1 Ba kileng ba ya ho Davida a le Tsiklage, ha a ne a ntse a ipatela Saule, mora Kishe, ke bana: le bona ba ne ba balwa le dinatla tse neng di mo tlatsa ntweng;
2 e ne e le ba fulang ka diqha; ba ne ba betsa majwe ka letsoho le letona le ka letsoho le letshehadi, mme ba ne ba fula metsu ka diqha; e ne e le ba habo Saule, Babenjamine.
3 E moholo ho bona ke Akiesere, e mong ke Joase, bara ba Shemaa wa Gibea; Jesiele, le Pelethe, bara ba Asmavethe, le Beraka, le Jehu wa Anathothe,
4 le Jishmaia wa Gibeone, senatla se seholo hara ba mashome a mararo, e le motsamaisi wa ba mashome a mararo, le Jeremia, le Jahasiele, le Johanane, le Josabade wa Gedera;
5 Elusai, Jerimothe, Bealia, Shemaria, le Shefathia wa Harufe,
6 le Elkana, le Jishia, le Asareele, le Joesere, le Jashobeame, Bakore,
7 le Joela, le Sebadia, bara ba Jerohame wa Gedore.
8 Ho Bagade ha tloha bahale ba tshwanelang ntwa ho ya e lwana, ba hlometseng thebe le lerumo; mahlo a bona a ne a tshwana le a ditau, ka lebelo ba ne ba le jwaloka matsa dithabeng; ba ne ba tlile ho Davida, ha a le seqhobong:
9 Esere ke wa pele ho bona; wa bobedi ke Obadia, wa boraro ke Eliabe;
10 wa bone ke Mishmanna, wa bohlano ke Jeremia;
11 wa botshelela ke Attai, wa bosupa ke Eliele;
12 wa boroba meno e le mmedi ke Johanane, wa boroba mono o le mong ke Elsabade;
13 wa leshome ke Jeremia, wa leshome le motso o mong ke Makbannai.
14 E ne e le ba bara ba Gade, balaodi ba makgotla; a le mong ho bona, esita le e monyenyane, o ne a lekana le banna ba lekgolo; e moholo o ne a lekana le ba sekete.
15 Ba ne ba tshele Jordane kgweding ya ho qala, mohla e kwahetseng mabopo a yona kaofela, mme ba leleka batho bohle ba dikgohlong ka nqa botjhabela le ka nqa bophirimela.
16 Ho bara ba Benjamine le ba Juda, ha tla ba bang, ba fihla ho Davida seqhobong.
17 Davida a ya ba kgahlanyetsa, a bua, a re ho bona: Ha ekaba le tlile ho nna ka kgotso ho ntlatsa, le nna pelo ya ka e tla kopana le lona; ha le mpa le tlile ho nkeka hore le nneele direng tsa ka, leha ho mpa ho se bokgopo matsohong a ka, Modimo wa bontata rona o ke o bone, mme o re ahlolele.
18 Yaba moya o tshwara Amasai, molaodi wa dinatla, a re: Re ba hao, Davida; re a o emela, mora Jese! Kgotso, kgotso e be le wena, kgotso e be ho ba o tlatsang, etswe Modimo wa hao o o thusa! Yaba Davida o a ba amohela, a ba bea balaodi ba makgotla.
19 Ho Bamanasse, ba bang ba theohela ho Davida, mohla a futuhelang Saule, a ena le Bafilesta; empa ha ba ka ba ba tlatsa; eitse hobane marena a Bafilesta a eletsane, a mo kgutlisa, a re: A ka fetela ho Saule, hlooho tsa rona tsa kena tsietsing.
20 Le mohla a yang Tsiklage, Bamanasse ba ileng ba fetela ho yena ke bana: ke Adna, Josabade, Jediaele, Mikaele, Josabade, Elihu, le Tsilthai, balaodi ba dikete tsa Manasse.
