1 ‘Ia e tausia le masina o Apipa, ‘ia e fai ai le paseka i le ALI‘I lou Atua; auā o le masina o Apipa na ‘aumai ai oe e le ALI‘I lou Atua i le po nai Aikupito.
2 ‘Ia e fasia le paseka i le ALI‘I lou Atua, o mamoe ma povi, i le mea e filifilia e le ALI‘I e tu‘u ai lona suafa.
3 ‘Aua ‘e te ‘ai ai fa‘atasi ma areto e fa‘afefeteina; o aso e fitu ‘e te ‘ai ai fa‘atasi ma areto e lē fa‘afefeteina, o le areto o le tigā; auā na fa‘ata‘alise ‘ona e sau nai le nu‘u o Aikupito; ‘ina ‘ia e manatua le aso na e sau ai nai le nu‘u o Aikupito i aso uma o lou olaga.
4 ‘Aua fo‘i ne‘i iloa ‘iā te oe sina mea e fa‘afefeteina i lou nu‘u uma lava i ona aso e fitu; ‘aua fo‘i ne‘i fa‘atotoe e o‘o i le taeao sina tufa‘aga o mea na e fai taulaga ai i le afiafi o le aso muamua.
5 E lē mafai ‘ona e fasia le paseka i se tasi o au ‘a‘ai ‘ua foa‘iina mai e le ALI‘I lou Atua ‘iā te oe;
6 tau lava o le mea e filifilia e le ALI‘I lou Atua e tu‘u ai lona suafa, o le mea lea ‘e te fasi ai le paseka i le afiafi, i le goto o le la, i ona po na e sau ai nai Aikupito.
7 ‘Ia e tunu fo‘i, ma e ‘ai ai i le mea e filifilia e le ALI‘I lou Atua; a o‘o i le taeao ‘ona e liliu lea, ma alu atu, i ou fale ‘ie.
8 O aso e ono ‘e te ‘ai ai areto e lē fa‘afefeteina; a o le aso fitu e fai ai le fa‘apotopotoga i le ALI‘I lou Atua; ‘aua ‘e te faia ni galuega.
9 ‘Ia e faitauina ni vaiasosa e fitu; e āfua ‘ona e faitau o nā vaiasosa e fitu ‘ina ‘ua fa‘ato‘ā tu‘u atu le selesaito i le saito o tu.
10 ‘Ona e fai ai lea o le tausamiga o vaiasosa i le ALI‘I lou Atua, o le taulaga ‘e te loto ‘ina fai, ‘e te avatua, e pei ‘ona fa‘amanuia oe e le ALI‘I lou Atua;
11 ‘e te ‘oli‘oli fo‘i i luma o le ALI‘I lou Atua, i le mea e filifilia e le ALI‘I lou Atua e tu‘u ai lona suafa, o oe, ma lou atali‘i, ma lou afafine, ma lau ‘au‘auna tane, ma lau ‘au‘auna fafine, ma le sa Levī o i lau ‘a‘ai, o le tagata ‘ese fo‘i, ma lē ‘ua aumatuā, ma le fafine ‘ua oti lana tane, o ‘iā te oe.
12 ‘Ia e manatua fo‘i na fai oe ma ‘au‘auna i Aikupito; ‘ia e ‘ana‘ana fo‘i e fai nei tulafono.
13 ‘Ia e fai le tausamiga o fale apitaga i ona aso e fitu, pe a uma ‘ona fa‘aputuina o au saito ma lau uaina;
14 ‘e te ‘oli‘oli fo‘i i lau tausamiga, o oe, ma lou atali‘i, ma lou afafine, ma lau ‘au‘auna tane, ma lau ‘au‘auna fafine, ma le sa Levī, ma le tagata ‘ese, ma lē ‘ua aumatuā, ma le fafine ‘ua oti lana tane o i lau ‘a‘ai.
15 O aso e fitu ‘e te fai ai le tausamiga i le ALI‘I lou Atua i le mea e filifilia e le ALI‘I; auā e fa‘amanuia oe e le ALI‘I lou Atua i au mea uma ‘ae maua mai, ma mea uma e faia i ou lima, ‘e te ‘oli‘oli ai lava.
16 E ta‘i atu tolu i le tausaga ‘ona iloa o tane uma lava o ‘iā te oe i luma o le ALI‘I lou Atua i le mea e filifilia e ia; o le tausamiga o areto e lē fa‘afefeteina, ma le tausamiga o vaiasosa, i le ma le tausamiga o fale apitaga; ‘aua fo‘i ne‘i iloa se isi i luma o le ALI‘I ‘ua leai sana mea.
17 E ta‘itasi le tagata e tusa ma mea ‘ua ‘iā te ia, e tusa ma le manuia ‘ua foa‘iina mai e le ALI‘I lou Atua ‘iā te oe.
18 ‘Ia e tofia mo oe nisi e fai ma fa‘amasino ma faipule i au ‘a‘ai uma, ‘ua foa‘iina mai e le ALI‘I lou Atua ‘iā te oe, i ou itū‘āiga; latou te fa‘amasino fo‘i i le nu‘u ma le fa‘amasinoga tonu.
19 ‘Aua ‘e te fa‘api‘oina le fa‘amasinoga; ‘aua ‘e te fa‘ailogaina se tasi, ‘aua fo‘i ‘e te talia se mea alofa; auā o le mea alofa e fa‘atauaso a‘i mata o ē popoto, e fa‘asesēina ai fo‘i o ‘upu a ē amiotonu.
20 ‘Ia e tausisi lava i le mea e matuā tonu, ‘ina ‘ia e ola ai, ma e fai mou le nu‘u ‘ua foa‘iina mai e le ALI‘I le Atua ‘iā te oe.
21 ‘Aua ‘e te fa‘atūina se tupua o Asaira, so o se tasi la‘au e lata ane i le fatafaitaulaga a le ALI‘I lou Atua, ‘e te faia mo oe.
22 ‘Aua fo‘i ‘e te fa‘atūina mo oe se tupua, o le mea e ‘inosia e le ALI‘I lou Atua.#