20-46 O le fānauga a Reupena o le ulumatua a Isaraelu, o latou gafa i o latou itū‘āiga i ‘āiga o latou tamā, o le aofa‘i o igoa, o tane uma lava e ta‘ito‘atasi, e āfua mai i ē ‘ua luafulu o latou tausaga ‘atoa ma ē ‘ua matutua ai, o i latou uma lava e mafai ‘ona ō i le tau‘a, Itū‘āiga Faitauaofa‘iga Reupena: e fa sefulu o afe ma afe e ono ma le lima o selau Simeona: e lima sefulu o afe ma afe e iva ma le tolu o selau. Kato: e fa sefulu o afe ma afe e lima ma le ono o selau ma le lima o sefulu. Iuta: e fitu sefulu o afe ma afe e fa ma le ono o selau. Isakara: e lima sefulu o afe ma afe e fa ma le fa o selau Sepulona: e lima sefulu o afe ma afe e fitu ma le fa o selau. Efaraima: e fa sefulu o afe ma le lima o selau. Manase: e tolu sefulu o afe ma afe e lua ma le lua o selau. Peniamina: e tolu sefulu o afe ma afe e lima ma le fa o selau. Tanu: e ono sefulu o afe ma afe e lua ma le fitu o selau. Asera: e fa sefulu o afe ma le afe e tasi ma le lima o selau. Nafatali: e lima sefulu o afe ma afe e tolu ma le fa o selau. Tu‘ufa‘atasiga: e ono selau o afe ma afe e tolu ma le lima o selau ma le lima o sefulu.
47 A o sa Levī i le itū‘āiga o latou tamā e le‘i faitaulia fa‘atasi ma i latou.
48 Auā na fetalai mai le ALI‘I ‘iā Mose, ‘ua fa‘apea mai:
49 Tau lava o le itū‘āiga o Levi ‘aua ‘e te faitaulia, ‘aua fo‘i ‘e te faitau aofa‘i i latou fa‘atasi ma le fānauga a Isaraelu
50 a ‘ia e tofia sa Levī e pule i le malumalu ‘ua i ai le tulafono, ma ona ipu uma, ma ana mea uma; latou te tau‘ave le malumalu ma ona ipu uma; ma latou ‘au‘auna i ai; latou te tolauapi fo‘i fa‘ata‘ali‘oli‘o i le malumalu.
51 Pe a ‘ave le malumalu, e talaina lava e sa Levī; pe a tō fo‘i le malumalu, e fa‘atūina lava e sa Levī; a o le tagata ‘ese e fa‘alatalata i ai e fasiotia lava ia.
52 E tolauapi le fānauga a Isaraelu, po le tagata ma le toagalauapi o lona itū‘āiga, o le tagata fo‘i i le mea e i ai lo latou tagāvai, ‘iā latou ‘au.