo‘i le fānauga a Isaraelu ‘iā Mose i le ‘ele‘ele laugatasi o Moapi i aso e tolu sefulu; ‘ona ‘ato‘atoa ai lea o aso na fētāgisi ma fa‘anoanoa ai ‘iā Mose.
9 ‘Ua tumu fo‘i Iosua le atali‘i o Nuno i le agaga e poto ai; auā na fa‘ae‘e atu e Mose ona lima i luga ‘iā te ia; na fa‘alogo fo‘i le fānauga a Isaraelu ‘iā te ia, ma ‘ua latou faia e pei ‘ona poloa‘i mai ai o le ALI‘I ‘iā Mose.
10 ‘Ua lē toe tu mai se perofeta ‘iā Isaraelu e pei o Mose, sa la fesagai ma le ALI‘I;
11 e pei o ia i fa‘ailoga uma ma vāvega, sa ‘auina atu ai o ia e le ALI‘I e fai i le nu‘u o Aikupito ‘iā Farao ma ana ‘au‘auna uma, ‘atoa ma lona nu‘u uma lava,
12 ma le ‘a‘ao malosi uma, ‘atoa ma mea matuā mata‘utia uma na faia e Mose i luma o Isaraelu uma lava.#