2 Samuele

¹Kamora tseo, morena wa bana ba Ammone a timela, mme Hanune, mora hae, ya eba morena tulong tsa hae. ²Yaba Davida o re: Ke tla etsa Hanune, mora Nahashe, hantle, kamoo le ntatae a kileng a nketsa hantle kateng. Kahoo, Davida a roma bahlanka ba hae ho ya mo tshedisa bakeng sa ho shwa ha ntatae. Bahlanka ba Davida, ha ba fihla naheng ya bana ba Ammone, ³baholo ba bana ba Ammone ba re ho Hanune, morena wa bona: Ha Davida a rometse batshedisi ho wena, hleka o re, ke ka ho hlonepha ntatao na? Ha Davida a rometse bahlanka ba hae ho wena, hleka hase ho tla qamakisisa le ho hlwela motse, hore a o timetse na? ⁴Yaba Hanune o tshwara bahlanka ba Davida, a ba beola ditedu ka nqa e nngwe, a seha le diaparo tsa bona kalehare ho isa lethekeng, a ba a ba kgutlisa ba le jwalo. ⁵Eitse hobane ba tsebise Davida, a romela ho ba kgahlanyetsa, hobane banna bao ba ne ba le dihlong haholo; mme morena a re: Dulang Jeriko, ditedu tsa lona di be di mele, le ntoo boya. ⁶Bana ba Ammone ba bona hobane ba ikentse ba nkgang hampe ho Davida; yaba bana ba Ammone ba romela ho mema Basiria ba Bethe-Rehobe, le Basiria ba Tsoba, e le batho ba mashome a mabedi a dikete ba maoto, ba morena wa Maaka e le ba sekete se le seng, le ba Tobe e le ba dikete tse leshome le metso e mmedi. ⁷Davida ha a utlwa, a roma Joabe le sera sohle sa banna ba ntwa.