1 Ba tlisa areka ya Jehova jwalo, mme ba e bea tenteng eo Davida a e hlometseng yona; ha hlajwa mahlabelo a ditjheso le a teboho pela Modimo.
2 Eitse hobane Davida a qetele ho hlaba mahlabelo a ditjheso le a teboho, a hlohonolofatsa setjhaba ka lebitso la Jehova;
3 a ntoo abela Baiseraele bohle, banna le basadi, e mong le e mong polokwe ya bohobe, le sesuma sa nama, le senkgwana sa morara.
4 Yaba o laela Balevi ba bang hore ba phethe tsa tshebeletso pela areka ya Jehova, le ho rapela, le ho boka, le ho rorisa Jehova, Modimo wa Iseraele.
5 E moholo e ne e le Asafe; ba mo hlahlamang ke Sakaria, le Jeiele, le Shemiramothe, le Jehiele, le Matthithia, le Eliabe, le Benaia, le Obed-Edomo, le Jeiele, ba tshwere diletsa, le diviole, le diharepa; Asafe yena o ne a letsa disimbala.
6 Baprista Benaia le Jahasiele ba ne ba ntse ba letsa diterompeta pela areka ya selekane sa Modimo.
7 Ke tsatsing lona leo Davida a qadileng ho laela Asafe le banababo hore ba boke Jehova:
8 Rorisang Jehova, le rapele lebitso la hae; tsebisang hara ditjhaba diketso tsa hae tse phahameng.
9 Mmineleng, le mminele dithoko, le nahane mehlolo ya hae kaofela.
10 Ithoriseng ka lebitso la hae le halalelang; pelo tsa ba batlang Jehova a di ke di thabe.
11 Batlang Jehova le matla a hae, le batle sefahleho sa hae kamehla.
12 Hopolang mehlolo eo a e entseng, le meeka ya hae, le dikahlolo tse tswileng molomong wa hae,
13 lona, moloko wa Iseraele, mohlanka wa hae; lona, bana ba Jakobo, bakgethwa ba hae!
14 Jehova ke yena Modimo wa rona; dikahlolo tsa hae di aparela lefatshe lohle.
15 Le nne le hopole selekane sa hae kamehla, le lentswe leo a le laoletseng meloko e sekete;
16 e leng selekane seo a neng a se hlabe le Abrahama, le kano eo a neng a e anetse Isaaka,
17 eo a kileng a e etsa komelo e tiileng ho Jakobo, le selekane se sa feleng ho Iseraele,
18 a re: Ke tla o nea lefatshe la Kanana, e be kabelo ya lefa la lona.
19 E ne e sa le batho ba seng bakae; ba ne ba le banyenyane, e ne e sa le basele ho lona,
20 ba ntse ba phanyaphanya hara ditjhaba le mebuso le merabe.
21 Empa ha a ka a dumella motho ho ba tuba, mme a laya marena ka baka la bona, a re:
22 Se ameng batlotsuwa ba ka, mme le se ke la etsa baporofeta ba ka hampe.
23 Binelang Jehova, lona mafatshe wohle; le bolele poloko ya hae ka matsatsi wohle.
24 Le bolele kganya ya hae hara ditjhaba, le mehlolo ya hae hara mefuta yohle.
25 Hobane Jehova o moholo, mme o lokelwa ke ho roriswa ka ho fetisisa; o tshabeha ho fetisa medimo kaofela;
26 hobane medimo yohle ya ditjhaba ke ditshwantsho feela, empa Jehova o entse mahodimo.
27 Kganya le letlotlo di pela hae, matla le thabo di sehalalelong sa hae.
28 Lona, mefuta ya ditjhaba, busetsang ho Jehova, busetsang ho Jehova kganya le matla.
29 Busetsang ho Jehova kganya e tshwanelang lebitso la hae; tlisang dinyehelo, mme le hlahe pela hae; kgumamang pela Jehova ka bokgabane bo halalelang.
30 Tlakasela pela hae, wena, lefatshe lohle. Lefatshe le lona le a tiya, ha le sisinyehe.
31 Mahodimo a ke a thabe, mme lefatshe le hlasimolohe; a ho ke ho bolelwe hara ditjhaba, ho thwe: Jehova o a busa.
32 Lewatle a le ke le dume le tsohle tse ho lona; dithota di ke di hlasimolohe le tse ho tsona kaofela!
33 Difate tsa meru di etse ditlatse tsa thabo pela Jehova, hobane o ya tla, a tle a ahlole lefatshe.
34 Rorisang Jehova, hobane o molemo, hobane mohau wa hae o hlola ka ho sa feleng.
35 Ereng: Re lopolle, Modimo wa topollo ya rona, o re bokelle hammoho, o re ntshe hara ditjhaba, re tle re binele lebitso la hao le halalelang, mme re ithorise ka ho o roka.
36 Ho roriswe Jehova, Modimo wa Iseraele, ho tloha ho sa simoloheng ho isa ho sa feleng.Setjhaba sohle sa re: Amen! sa rorisa Jehova.
37 Davida a siya Asafe le banababo, hona teng, pela areka ya selekane sa Jehova, hore ba nne ba etse tsa tshebeletso pela areka kamehla, mosebetsi o mong le o mong ka tsatsi la wona;
38 hape, a bea Obed-Edomo le banababo, e le batho ba mashome a tsheletseng a metso e robileng meno e le mmedi, ke re, Obed-Edomo mora Jeduthune, le Hosa, e tle e be balebedi ba menyako.
39 Hape, a bea moprista Tsadoke, le baprista ba mofuta wa habo, pela tabernakele ya Jehova, nqalong e phahameng e leng Gibeone,
40 hore ho yona ho nne ho hlahisetswe Jehova ditjheso aletareng ya mahlabelo, hosasa le mantsiboya, ka ho ya ka tsohle tse ngodilweng molaong wa Jehova, oo a o beetseng Iseraele.
41 Ba ne ba na le Hemane le Jeduthune le Balevi ba bang ba kgethilweng, ba thontsweng ka mabitso a bona hore ba nne ba rorise Jehova; hobane mohau wa hae ke o sa feleng.
42 Hemane le Jeduthune ba ne ba le ho bona, diterompeta le disimbala le diletsa tsa Modimo ba di tshwaretse ba di letsang; haele bara ba Jeduthune, ba ne ba eme monyako.
43 Yaba setjhaba sohle se ikela e mong le e mong tlung ya hae; le yena Davida a ikela a tle a hlohonolofatse ntlo ya hae.