2 Samuele

¹⁷Absalome a re ho Hushai: Na ke lona lerato leo o ratang motswalle wa hao ka lona na? Ha o a ka wa ya le motswalle wa hao keng? ¹⁸Hushai a re ho Absalome: Tjhe; eo e leng ya kgethilweng ke Jehova, le ke setjhaba sena, le ke Baiseraele bohle, ke yena eo ke tla ba wa hae, ke dule ho yena. ¹⁹Hape, nka sebeletsa mang, haese mora hae? Jwalokaha ke sebeleditse ntatao, ke tla o sebeletsa le wena jwalo. ²⁰Ebile Absalome o re ho Akitofele: Eletsanang e le lona hore na e ka kgona re etse jwang? ²¹Akitofele a re ho Absalome: Kena ho direthe tsa ntatao, tseo a di siileng hore di lebele ntlo; etlare Baiseraele bohle ha ba utlwa hobane o ikentse ya nkgang ho ntatao, matsoho a bohle ba tlileng ho wena a tla tiiswa. ²²Ebile ho hlomelwa Absalome tente hodima ntlo, mme Absalome a kena ho direthe tsa ntatae pontsheng ho Baiseraele bohle. ²³Mehleng eo, keletso eo Akitofele a neng a eletsa ka yona, e be e kgodisa jwaloka eka ho botsitswe molomo wa Modimo. Keletso tsohle tsa Akitofele di ne di le kalo ho Davida le ho Absalome.