1 Davida a boela a phutha ba kgethilweng bohle ba bahlabani ba Iseraele, a etsa dikete tse mashome a mararo.
2 Davida a tloha, a ena le setjhaba sohle seo a nang le sona, a ya Baale-Juda, ho lata areka ya Modimo teng, eo lebitso la Jehova wa makgotla ya dutseng pakeng tsa dikerubime le bitswang ho yona.
3 Ba kenya areka ya Modimo koloing e ntjha, ha ba se ba e ntshitse tlung ya Abinadabe e leralleng. Ussa le Akio, bara ba Abinadabe, ba ne ba tsamaisa koloi eo e ntjha.
4 Ba e ntsha tlung ya Abinadabe e leralleng, e nkile areka ya Modimo, mme Akio a etella areka pele.
5 Davida le bohle ba ntlo ya Iseraele ba letsa pela Jehova ka diletswa tsa mefutafuta tse entsweng ka difate tsa kiprese, ka diharepa, le diviole, le meropa, le diterompeta, le disimbala.
6 Ha ba fihla seotlong sa Nakone, Ussa a isa letsoho arekeng ya Modimo, a e tshwara, kahobane dipholo di ne di kgoptjwa.
7 Ebile Jehova o halefela Ussa, mme Modimo wa mmolaela hona teng ka molato oo; a shwela teng pela areka ya Modimo.
8 Empa Davida a swaba ke hobane Jehova a entse sekgeo Iseraeleng, ka ho bolaya Ussa; ka baka lena, bitso la teng a le bitsa Peretse-Ussa (sekgeo sa Ussa); le kajeno ke la teng.
9 Tsatsing leo, Davida a tshaba Jehova, a re: Areka ya Jehova e ka tla jwang ha ka?
10 Davida a hana ke hona ho isa areka ya Jehova ha hae motseng wa Davida, a e faposetsa tlung ya Obed-Edomo wa Gathe.
11 Areka ya Jehova ya dula ha Obed-Edomo wa Gathe kgwedi tse tharo; mme Jehova a hlohonolofatsa Obed-Edomo le ntlo ya hae kaofela.
12 Morena Davida a tsebiswa, ha thwe: Jehova o hlohonolofaditse ntlo ya Obed-Edomo le tsohle tsa hae, ka baka la areka ya Modimo. Yaba Davida o ya lata areka ya Modimo ha Obed-Edomo, a e tlisa motseng wa Davida a thabile.
13 Enere ba jereng areka ya Jehova ha ba hatile hatshelela, ho ne ho hlajwa kgomo le namane e nonneng.
14 Haele Davida, o ne a hobela ka matla wohle a hae pela areka ya Jehova; mme Davida o ne a apere efoda ya lene.
15 Davida le bohle ba ntlo ya Iseraele ba tsamaisa areka ya Jehova jwalo, ka ditlatse le ka ho letsa diterompeta.
16 Areka ya Jehova ha e fihla motseng wa Davida, Mikale, moradi wa Saule, ha a nyarela ka fensetere, a bona morena Davida a tlolaka, a hobela pela Jehova, mme a mo nyedisa ka pelong ya hae.
17 Ha ba fihla le areka ya Modimo, ba e bea tulong tsa yona, tenteng eo Davida a e hlometseng yona, mme Davida a boela a hlaba mahlabelo a ditjheso le a teboho pela Jehova.
18 Eitse hobane Davida a qetelle ho hlaba mahlabelo a ditjheso le a teboho, a hlohonolofatsa setjhaba ka lebitso la Jehova wa makgotla.
19 A ba a abela setjhaba sohle, e leng bongata bohle ba Iseraele, banna le basadi, e mong le e mong, polokwe ya bohobe, le sesuma sa nama e besitsweng, le senkgwa sa morara. Setjhaba sa ntoo ikela e mong hae ha hae.
20 Davida le yena a boela hae ho ya hlohonolofatsa ntlo ya hae. Mikale, moradi wa Saule, a tswela ho ya kgahlanyetsa Davida, a re: Morena wa Iseraele o itlhomphile hakakang, ha a hlobotse kajeno pontsheng ya makgabunyane a bahlanka ba hae, jwalokaha ho ka hlobola motho wa lefeela!
21 Davida a re ho Mikale: Ke entse jwalo pela Jehova ya nkgethileng bakeng sa ntatao le bakeng sa bohle ba ntlo ya hae, hore a mpee motsamaisi wa setjhaba sa Jehova, sa Iseraele; ke ka baka leo ke ratang ho hobela pela Jehova;
22 mme ke tla nne ke eketse, ke ipee lefeela ho feta le kajeno, ke nne ke iketse e monyenyane mahlong a ka; haele makgabunyane ao o a boletseng, wona a tla ntlhonepha.
23 Mikale, moradi wa Saule, ha a ka a tswala bana le ho isa tsatsing la ho shwa ha hae.