1 Yaba Satane o tsohela Iseraele matla, mme a susumetsa Davida hore a bale Baiseraele.
2 Davida a re ho Joabe le ho balaodi ba setjhaba: Eyang, le bale Baiseraele ho qala ka Beerseba ho ya fihla Dane, mme le ntsebise palo ya bona hore ke e tsebe.
3 Joabe a re: Jehova a ke a atise setjhaba, se ke se fete bongata ba sona ba jwale halekgolo! Oho, morena, monga ka, ha ke re, kaofela ha bona ke bahlanka ba monga ka na? Ke ka baka lang ha monga ka a batla hoo? Na o rata keng ho bea molato hodima Baiseraele?
4 Leha ho le jwalo, taelo ya morena ya hlola Joabe. Joabe a tswa, a ya le Baiseraele bohle, a ntoo kgutlela Jerusalema.
5 Joabe a bolella Davida palo ya bongata ba setjhaba: Iseraeleng ho ne ho le banna ba tsomolang sabole ba sekete sa dikete se nang le lekgolo le le leng la dikete; haele Juda, ho ne ho na le banna ba tsomolang sabole ba dikete tse makgolo a mane a mashome a supileng.
6 A mpa a sa ka a bala Levi le Benjamine; hobane taelo eo ya morena e ne e le e kgesehang ho Joabe.
7 Taba eo ya eba mpe mahlong a Modimo, mme a otla Iseraele.
8 Davida a re ho Modimo: Ke sitilwe haholo ka seo ke se entseng. Empa jwale, oho, tlosa bokgopo ba mohlanka wa hao, hobane ke entse ka bothoto bo boholo.
9 Yaba Jehova a bolella Gade, seboni sa Davida, a re:
10 Eya, o bolelle Davida, o re: Jehova o re: Ke o behela taba tse tharo; ikgethele e nngwe ho tsona, ke o etse ka yona.
11 Gade a ya ho Davida, a re ho yena: Jehova o re: Ikgethele seo o se ratang,
12 kapa lemo tse tharo tsa tlala, kapa kgwedi tse tharo tsa ho bolawa ke dira tsa hao, o qetwe ke sabole ya ba o hloileng, kapa tshiu tse tharo tseo ka tsona lerumo la Jehova le lefu la sewa le tla senya naheng ya Baiseraele, mme lengeloi la Jehova le tla timetsa batho naheng yohle ya bona. Jwale, bona hore na ke tla busetsa karabo efe ho ya nthomileng!
13 Davida a re ho Gade: Ke tsietswe haholo; a ke mpe ke wele matsohong a Jehova, etswe mehauhelo ya hae e le mengata; ke mpe ke se ke ka wela matsohong a batho.
14 Jehova a romela lefu le leng la sewa Iseraeleng, mme ha eshwa batho ba dikete tse mashome a supileng ba Iseraele.
15 Modimo wa romela lengeloi Jerusalema ho timetsa batho ba teng; la re le sa ntsane le bolaya, Jehova a bona, a swaba ke tshenyeho eo, mme a re ho lengeloi le bolayang: Ho lekane; honyetsa letsoho la hao jwale! Lengeloi la Jehova le ne le eme pela seotlo sa Ornane Mojebuse.
16 Davida eitse ha a emisa mahlo, a bona lengeloi la Jehova le eme pakeng tsa lefatshe le lehodimo, le tshwere sabole e bolatsi letsohong la lona, le e otlolletse Jerusalema. Yaba Davida le baholo, ba apere masela a mahwashe, ba itahla fatshe ka difahleho tsa bona.
17 Davida a re ho Modimo: Na hase nna ke laetseng hore ho balwe setjhaba na? Ke nna ke sitilweng, ke nna ke entseng bobe; dinku tseo tsona di entseng na? Jehova, Modimo wa ka, tsoho la hao le otle nna le ntlo ya ntate, mme le se ke la nna la kenya lefu setjhabeng sa hao!
18 Yaba lengeloi la Jehova le laela Gade hore a bolelle Davida hore Davida a nyolohe, a hahele Jehova aletare seotlong sa Ornane Mojebuse.
19 Ka polelo ya Gade, eo a e boletseng ka lebitso la Jehova, Davida a nyoloha.
20 Ornane ha a reteleha, a bona lengeloi; mme ba ipata e le yena le bara ba hae ba bane; Ornane o ne a pola koro.
21 Davida a fihla ho Ornane; Ornane, eitse ha a tadima, a bona Davida, mme a tswa seotlong, a inamela fatshe ka sefahleho pela Davida.
22 Yaba Davida o re ho Ornane: Nnee baka sa seotlo sena, hore ke tle ke hahele Jehova aletare teng; nnee sona bakeng sa theko ya sona e phethehileng, hore lefu lena le tloswe hara setjhaba.
23 Ornane a re ho Davida: Inkele sona, mme morena, monga ka, a etse kahohle kamoo a ratang kateng. Bona, ke o nea pholo tseo ho etsa ditjheso ka tsona, le mesebetsi ya ho pola ho etsa patsi, le koro ho etsa nyehelo; ke o nea tsona kaofela.
24 Morena Davida a re ho Ornane: Tjhe, ke tla di reka ka theko ya tsona; hobane nke ke ka isetsa Jehova seo e leng sa hao, mme nke ke ka hlahisa setjheso seo ke sa se ntshetsang letho.
25 Ha ho le jwalo, Davida a nea Ornane theko ya baka seo, a mo nea dishekele tsa kgauta tse makgolo a tsheletseng.
26 Teng, Davida a hahela Jehova aletare, mme a hlahisa mahlabelo a ditjheso le a teboho teng; a rapela Jehova, mme a mo arabela ka ho theolela mollo aletareng ya ditjheso, o etswa lehodimong.
27 Mme Jehova a laela lengeloi hore le busetse sabole ya lona selateng.
28 Mohlang oo, Davida eitse ha a bona hobane Jehova o mo utlwile a le seotlong sa Ornane Mojebuse, a hlaba mahlabelo teng.
29 Motsotsong oo, tabernakele ya Jehova, e na beng e entswe ke Moshe nahathothe, le aletare ya ditjheso, di ne di le nqalong e phahameng ya Gibeone;
30 mme Davida o ne a sitilwe ho ya pela aletare eo ho botsa Modimo, hobane a ne a tshositswe ke sabole ya lengeloi la Jehova.