Josue

Simeonen leinuaren lurraldea

¹Bigarrenez zotz egin eta Simeonen leinuko senitarteei egokitu zitzaien. Haien ondarea Judaren leinuarenaren erdian zegoen. ²Hona hemen ondaretzat egokitu zitzaiena: Beer-Xeba, Xema, Molada, ³Hatzar-Xual, Bala, Ezem, ⁴Eltolad, Betul, Horma, ⁵Tziklag, Bet-Markabot, Hatzar-Susa, ⁶Bet-Lebaot eta Xaruhen: hamahiru hiri eta beraien herrixkak. ⁷Ain, Rimon, Eter eta Axan: lau hiri eta beraien herrixkak. ⁸Gainera, hiri horien inguruko herrixka guztiak Baalat-Beer hiriraino, hau da, Negeveko Ramateraino. Hori izan zen simeondarren ondarea, senitarteka banatua. ⁹Simeonen leinuaren ondarea Judaren lurralde-zatitik hartua zen, Judaren leinuarena handiegia baitzen beraientzat. Horregatik, Simeonen leinuak Judaren ondarearen barruan hartu zuen berea.

Zabulonen leinuaren lurraldea

¹⁰Hirugarrenez zotz egin eta Zabulonen leinuko senitarteei egokitu zitzaien. Haien ondarearen muga Sarideraino luzatzen zen. ¹¹Handik mendebalderantz, Maralara igotzen zen eta, Dabexet ukituz, Jokneamen aurrean dagoen errekaraino heltzen. ¹²Saridetik ekialdera bihurtzen zen, Kislot-Taborreko mugetaraino; gero, Daberateraino luzatzen zen eta Jafiara igotzen. ¹³Handik ekialderantz jarraituz, Gat-Hefer eta Ita-Kazindik igarotzen zen eta Rimon aldera hartzen zuen, Nea aldera okertzeko. ¹⁴Gero, iparraldetik, Hanaton aldera itzultzen zen eta Iftah-El errekan bukatzen. ¹⁵Lurraldeak beste hauek ere hartzen zituen: Katat, Nahalal, Ximron, Idala eta Belen; guztira hamabi hiri ziren, beren herrixkekin. ¹⁶Hori izan zen zabulondarren ondarea, senitarteka banatua, aipaturiko hiri eta herrixkak barne.

Isakarren leinuaren lurraldea

¹⁷Laugarrenez zotz egin eta Isakarren leinuko senitarteei egokitu zitzaien. ¹⁸Hona hemen haien lurraldeak hartzen zuena: Izreel, Kesulot, Xunem, ¹⁹Hafaraim, Xion, Anaharat, ²⁰Rabit, Kixion, Ebetz, ²¹Remet, En-Ganim, En-Hada eta Bet-Patzetz. ²²Muga, Tabor hiritik, Xahatzimatik eta Bet-Xemexetik igarotzen zen eta Jordan ibaian bukatzen; guztira hamasei hiri ziren, beren herrixkekin. ²³Hori izan zen isakartarren ondarea, senitarteka banatua, aipaturiko hiri eta herrixkak barne.

Axerren leinuaren lurraldea

²⁴Bosgarrenez zotz egin eta Axerren leinuko senitarteei egokitu zitzaien. ²⁵Hona hemen haien lurraldeak hartzen zuena: Helkat, Hali, Beten, Akxaf, ²⁶Alamelek, Amad eta Mixal. Mendebaldetik, muga Karmel mendiraino eta Xihor-Libnateraino heltzen zen. ²⁷Gero, ekialderantz bihurtzen zen, Bet-Dagoneraino, eta, Zabulonen leinuaren muga eta Iftah-El harana iparraldetik ukituz, Bet-Emek eta Neieldik jarraitzen zuen, eta ezkerraldetik Kabul, ²⁸Abdon, Rehob, Hamon eta Kanaraino luzatzen zen, Sidon hiribururaino helduz. ²⁹Handik, Rama-ra eta Tiro gotorlekura bihurtzen zen; gero, Hosarantz jotzen zuen, Mediterraneo itsasoan bukatzeko. Mahlab, Akzib, ³⁰Ako, Afek eta Rehob hiriak ere hartzen zituen; guztira hogeita bi hiri ziren, beren herrixkekin. ³¹Hori izan zen axertarren ondarea, senitarteka banatua, aipaturiko hiri eta herrixkak barne.

Neftaliren leinuaren lurraldea

³²Seigarrenez zotz egin eta Neftaliren leinuko senitarteei egokitu zitzaien. ³³Haien muga Helefetik eta Tzaananimgo arteondotik hasi eta Adami-Nekeb eta Jabneelen zehar Lakumeraino heltzen zen, eta Jordan ibaian bukatzen; ³⁴gero, mendebaldera itzultzen zen, Aznot-Taborrera, eta handik Hukokeraino heltzen. Mugak Zabulonen leinuaren lurraldea ukitzen zuen hegoaldetik, Axerrena mendebaldetik eta Jordan ibaia ekialdetik. ³⁵Lurraldeak honako hiri gotor hauek zituen: Tzidim, Tzer, Hamat, Rakat, Genesaret, ³⁶Adama, Rama, Hatzor, ³⁷Kedex, Edrei, En-Hatzor, ³⁸Iron, Migdal-El, Horem, Bet-Anat, Bet-Xemex; guztira hemeretzi hiri ziren, beren herrixkekin. ³⁹Hori izan zen neftalitarren ondarea, senitarteka banatua, aipaturiko hiri eta herrixkak barne.

Danen leinuaren lurraldea

⁴⁰Zazpigarrenez zotz egin eta Danen leinuko senitarteei egokitu zitzaien. ⁴¹Haien lurraldeak honako hiri hauek hartzen zituen: Tzora, Extaol, Ir-Xemex, ⁴²Xaalabin, Aialon, Itla, ⁴³Elon, Timnata, Ekron, ⁴⁴Elteke, Gibeton, Baalat, ⁴⁵Jehud, Bene-Berak, Gat-Rimon; ⁴⁶baita Jarkon erreka, Rakon eta Jafa aldera dagoen lurraldea ere. ⁴⁷Lurraldeak, ordea, ez zuen Danen leinukoen menpe iraun. Horregatik, Lexem hiriari erasotzera joan eta hartu egin zuten. Bertako bizilagunak ezpataz hil ondoren, hiriaz jabetu eta bertan jarri ziren bizitzen. Lexem zenari Dan izena ezarri zioten, beren arbasoaren izena. ⁴⁸Hori izan zen dandarren ondarea, senitarteka banatua, aipaturiko hiri eta herrixkak barne.

Lurraldearen banaketa bukatu

⁴⁹Lurraldea mugatu eta banatzen bukatu zutenean, israeldarrek Nunen seme Josueri ere eman zioten ondarea. ⁵⁰Jaunak agindu bezala, berak eskatua zuen hiria eman zioten, Timnat-Serah, alegia, Efraimgo mendialdean. Hiria berreraiki eta bertan jarri zen bizitzen Josue. ⁵¹Horra hor, bada, Eleazar apaizak, Nunen seme Josuek eta israeldar leinuetako senitarteburuek Xilon, Jaunaren aurrean, elkarketa-etxolaren sarreran zotz eginez, izendatu zituzten ondareak. Horrela burutu zuten lurraldearen banaketa.