1 Davida o ne a se a tsofetse, a hodile haholo; yaba o bea Salomone, mora wa hae, morena wa Iseraele.
2 A phutha balaodi bohle ba Iseraele, le baprista, le Balevi.
3 Balevi ba balwa ho tloha ho ba dilemo tse mashome a mararo le ba kapele; ha ba balwa ka dihlooho, ha fumanwa batho ba dikete tse mashome a mararo a metso e robileng meno e le mmedi.
4 A re: Ho bona, ho ke ho nkwe ba kete tse mashome a mabedi a metso e mene ba tla tsamaisa tshebetso ya ntlo ya Jehova; hape, ho nkwe ba kete tse tsheletseng ho ba etsa bahlahlobi le baahlodi;
5 balebedi ba menyako ba ke ba etse dikete tse nne, mme ba kete tse nne e be ba tla rorisa Jehova ka diletsa tseo ke di entseng hore a roriswe ka tsona.
6 Davida a ba arola dihlopha ka palo ya bara ba Levi, Gershone, Kehathe, le Merari.
7 Ho Bagershone, ya eba Laedane le Shimei.
8 Bara ba Laedane, e moholo ke Jehiele, ba bang ke Sethame le Joele; ba bararo.
9 Bara ba Shimei ke Shelomithe, Hasiele, le Harane; ba bararo. Ke tsona dihlooho tsa bontata Balaedane.
10 Bara ba Shimei ke Jahathe, Sina, Jeushe, le Beria. Bao ba bane ke bara ba Shimei.
11 Jahathe ke e moholo; wa bobedi ke Sina; haele Jeushe le Beria, ba ne ba se na bana ba bangata; ha ho le jwalo, palong ba etsa ntlo e le nngwe ya bontata Balevi.
12 Bara ba Kehathe ke Amrame, Jitsehare, Hebrone le Usiele; ba bane.
13 Bara ba Amrame ke Aarone le Moshe; Aarone yena a kgethwa, hore a tle a halaletswe ka ho sa feleng ka kgalalelo e fetisang, e le yena le bara ba hae, mme ba tjhese dibano pela Jehova, ba mo sebeletse, ba hlohonolofatse setjhaba ka lebitso la hae ka ho sa feleng.
14 Haele ka Moshe, monna wa Modimo, bara ba hae ba balwa le bara ba Levi.
15 Bara ba Moshe ke Gershome le Eliesere.
16 E moholo ho bara ba Gershome ke Shebuele.
17 Bara ba Eliesere, e moholo ke Rehabia. Eliesere o ne a se na bara ba bang; empa bara ba Rehabia ba ne ba le bangata.
18 Bara ba Jitsehare, e moholo ke Shelomithe.
19 Ho bara ba Hebrone, e moholo ke Jeria, wa bobedi ke Amaria, wa boraro ke Jahasiele, wa bone ke Jekameame.
20 Ho bara ba Usiele, e moholo ke Mika, wa bobedi ke Jishia.
21 Bana ba Merari ke Mahali le Mushi; bara ba Mahali ke Eleasare le Kishe.
22 Eleasare a shwa a se na bara, a ena le baradi feela; mme dikgaitsedi tsa bona, bara ba Kishe, tsa ba nyala.
23 Bara ba Mushi ke Mahali, Edere, le Jeremothe; ba bararo.
24 Ke bona bara ba Levi ka matlo a bontata bona; ke tsona dihlooho tsa matlo a bontata bona, kamoo ba kileng ba ngolwa kateng, ha ho balwa mabitso a bona ka ho ya ka dihlooho. Ba ne ba etsa mosebetsi wa tshebetso ya ntlo ya Jehova, ba qala ha ba le dilemo tse mashome a mabedi le ho ya pele;
25 hobane Davida o ne a itse: Jehova, Modimo wa Iseraele, o neile setjhaba sa hae phomolo, mme o tla aha Jerusalema ka ho sa feleng;
26 haele Balevi, ha ba sa na ho jara tabernakele leha e le mesebetsi yohle ya tshebetso.
27 Ke e nngwe ya taba tseo Davida a qeteletseng ka tsona, ha ho kile ha etswa palo ya bara ba Levi, ho qala ka ba dilemo tse mashome a mabedi le ho ya pele.
28 Hobane mosebetsi wa bona e ne e le ho tlatsa bara ba Aarone tshebetsong ya ntlo ya Jehova; ba ne ba laetswe ho baballa mabala le dikamore, le ho hlatswa ntho tsohle tse halalelang, le ho phetha mosebetsi wohle wa tshebetso ya ntlo ya Modimo;
29 le ho bona mahobe a pontsha, le lefi la phofo ya dinyehelo, le maqebekwane a se nang ditomoso, le tse phehwang paneng, le tse beswang, le ditekanyo tsa boholo le tsa bongata.
30 Ba ne ba tshwanetse ho itlhahisa pela Jehova ka hosasa ho hong le ho hong, ho boka le ho rorisa Jehova, le mantsiboya jwalo;
31 le ho hlahisetsa Jehova ditjheso tsohle, mohla Disabatha, le dikgwedi tse thwasang, le mekete, ka palo ya tsona, ka ho ya ka mokgwa wa ntho tseo, ka ho sa feleng pela Modimo.
32 Hape, ba ne ba boloka dintho tsa tente ya pokano, le tsa sehalalelo, le tsa bara ba Aarone, banababo bona, tsa ho etsa tshebetso ya ntlo ya Jehova.