1 Haele balebedi ba menyako, kamoo ba ileng ba etswa dihlopha kateng ho Bakore, e ne e le Meshelemia, mora Kore, wa bara ba Asafe.
2 Bara ba Meshelemia, letsibolo ke Sakaria, wa bobedi Jediale, wa boraro Sebadia, wa bone Jathniele;
3 wa bohlano Elame, wa botshelela Johanane, wa bosupa Elioenai.
4 Haele bara ba Obed-Edomo, letsibolo la hae ke Shemaia, wa bobedi Josabade, wa boraro Jowa, wa bone Sakare, wa bohlano Nethaneele;
5 wa botshelela Ammiele, wa bosupa Issaskare, wa boroba meno e le mmedi Peulthai; etswe Modimo o ne o mo hlohonolofaditse.
6 Haele mora hae Shemaia, a tswallwa bara bao e bileng ba busang tlung ya ntata bona; hobane e ne e le banna ba matla.
7 Bara ba Shemaia ke Othni, Refaele, Obede, Elsabade, le banababo bona Elihu, le Semakia, banna ba matla.
8 Bao kaofela e ne e le bara ba Obed-Edomo; bona, le bara ba bona, le banababo bona e ne e le bahale, banna ba dinatla tshebetsong; ba Obed-Edomo ba ne ba le mashome a tsheletseng a metso e mmedi.
9 Meshelemia yena o ne a na le bara le banababo, banna ba matla, ba le leshome le metso e robileng meno e le mmedi.
10 Hosa, wa bara ba Merari, o ne a na le bara; hlooho ke Simri, leha empa e ne e se yena letsibolo, a mpa a beilwe hlooho ke ntatae;
11 wa bobedi ke Hilkia, wa boraro ke Thebalia, wa bone ke Sakaria, bara bohle ba Hosa le banababo ba ne ba le leshome le metso e meraro.
12 Dihlopha tseo tsa balebedi ba menyako, ka ho ya ka dihlooho tsa bona, tshebetso ya bona e ne e le ho lebela ntlo ya Jehova hammoho le banababo bona.
13 Ba laolelwa monyako o mong le o mong ka lotho, ho qala ka e monyenyane ho isa ho e moholo, ka ho ya ka matlo a bontata bona.
14 Lotho ya ntsha Shelemia ho ya monyakong o ka nqa botjhabela; mora hae, Sakaria, monna wa lekgotla, ya hlalefileng, a laolelwa ka lotho ka nqa leboya.
15 Obed-Edomo yena a laolelwa ka nqa borwa; bara ba hae bona ba laolelwa matlo a ho bolokela dintho.
16 Shuppime le Hosa ba newa ka nqa bophirimela, hammoho le monyako wa Shallekethe, moepeng; balebedi ba bang ba ne ba le malokana le ba bang.
17 Ka nqa botjhabela, ho ne ho beilwe Balevi ba tsheletseng, ka nqa leboya ba le bane ka letsatsi le leng le le leng, ka nqa borwa ba le bane ka letsatsi, ba le babedi hape tlung e nngwe le e nngwe ya ho bolokela;
18 Parbare, ka nqa bophirimela, ha bewa ba bane pela mmila, ba le babedi hape Parbare.
19 Ke tsona dihlopha tsa balebedi ba menyako ho bara ba Bakore le ho bara ba Merari.
20 Ho Balevi, Akija a bewa molebedi wa matlotlo a ntlo ya Modimo le wa matlotlo a ntho tse halalelang.
21 Haele bara ba Laedane, e leng bara ba Bagershone ka Laedane, bao e neng e le dihlooho tsa matlo a bontata Laedane Mogershone,
22 ha nkwa Jehieli; bara ba Jehieli ke Sethame, le Joele ngwanabo, bao e neng e le balebedi ba matlotlo a ntlo ya Jehova.
23 Ho Baamrame, le Batjitsehare, le Bahebrone le Bausiele,
24 Shebuele, mora Gershome, mora Moshe, e ne e le molebedi wa matlotlo.
25 Bao e neng e le banababo ka Eliesere, e ne e le mora hae Rehabia, le mora hae Esaia, le mora hae Jorame, le mora hae Sikri, le mora hae Shelomithe.
26 Shelomithe eo le banababo ba bewa balebedi ba matlotlo wohle a dintho tse halalelang tseo morena Davida, le dihlooho tsa matlo, le balaodi ba dikete le ba makgolo, le balaodi ba bang ba makgotla, ba neng ba di kgethetse Jehova;
27 ba ne ba di nkile dintweng le kgapong, ba di kgethela kotlo ya ntlo ya Jehova;
28 hammoho le tsohle tse neng di kgethetswe Jehova ke Samuele seboni, le Saule, mora Kishe, le Abnere, mora Nere, le Joabe, mora Tseruja, le mang le mang, tsohle tseo tse neng di kgethetswe Jehova, tsa bewa bolebeding ba Shelomithe le banababo.
29 Ho Bajitsehare, Kenania le bara ba hae ba bewa mosebetsing o kantle, ba bewa bahlahlobi le baahlodi Iseraeleng.
30 Ho Bahebrone, Hashabia le banababo, banna ba bohale ba sekete se nang le makgolo a supileng, ba bewa bahlahlobi ba Baiseraele ba mose o kwano ho Jordane, ka nqa bophirimela, ho sebetsa mesebetsi yohle ya Jehova le mesebetsi ya morena.
31 Ho Bahebrone — Bahebrone bao ho ileng ha batlwa masika a bona ka ho ya ka bontata bona, selemong sa mashome a mane sa puso ya Davida, ha ba ha fumanwa hara bona banna ba matla, ba bahale, motseng wa Jasere wa Gileade, —
32 Jeria, hlooho, le banababo e neng e le banna ba bahale, ba ne ba etsa kete tse pedi tse nang le makgolo a supileng a dihlooho tsa matlo a bontata bona. Morena Davida a ba bea bahlahlobi ba Barubene, ho sebetsa mesebetsi yohle ya Modimo le mesebetsi ya morena.