1 Kamora tseo, Nahashe, morena wa bana ba Ammone, a timela, mme mora wa hae ya eba morena tulong tsa hae.
2 Davida a re: Ke tla bontsha Hanune, mora Nahashe, mosa wa ka, kahobane le ntatae o kile a mpontsha mosa wa hae. Kahoo, Davida a roma bahlanka ba tle ba mo tshedise bakeng sa ho shwa ha ntatae. Bahlanka ba Davida ba fihla naheng ya bana ba Ammone ho Hanune, ba re, ba tla mo tshedisa.
3 Empa baholo ba bana ba Ammone ba re ho Hanune: Ha Davida a rometse batshedisi ho wena, hleka o re, ke ka ho hlonepha ntatao na? Ha bahlanka ba hae ba tlile ho wena, na hase ka baka la ho tla qamakisisa motse, le ho timetsa, le ho hlwela naha na?
4 Yaba Hanune o tshwara bahlanka ba Davida, a ba beola, a seha diaparo tsa bona kalehare ho isa lethekeng, mme a ba kgutlisa ba le jwalo.
5 Davida a behelwa se entsweng ho banna ba hae; yaba o romela ho ba kgahlanyetsa, hobane banna bao ba ne ba le dihlong haholo; mme morena a re: Dulang Jeriko, ditedu tsa lona di be di mele, le ntoo boya.
6 Eitse ha bana ba Ammone ba bona hobane ba ikentse ba nkgang hampe ho Davida, Hanune le bana ba Ammone ba romela ditalenta tse sekete se le seng tsa silefera ho adima makoloi le bapalami ho Basiria ba Mesopotamia, le ho Basiria ba Maaka le ba Tsoba.
7 Ba adima makoloi a dikete tse mashome a mararo a metso e mmedi; le yena morena wa Maaka le setjhaba sohle sa hae ba tla, ba emisa pela Medeba. Bana ba Ammone ba phutheha metseng ya bona, mme ba tloha ho ya ntweng.
8 Davida ha a utlwa, a roma Joabe le sera sohle sa banna ba ntwa.
9 Bana ba Ammone ba tswa, ba hlopholla ntwa pela kgoro ya motse; haele marena a tlileng, a ema thoko naheng, sebakeng sa wona.
10 Joabe ha a bona hoba o ya tlelwa ke ntwa tse pedi, e nngwe e le kapele, e nngwe e tla kamora hae, a kgetha mokgetho wohle wa Iseraele, a ba lokisa hore ba tadime ntwa ya Basiria;
11 ba setseng ba setjhaba a ba nea Abishai, ngwanabo, mme a ba lokisa hore ba bone bana ba Ammone.
12 A re ho yena: Ha Basiria ba ka nkimela, o tle, o tlatsetse ho nna; ha bana ba Ammone ba o imela, ke tla tlatsetsa ho wena.
13 O iphe matla, mme re etseng ka senna sebakeng sa setjhaba sa heso le sa metse ya Modimo wa rona, mme Jehova a ke a etse kamoo a ratang kateng.
14 Yaba Joabe le setjhaba sohle se ho yena ba atamela ho lwantsha Basiria, mme Basiria ba baleha pela hae.
15 Eitse ha bana ba Ammone ba bona hobane Basiria ba balehile, le bona ba baleha pela Abishai, ngwanabo Joabe, mme ba kena hae motseng. Joabe yena a boela Jerusalema.
16 Eitse ha Basiria ba bona hobane ba hlotswe ke Baiseraele, ba romela manqosa ho mema Basiria ba mose wane wa noka; Shofake, molaodi wa sera sa Hadaresere, e ne e le motsamaisi wa bona.
17 Davida ha a tsebiswa, a phutha Baiseraele bohle, a tshela Jordane, a tla ho bona, mme a hlopholla sera sa hae ho ba lwantsha. Davida a hlopholla sera sa hae ho lwantsha Basiria, mme ba kopanya ntwa le yena.
18 Basiria ba baleha pela Baiseraele, mme Davida a timetsa banna ba dikete tse supileng tsa makoloi a Basiria, le banna ba maoto ba dikete tse mashome a mane, a bolaya le Shofake, molaodi wa sera.
19 Eitse ha bahlanka ba Hadaresere ba bona hoba ba hlotswe ke Baiseraele, ba etsa kgotso le Davida, mme ba mo sebeletsa. Mme Basiria ha ba ka ba hlola ba dumela ho tlatsa bana ba Ammone.