1 O tulafono ia ma fa‘amasinoga tou te tausiusi i ai ‘ia faia i le nu‘u o le a foa‘iina mai ‘iā te oe e le ALI‘I le Atua o ou tamā, ‘ina ‘ia fai mo ‘outou, i aso uma tou te ola ai i le fogā‘ele‘ele.
2 ‘Ia ‘outou matuā fa‘aumatia mea uma lava na ‘au‘auna a‘i i o latou atua o nu‘u o le a fai mo ‘outou, i luga i mauga maualuluga ma mauga iti, o i lalo ifo fo‘i o la‘au lauolaola uma.
3 ‘Ia ‘outou sofaia o latou fatafaitaulaga, ‘ia ‘outou nutipalaina fo‘i o latou tupua, ma susunu i le afi o latou tupua o Asaira; ‘ia ‘outou vavae i lalo fo‘i o tupua ‘ua ta o latou atua, ‘ia ‘outou tineia fo‘i o latou igoa a‘i lea lava mea.
4 ‘Aua lava tou te fa‘apea ‘ona fai i le ALI‘I lo ‘outou Atua.
5 A o le mea e filifilia e le ALI‘I lo ‘outou Atua a‘i o ‘outou itū‘āiga uma lava e tu‘u ai lona suafa, o lona afio‘aga lava ‘ia ‘outou sā‘ili‘ili i ai ma e alu atu i ai.
6 ‘Ia ‘outou ‘ave i ai a ‘outou taulaga mū, ma a ‘outou taulaga, ma le mea e sefulua‘i a ‘outou mea, ma taulaga si‘i a o ‘outou lima, ma mea ‘Ua ‘outou tautō ai, ma a ‘outou taulaga tou te loto ‘ina fai, ‘atoa ma ulua‘i tama a ‘outou povi ma a ‘outou mamoe.
7 Tou te ‘a‘ai ai i lea mea i luma o le ALI‘I lo ‘outou Atua, tou te ‘oli‘oli fo‘i i mea uma lava e faia i o ‘outou lima, o ‘outou ‘atoa ma o ‘outou ‘āiga, o mea ‘ua fa‘amanuia ai oe e le ALI‘I lou Atua.
8 Tou te lē faia e pei o mea uma ‘ua faia e i tatou ‘i‘inei i le aso nei, o lo‘o ta‘itasi le tagata ma fai mea uma ‘ua tonu i lona manatu.
9 Auā o ona po nei ‘ua le‘i o‘o lava ‘outou i le mālōlōga ma le tofi ‘ua foa‘iina ‘iā te ‘outou e le ALI‘I lo ‘outou Atua.
10 A ‘outou sopo‘ia atu Ioritana, ma ‘outou nonofo i le nu‘u ‘ua foa‘iina mai e le ALI‘I lo ‘outou Atua e fai mo ‘outou tofi; na te avatua fo‘i le mapusaga ‘iā te ‘outou a‘i o ‘outou fili uma lava i itū uma, na ‘outou nonofo ai ma le filemū.
11 O le mea fo‘i e filifilia e le ALI‘I lo ‘outou Atua e tu‘u ai lona suafa, o le mea lea tou te ‘ave i ai mea uma lava ‘ou te fai atu ai ‘iā te ‘outou; o a ‘outou taulaga mū, ma a ‘outou taulaga, ma mea e sefulua‘i a ‘outou mea, ma taulaga si‘i a o ‘outou lima, ma mea uma e sili ‘ua ‘outou tautō ai, ‘ua ‘outou tautō ai i le ALI‘I;
12 tou te ‘oli‘oli fo‘i i luma o le ALI‘I lo ‘outou Atua, o ‘outou ma o ‘outou atali‘i, ma o ‘outou afafine, ma a ‘outou ‘au‘auna tane, ma a ‘outou ‘au‘auna fafine, ma le sa Levī o ‘iā ‘outou ‘a‘ai, auā e leai sona fanua po o sona tofi fa‘atasi ma ‘outou.
13 ‘Ia oe, ne‘i e fai au taulaga mū i mea uma ‘e te va‘ai i ai;
14 ‘ae tau lava o le mea e filifilia e le ALI‘I i se tasi o ‘outou itū‘āiga, ‘e te fai ai au taulaga mū, ‘e te fai ai fo‘i mea uma lava ‘ou te fai atu ai ‘iā te oe.
15 ‘Ae peita‘i o mea uma ‘e te mana‘o i ai, ‘ia e fasia, ma e ‘ai i manu, e tusa ma le manuia mai le ALI‘I lou Atua ‘ua ia foa‘iina mai ‘iā te oe i au ‘a‘ai uma; o lē ‘ua leaga ma lē ‘ua mamā la te ‘a‘ai ai, e pei ‘ona ‘aina o le sevi ma le ‘aila.
