1 A fai e tu mai ‘iā te oe se perofeta, po o se faimiti na te tu‘u atu fo‘i ‘iā te oe se fa‘ailoga po o se vāvega,
2 a taunu‘u fo‘i lea fa‘ailoga po o lea vāvega, na ia fai atu ai ‘iā te oe, o lo‘o fa‘apea, “‘Inā tatou mulimuli atu ia i atua ‘ese,” (o ē na ‘outou lē iloa,) “ma ‘ia tatou ‘au‘auna i ai;”
3 ‘aua ne‘i e fa‘alogo i ‘upu a lea perofeta, po o lenā faimiti; auā e tofotofoina ai ‘outou e le ALI‘I lo ‘outou Atua, ‘ina ‘ia silafia pe tou te alofa atu i le ALI‘I lo ‘outou Atua ma o ‘outou loto ‘atoa ma o ‘outou agaga ‘atoa.
4 Tou te mulimuli atu i le ALI‘I lo ‘outou Atua, ma ‘outou matata‘u ‘iā te ia, ma tausiusi i ana poloa‘iga, tou te fa‘alogo fo‘i i lona si‘ufofoga, ma ‘outou ‘au‘auna ‘iā te ia, ma pipi‘i atu ‘iā te ia.
5 A o lenā perofeta, po o lenā faimiti, e fasiotia o ia; auā ‘ua ia tautala ‘ia te‘a ‘ese ‘outou i le ALI‘I lo ‘outou Atua, o lē na ‘aumaia ‘outou ai le nu‘u o Aikupito, ma na lavea‘iina oe ai le mea sa nofo pologa ai, ‘ina ‘ia tuleia ai oe nai le ala na fetalai mai ai le ALI‘I lou Atua ‘ia e savali i ai. ‘Ona e tu‘u‘eseina ai lea o le leaga ‘iā te oe.
6 ‘Āfai e fa‘aoso lemū ‘iā te oe lou uso, le tama a lou tinā, po o lou atali‘i, po o lou afafine, po o lau avā pele, po o lau uō e pele ‘iā te oe, o lo‘o fa‘apea mai, “‘Inā tatou ō ia, ma ‘au‘auna i atua ‘ese,” na e lē iloa, o oe, ma ou tamā;
7 o atua o nu‘u e vagavagai ai ‘outou, po o ē felāta‘i ma oe po o ē vāvā mamao ma oe, e gata mai i le tasi itū lalolagi e o‘o atu i le tasi itū lalolagi;