1 Mantswe a mang a Davida a ho qetella ke wona ana: Ho bolela Davida, mora Jese; ho bolela monna ya phahamiseditsweng hodimo, motlotsuwa wa Modimo wa Jakobo, moroki ya kgahlehang wa Iseraele.
2 Moya wa Jehova o bua ka nna, lentswe la hae le lelemeng la ka.
3 Modimo wa Iseraele o buile, Lefika la Iseraele le mpoleletse, la re: Ya busang batho ka ho loka, ya renang ka ho tshaba Modimo,
4 o jwaloka lesedi la meso, ha tsatsi le tjhaba, ha meso e se na maru; pula ha e tswa na, mahlasedi a lona a medisa jwang lefatsheng.
5 Ha ke re, ntlo ya ka e jwalo pela Modimo, hobane o hlabile le nna selekane se sa feleng, se lokileng kahohle, se tiileng! Ha ke re, o tla medisa polokeho ya ka yohle le tsohle tse lakatswang ke nna!
6 Haele ba bolotsana, kaofela ha bona ba ka meutlwa e lahlwang, e se nang ho tshwarwa ka letsoho;
7 eo monna ya e amang, e ka kgonang a tshware selepe kapa theko ya lerumo; mme e tjhesetswa ka mollo hona moo e leng teng.
8 Ke ana mabitso a dinatla tsa Davida: Joshebe-Bashebethe, wa Thakhemone, hlooho ya balaodi. A betsa ka lerumo la hae, mme ka tsatsi le le leng, a hlaba batho ba makgolo a robileng meno e le mmedi.
9 Ya mo hlahlamang ke Eleasare, mora Dodai, wa Akoke; ke e mong wa dinatla tse tharo tsa pele, tse nnileng tsa ya le Davida, li sa tshabe Bafilesta mohla ba phuthehileng ka ntwa, banna ba Iseraele ha ba balehetse maralleng.
10 Yena a ema, a bolaya Bafilesta, ha ba ha kgathala letsoho la hae, la kgomarela sabole. Ke ka yena Jehova a namoletseng Baiseraele haholo mohlang oo, setjhaba sa ba sa kgutla le yena e le hore se hape feela.
11 Ya mo hlahlamang, ke Shamma, mora Age, wa Harare. Bafilesta ba ne ba phuthehile Lehi, moo tshimo e leng teng e tletseng dinawa; setjhapa sa baleha pela Bafilesta.
12 Eo a mpa a ema bakeng seo, a lwanela setjhaba, a bolaya Bafilesta. Jehova a namolela Baiseraele haholo le ka yena.
13 Ba bararo ba dinatla tse mashome a mararo, ba theoha, ba fihla ho Davida, lehaheng la Adullame, mohla ho kotulwang; ntwa ya Bafilesta e ne e emisitse sekgutlong sa Barefaime.
14 Davida yena o ne a le seqhobong, mme sehlopha sa Bafilesta se ne se le Bethlehema.
15 Davida a lakatsa, a re: Ke mang ya tla nnosa metsi a sediba sa Bethlehema, se kgorong?
16 Bahale bao ba bararo ba ya, ba phunyaka makgotla a Bafilesta, ba ya kga metsi sedibeng sa Bethlehema se kgorong; ba a kga, ba tla le wona ho Davida; a mpa a hana ho a nwa, a a tshollela Jehova,
17 a re: Oho Jehova, a nke ke se ke ka etsa hoo; ha ke re, ke madi a banna bao ba ileng, ba tedile ho phela ha bona? Kahoo, a hana ho a nwa. Hoo ha etswa ke bahale bao ba bararo.
18 E mong ke Abishai, ngwanabo Joabe, mora Tseruja; ke e mong e moholo ho ba bararo ba bang; a betsa ka lerumo la hae, a hlaba ba makgolo a mararo, a iketsetsa lebitso hara ba bararo.
19 Ho ba bararo, ya eba yena ya roriswang; ya eba monga bona ke hona, a mpa a sa fihle ho ba bararo ba pele.
20 E mong ke Benaia, mora Jehojada, mora mohale e mong wa Kabtseele; a ba moholo ka diketso tsa hae. A bolaya tau tse pedi tse matla tsa Moabe; a boela a theoha, a bolaya tau e nngwe lemeneng, mohla lehlwa le kgethehang.
21 A bolaya le monna wa Moegepeta, ya sebopeho se tshabehang; leha Moegepeta a ne a tshwere lerumo letsohong la hae, yena Benaia a theohela ho yena ka molamu, a rutla lerumo letsohong la Moegepeta, a ba a mmolaya ka lona lerumo leo la hae.
22 Tseo tsa etswa ke Benaia, mora Jehojada; a iketsetsa lebitso hara bahale bao ba bararo.
23 Ho ba mashome a mararo, ya eba yena ya roriswang, a mpa a se ke a fihla ho ba bararo ba pele. Davida a mmea monna wa lekgotla la hae.
24 Asaele, ngwanabo Joabe, e ne e le e mong wa ba mashome a mararo; le Elkanane, mora Dodo wa Bethlehema;
25 le Shamma, wa Harode, le Elika wa Harode;
26 le Heletse Mopelethe, le Ira, mora Ikkeshe, wa Tekowa;
27 le Abiesere wa Anathothe, le Mebunnai wa Husha;
28 le Tsalmone wa Akowa, le Maharai wa Nethofa;
29 le Helebe, mora Baana, wa Nethofa, le Ittai, mora Ribai, wa Gibea wa bana ba Benjamine;
30 le Benaia wa Pirathone, le Hiddai wa Nahale-Gaashe;
31 le Abi-Albone wa Araba, le Asmavethe wa Barkume;
32 le Eliaba wa Shaalbone, le Bene-Jashene, le Jonathane;
33 Shamma wa Harare, le Akiame, mora Sharare, wa Harare;
34 le Elifelethe, mora Akasbai, mora Momaakathe; le Eliame, mora Akitofele, wa Gilo;
35 le Hetsrai wa Karmele, le Paarai Moarabe;
36 le Jigeale, mora Nathane, wa Tsoba, le Banie wa Gade;
37 le Tseleke Moammone, le Naharai wa Beerothe, lehlahana la Joabe mora Tseruja.
38 Hape, ke Ira wa Jethere, le Garebe wa Jethere,
39 le Uria Mohethe. Kaofela ha bona ba mashome a mararo a metso e supileng.