16 A o le toto, ‘aua tou te ‘a‘ai ai; tou te sasa‘aina lea i le ‘ele‘ele e pei o le suāvai.
17 ‘E te lē ‘ai lava i au ‘a‘ai o mea e sefulua‘i lau saito, ma lau uaina, ma lau suāu‘u, po o ulua‘i tama a au povi, ma au mamoe, ma au mea uma ‘ua e tautō ai, ‘ua e tautō ai lava, ma au taulaga ‘e te loto ‘ina fai, ma taulaga si‘i a lou lima;
18 auā o mea na ‘e te ‘ai ai i luma o le ALI‘I lou Atua i le mea e filifilia e le ALI‘I lou Atua, o oe, ma lou atali‘i, ma lou afafine, ma lau ‘au‘auna tane, ma lau ‘au‘auna fafine, ma le sa Levī o i lau ‘a‘ai; ‘e te ‘oli‘oli fo‘i i luma o le ALI‘I lou Atua, i mea uma lava ‘e te faia i ou lima.
19 ‘Ia oe, ne‘i e tu‘ulafoa‘i le sa Levī i ou aso uma ‘e te mau ai i lou fanua.
20 A fa‘alauteleina e le ALI‘I lou Atua lou lau‘ele‘ele, e fa‘apei ‘ona ia fetalai mai ‘iā te oe, ma e fai ane, “‘Ou te ‘ai manu;” auā e mana‘o lou loto e ‘ai manu; ‘ona e ‘ai ai lea i manu, i mea uma e mana‘o i ai lou loto.
21 A vāvā mamao ma oe le mea ‘ua filifilia e le ALI‘I lou Atua e tu‘u ai lona suafa, ‘ona e fasi ai lea ni au povi ma ni au mamoe, ‘ua foa‘iina mai e le ALI‘I lou Atua ‘iā te oe, e fa‘apei ‘ona ‘ou fai atu ai ‘iā te oe, ‘e te ‘ai fo‘i i au ‘a‘ai i mea uma e mana‘o i ai lou loto.
22 E pei ‘ona ‘aina o le sevi ma le ‘aila, e fa‘apea ‘ona e ‘ai ai o na mea; o lē ‘ua leaga ‘atoa ma lē ‘ua mamā la te ‘a‘ai ai.
23 A o le toto, ‘aua lava ‘e te ‘ai ai; auā o le toto o le ola lava lea; ‘aua ‘e te ‘ai le ola fa‘atasi ma le tino.
24 ‘Aua ‘e te ‘ai ai; ‘e te sasa‘aina lea i le ‘ele‘ele e pei o le suāvai.
25 ‘E te lē ‘ai ai lava; ‘ina ‘ia manuia ai oe ma au fānau pe a mavae atu oe, pe a e faia le mea tonu i luma o le ALI‘I.
26 A o au mea pa‘ia o ‘iā te oe, ma au mea ‘ua e tautō ai, ‘ia e ‘ave, ma e alu i le mea e filifilia e le ALI‘I.
27 ‘Ia e osia au taulaga mū, o tufa‘aga ma le toto, i luga o le fatafaitaulaga o le ALI‘I lou Atua; o le toto fo‘i o au taulaga ia e sasa‘a i luga o le fatafaitaulaga o le ALI‘I lou Atua, a o tufa‘aga ‘e te ‘ai ai.
28 ‘Ia e ‘ana‘ana mai, ma e fa‘alogo mai i nei ‘upu uma ‘ou te fai atu ai ‘iā te oe, ‘ina ‘ia manuia ai oe ma au fānau pe a mavae atu oe, e o‘o i le fa‘avavau, pe a e faia le mea lelei ma le tonu i luma o le ALI‘I lou Atua.
29 A fa‘aumatia i ou luma e le ALI‘I lou Atua o ia nu‘u ‘e te alu i ai e fai mou, ‘ae fai mou lava, ma e nofo i o latou nu‘u;
30 ‘ia oe, ne‘i maileia oe i lou mulimuli atu ‘iā te i latou, pe a fa‘aumatia i latou i ou luma; ‘aua fo‘i ne‘i e sā‘ili atu i o latou atua, o lo‘o fa‘apea ane, “Pe fa‘apefea ‘ona ‘au‘auna nu‘u nei i o latou atua? ‘Ou te faia fa‘apea lava e a‘u.”
31 ‘Aua lava ne‘i e faia fa‘apea i le ALI‘I lou Atua; auā o mea uma e ‘inosia e le ALI‘I, o lo‘o ‘inosia lava e ia, ‘ua latou faia i o latou atua, auā ‘ua latou susunu i le afi o latou atali‘i ma o latou afafine e fai ma taulaga i o latou atua.
32 O mea uma lava ‘ou te fai atu ai ‘iā te ‘outou, ‘ia ‘outou tausiusi i ai e fai, ‘aua ne‘i e fa‘aopoopo i ai se mea, ‘aua fo‘i ne‘i e ‘ave ‘ese ai se mea.#