21 Ba tlatsa Davida ho lwantsha Baamaleke, etswe kaofela ha bona e ne e le bahale; mme ba bewa balaodi ba makgotla.
22 Ka matsatsi wohle, ha nna ha fihla batho ho Davida ho mo tlatsa, ho fihlela ba ba ba etsa sera se seholo, se kang sera sa Modimo.
23 Haele banna ba hlomeletseng ntwa, ba neng ba tle ho Davida, Hebrone, ho fetisetsa borena ba Saule ho yena, ka taelo ya Jehova, palo ya bona ka dihlooho tsa bona ke ena:
24 Bana ba Juda, ba hlometseng thebe le lerumo, ba tla ba entse dikete tse tseletseng tse nang le makgolo a robileng meno e le mmedi, ba hlomeletseng ntwa.
25 Bana ba Simeone, e leng bahale ntweng, ba tla ba entse kete tse supileng tse nang le lekgolo le le leng.
26 Bana ba Levi ba tla ba le dikete tse nne tse nang le makgolo a tsheletseng.
27 Hape, ha tla Jehojada, motsamaisi wa bana ba Aarone, a ena le batho ba kete tse tharo tse nang le makgolo a supileng.
28 Ha tla le Tsadoke, mohlankana wa mohale, a ena le ba ntlo ya ntatae, e le mahosana a mashome a mabedi a metso e mmedi.
29 Ho bana ba Benjamine, banababo Saule, ha tla dikete tse tharo; athe ho fihla moo, ba bangata hara bona ba ne ba ntse ba kgomaretse ntlo ya Saule.
30 Bana ba Efraime ba tla ba le dikete tse mashome a mabedi tse nang le makgolo a robileng meno e le mmedi, e le bahale, banna ba tumileng matlung a bontata bona.
31 Ho ba mothapo o mong wa leloko la Manasse, ha tla ba dikete tse leshome le metso e robileng meno e le mmedi, e leng ba thontsweng ka mabitso ho ya bea Davida morena.
32 Ho bana ba Issaskare, ba neng ba ithutile ho kgetha dinako ho tseba seo Baiseraele ba tshwanetseng ho se etsa, ha tla mahosana a bona a makgolo a mabedi, hammoho le banababo wona kaofela ba leng taolong ya wona.
33 Ho Basabulone, ha tla ba dikete tse mashome a mahlano, ba tsebang ho futuha, ba hlometseng dibetsa tsohle tsa ntwa, ba tsebang ho ema ka makgotla, ba se nang pelo tse pedi.
34 Ho Banefthali, ha tla mahosana a sekete, a tlisitse banna ba dikete tse mashome a mararo a metso e supileng, ba hlometseng thebe le lerumo.
35 Ho Badane, ha tla ba dikete tse mashome a mabedi a metso e robileng meno e le mmedi tse nang le makgolo a tsheletseng, ba hlomeletseng ntwa.
36 Ho Baasere, ha tla ba dikete tse mashome a mane, ba lemaletseng ho futuha, ba tsebang ntwa.
37 Ho ba mose ho Jordane, e leng Barubene le Bagade le ba mothapo o mong wa leloko la Manasse, ha tla ba dikete tse lekgolo le nang le mashome a mabedi, ba hlometse dibetsa tsohle tsa ntwa.
38 Bao kaofela, e leng banna ba ntwa, ba tsebang ho ema ka ho itlhopholla, ba tla Hebrone ka pelo tse phethehileng, ho bea Davida morena wa Baiseraele bohle; le Baiseraele ba bang bohle ba ne ba le pelo e le nngwe ho bea Davida morena.
39 Ba dula teng ho Davida matsatsi a mararo, ba ntse ba eja, ba enwa; hobane banababo bona ba ne ba ba lokiseditse tsohle.
40 Esita le ba neng ba le haufi, jwaloka Baissaskare, le Basabulone, le Banefthali, ba tlisa dijo, ba di belesitse diesele, le dikamele, le dimulete, le dipholo, e le mahobe, le diphofo, le dinkgwa tsa difeiye tse omeletseng le tsa merara e omeletseng, le veine, le ole, le dikgomo le dinku tse ngata; hobane ho ne ho thabilwe ke Baiseraele.