2 Samuele

¹¹Davida a eketsa a re ho Abishai le ho bahlanka ba hae bohle: Bonang, ha esita mora ka ya tswileng maleng ho nna, a pheheletse ho mpolaya, Mobenjamine eo o tshwanetse ho mo fetisa hakakang! Mo tloheleng, a nne a rohake, etswe Jehova a mo laetse. ¹²Ekaba Jehova o tla tadima tshwenyeho ya ka, hore Jehova a busetse botle ho nna bakeng sa hlapa tsa kajeno tsa motho eo. ¹³Kahoo Davida le banna ba hae ba ya pele ka tsela ya bona; Shimei yena a nna a ya le mothati wa thaba, malokana le Davida, a ya a ntse a rohakana, a mmetsa ka majwe, a thuntsha lerole. ¹⁴Davida, le batho bohle bao a nang le bona, ba fihla Ajefime, ba phomola teng. ¹⁵Haele Absalome, o ne a tlile Jerusalema, a ena le setjhaba sohle sa Iseraele, a ena le yena Akitofele. ¹⁶Yaba Hushai Moarke, motswalle wa Davida, o tla ho Absalome; Hushai a re ho Absalome: A ho phele morena! A ho phele morena! ¹⁷Absalome a re ho Hushai: Na ke lona lerato leo o ratang motswalle wa hao ka lona na? Ha o a ka wa ya le motswalle wa hao keng?