1 Haele bara ba Aarone, dikarolo tsa bona ke tsena: Bara ba Aarone e ne e le Nadabe, Abihu, Eleasare le Ithamare.
2 Haele Nadabe le Abihu, bona ba ne ba shwe, ntata bona a sa le teng, ba se na bara; ka baka leo, Eleasare le Ithamare ba tshwara mosebetsi wa boprista.
3 Davida hammoho le Tsadoke wa bara ba Eleasare, le Akimeleke wa bara ba Ithamare, ba arola baprista ka dikabelo tsa bona tsa tshebetso.
4 Hara bara ba Eleasare ha fumanwa hobane mahosana a mangata ho fetisa hara bara ba Ithamare; ha ho le jwalo, ba arolwa ka mokgwa ona: ho bara ba Eleasare, ha balwa dihlooho tse leshome le metso e tsheletseng tsa matlo a bontata bona, le ho bara ba Ithamare, dihlooho tse robileng meno e le mmedi tsa matlo a bontata bona.
5 Ba arolelwa dikabelo ka lotho, ba bang le ba bang; batsamaisi ba sehalalelo le batsamaisi ba ntlo ya Modimo ba nkwa hara bara ba Eleasare le hara bara ba Ithamare;
6 mongodi Shemaia, mora Nethaneele, wa Balevi, a ba ngola pela morena, le mahosana, le moprista Tsadoke, le Akimeleke, mora Abiathare, le dihlooho tsa matlo a bontata baprista le Balevi; ha ho le jwalo, ha laolwa ka lotho ntlo e nngwe ya Eleasare, ha boela ha laolwa e nngwe ya Ithamare.
7 Lotho ya pele ya wela Jehojaribe, ya bobedi Jedaia,
8 ya boraro Harime, ya bone Seorime,
9 ya bohlano Malkija, ya botshelela Mijamine,
10 ya bosupa Hakkotse, ya boroba meno e le mmedi Abija,
11 ya boroba mono o le mong Joshua, ya leshome Shekania;
12 ya leshome le motso o mong Eliashibe, ya leshome le metso e mmedi Jakime,
13 ya leshome le metso e meraro Huppa, ya leshome le metso e mene Jeshebeabe,
14 ya leshome le metso e mehlano Bilga, ya leshome le metso e tsheletseng Immere,
15 ya leshome le metso e supileng Hesire, ya leshome le metso e robileng meno e le mmedi Happitsetse,
16 ya leshome le metso e robileng mono o le mong Pethahia, ya mashome a mabedi Esekiele,
17 ya mashome a mabedi a motso o mong Jakine, ya mashome a mabedi a metso e mmedi Gamule,
18 ya mashome a mabedi a metso e meraro Delaia, ya mashome a mabedi a metso e mene Maasia.
19 Ke lona lenaneo la bona tshebetsong ya bona la ho tla ka tlung ya Jehova ka taelo e neng e bewe ke Aarone ntata bona, kamoo Jehova, Modimo wa Iseraele, a neng a mo laetse kateng.
20 Haele bara ba bang ba Levi, dihlooho tsa bona ke tsena: Ho bara ba Amrame ke Shubaele; ho bara ba Shubaele ke Jehdia;
21 bakeng sa Rehabia, ho bara ba hae, e moholo ke Jishia,
22 ho ba Jitsehare ke Shelomothe, ho bara ba Shelomothe ke Jahathe.
23 Ho bara ba Hebrone e moholo ke Jeria, wa bobedi ke Amaria, wa boraro ke Jahasiele, wa bone ke Jekameame.
24 Ho bara ba Usiele ke Mikea; ho bara ba Mikea ke Shamire.
25 Ngwanabo Mikea ke Jishia; ho bara ba Jishia ke Sakaria.
26 Ho bara ba Merari, ke Mahali le Mushi, le bara ba Jaasia, mora wa hae.
27 Haele bara ba Merari, ho mora wa hae Jaasia ho tswile Shohame, Sakkure, le Ibri.
28 Ho Mahali ho tswile Eleasare, ya neng a se na bara.
29 Haele Kishe, mora Kishe ke Jerahmeele.
30 Bara ba Mushi ke Mahali, Edere, le Jerimothe.
31 Ke bona bara ba Levi, ha ho uwa ka matlo a bontata bona.
32 Le bona, jwaloka banababo bona, bara ba Levi ba bang, ba laolwa ka lotho pela morena Davida, le Tsadoke, le Akimeleke, le dihlooho tsa matlo a bontata baprista le Balevi. Bao e neng e le dihlooho tsa matlo, ba laolwa ka lotho jwaloka ba banyenyane hara banababo bona.