1 Bana ke bara ba Rubene, letsibolo la Iseraele. E ne e le yena letsibolo; empa kahobane a ne a silafaditse malao a ntatae, boholo ba hae ba ho tswalwa bo ne bo neilwe bara ba Josefa, mora Iseraele; leha ho le jwalo, e ne e se hore Josefa a ngolwe mangolong a meloko ka ho re o na le boholo ba ho tswalwa.
2 Hobane ke Juda ya ileng a feta banababo, mme ke ho yena ho tswileng morena; leha ho le jwalo, ditokelo tsa boholo ba ho tswalwa e ne e le tsa Josefa.
3 Bara ba Rubene, letsibolo la Iseraele, ke Henoke, Pallu, Hetsrone, le Karmi.
4 Bara ba Joele ke mora hae Shemaia, le Gogo mora hae, le Shimei mora hae,
5 le Mikea, mora hae, le Reaia mora hae, le Baale mora hae,
6 le Beera mora hae, eo Tilgathe-Pilnesere, morena wa Assiria, a ileng a mo isa kgolehong; e ne e le kgosana ya Barubene.
7 Meloko ya banababo, ha ho balwa lesika la meloko ya bona, e moholo e ne e le Jeiele, le Sakaria,
8 le Bela mora Asase, mora Shema, mora Joele, ya neng a ahile Aroere, ho ya fihla Nebo le Baale-Meone;
9 ka nqa botjhabela, o ne a ahile naheng e fihlang moeding wa lefeella, ho tloha nokeng ya Eufrate; hobane mehlape ya bona e ne e atile haholo naheng ya Gileade.
10 Mehleng ya Saule, ba futuhela Bahagarene, ba ba bolaya, mme ba aha ditenteng tsa bona, naheng yohle e nqa botjhabela ho Gileade.
11 Bana ba Gade bona ba ne ba ahile mabapa le Barubene, naheng ya Bashane, ho ya kgutla Salka:
12 e moholo ke Joele, ya mo hlahlamang ke Shafame, le Jaenai, le Shafathe naheng ea Bashane.
13 Banababo, bana ba ntlo ya bontata bona, ke Mikaele, Meshullame, Sheba, Jorai, Jaekane, Sia, le Ebere; ba ne ba supile.
14 Ke bao bana ba Abikaele, mora Huri, mora Jarowa, mora Gileade, mora Mikaele, mora Jeshishai, mora Jahdo, mora Buse;
15 Aki, mora Abdiele, mora Guni, ke kgosana ya matlo a bontata bona.
16 Ba kile ba aha naheng ya Gileade, Bashane, le metseng ya teng, le merakeng yohle ya Sarone, meeding ya yona.
17 Kaofela ha bao ba ne ba ntse ba balwa masikeng a bona mehleng ya Jothame, morena wa Juda, le mehleng ya Jeroboame, morena wa Iseraele.
18 Bara ba Rubene, le Bagade, le ba mothapo o mong wa Manasse, bao e neng e le bahale, banna ba hlomelang thebe le sabole, ba fulang ka seqha, ba tsebang ntwa, e ne e le dikete tse mashome a mane a metso e mene tse nang le makgolo a supileng le mashome a tsheletseng, ba neng ba ka nna ba futuha.
19 Ba hla ba futuhela Bahagarene, le Jethure, le Nafishe, le Nodabe.
20 Ba ya ba tlatsitswe, mme Bahagarene ba neelwa matsohong a bona, le bohle bao ba neng ba na le bona; hobane bao ba ne ba howeleditse ho Modimo ba le ntweng, mme wa ba utlwa, ke hobane ba ne ba beile tshepo ya bona ho wona.
21 Ba hapa le makgomo a bona, dikamele tse dikete tse mashome a mahlano, le dinku tse makgolo a mabedi a mashome a mahlano a dikete, le diesele tse kete tse pedi, ba bolaya le batho ba lekgolo la dikete.
22 Ha fela ha bolawa ba bangata, hobane ntwa e ne e le ya Modimo. Mme ba aha tulong tsa bona ho fihlela mohla kgoleho.
23 Le bona bana ba mothapo o mong wa Manasse ba aha naheng eo; ba aha ba tletse ho tloha Bashane ho ya Baale-Hermone, le Senire, le thabeng ya Hermone.
24 Dihlooho tsa matlo a bontata bona ke Efere, le Jishei, le Eliele, le Asriele, le Jeremia, le Hodavia, le Jahdiele, e neng e le bahale, banna ba tumileng, dihlooho tsa matlo a bontata bona.
25 Ba kwenehela Modimo wa bontata bona, mme ba latela medimo ya ditjhaba tsa naha eo, tseo Modimo o neng o di timeditse pela bona.
26 Yaba moo Modimo wa Iseraele o susumetsang pelo ya Pule, morena wa Assiria, le pelo ya Tilgathe-Pilnesere, morena wa Assiria, mme a tlosa Barubene, le Bagade, le ba mothapo o mong wa Manasse, a ba isa Hala, le Habore, le Hara, le nokeng ya Gosane, ho fihlela kajeno.