1 ‘Ua fetalai mai fo‘i le ALI‘I ‘iā Mose, ‘ua fa‘apea mai:
2 ‘Ia e fai atu ‘iā Arona, ‘ia fa‘apea atu ‘iā te ia, Pe a e tutu lamepa, ia mumū mai lamepa e fitu i luma o le tu‘ugālamepa.
3 ‘Ona fa‘apea lea ‘ona faia e Arona; ‘ua tutu e ia lamepa i luma o le tu‘ugālamepa, e pei ‘ona poloa‘i mai ai o le ALI‘I ‘iā Mose.
4 Sa faia fo‘i lenei tu‘ugālamepa i le auro ‘ua togitogi fa‘amamanuina, o lona ‘au ‘atoa ma ona fuga ‘ua togitogi fa‘amamanuina; e pei o le fa‘atusa na fa‘aali mai e le ALI‘I ‘iā Mose, ‘ua fa‘apea ‘ona faia e ia o le tu‘ugālamepa.
5 ‘Ua fetalai mai fo‘i le ALI‘I ‘iā Mose, ‘ua fa‘apea mai:
6 ‘Inā ‘aumai ia o sa Levī ai le fānauga a Isaraelu, ma e fa‘amamā ‘iā te i latou.
7 O le mea fo‘i lenei ‘e te faia ‘iā te i latou e fa‘amamāina ai i latou; ‘ia e sausau atu ‘iā te i latou i le vai mo le agasala, ‘ia latou tafi fo‘i o latou tino uma i le tafi, ma ‘ia latou ta o latou ‘ofu, ma latou fa‘amamā ‘iā te i latou.
8 ‘Ona latou ‘ave ai lea o le povi po‘a ta‘anoa ma lana taulaga i mea e ‘ai, o le falaoa lelei ‘ua palua ma le u‘u, ‘e te ‘ave fo‘i se isi povi po‘a ta‘anoa e fai ma taulaga mo le agasala.
9 ‘Ona e fa‘alatalata mai ai lea o sa Levī i luma o le fale fetāfa‘i o le fa‘apotopotoga; ‘e te fa‘apotopotoina ai fo‘i le fa‘apotopotoga uma o le fānauga a Isaraelu;
10 ‘ona e fa‘alatalata mai ai lea o sa Levī i luma o le ALI‘I; e fa‘ae‘e fo‘i o le fānauga a Isaraelu o latou lima i luga o sa Levī;
11 e tu‘uina atu fo‘i e Arona o sa Levī i luma o le ALI‘I, o le taulaga lūlū lea a le fānauga a Isaraelu, ‘ina ‘ia latou ‘au‘auna i le galuega a le ALI‘I.
12 ‘Ona fa‘ae‘e ai lea e sa Levī o latou lima i luga o ulu o povi po‘a ta‘anoa; ‘e te fai a‘i fo‘i le tasi ma taulaga mo le agasala, ma le tasi e fai ma taulaga mū i le ALI‘I, e togiolaina ai sa Levī.
13 ‘E te tu‘uina fo‘i sa Levī i luma o Arona ma luma o ona atali‘i, ‘e te ‘aveina atu fo‘i i latou e fai ma taulaga lūlū i le ALI‘I.
14 ‘Ia fa‘apea ‘ona e vavae‘eseina o sa Levī; i le fānauga a Isaraelu; e fai mo‘u o sa Levī;
15 E mulimuli ane ‘ona ulu atu ai lea o sa Levī; e ‘au‘auna i le fale fetāfa‘i o le fa‘apotopotoga; ‘e te fa‘amamāina i latou ma e ‘aveina atu i latou e fai ma taulaga lūlū.
16 Auā ‘ua matuā foa‘iina lava i latou mo a‘u a‘i le fānauga a Isaraelu; ‘ua ‘ou fai lava i latou mo‘u e sui a‘i i latou uma o ē mua‘i fānau, o ulumatua uma ia a le fānauga a Isaraelu.
17 Auā o ulumatua uma a le fānauga a Isaraelu o ‘ou lava i latou, o tagata ‘atoa ma manu o le aso lava na ‘ou fasioti ai ulumatua uma i le nu‘u o Aikupito na ‘ou fa‘asāina ai i latou mo‘u.
18 ‘Ua ‘ou ‘ave fo‘i sa Levī e sui a‘i ulumatua uma lava a le fānauga a Isaraelu.
19 ‘Ua ‘ou foa‘iina fo‘i sa Levī; ‘ua foa‘iina lava ‘iā Arona ma ona atali‘i a‘i le fānauga a Isaraelu, ‘ina ‘ia ‘au‘auna i latou i le galuega a le fānauga a Isaraelu i le fale fetāfa‘i o le fa‘apotopotoga, latou te fai fo‘i le togiola mo le fānauga a Isaraelu, ‘ina ‘ia leai se mala i le fānauga a Isaraelu pe a fa‘alatalata atu le fānauga a Isaraelu i le malumalu.
20 ‘Ona fai ai lava lea e Mose, ma Arona, ma le fa‘apotopotoga uma o le fānauga a Isaraelu i sa Levī; e tusa ma mea uma na poloa‘i mai ai le ALI‘I ‘iā Mose i sa Levī; ‘ua fa‘apea lava ‘ona fai ‘iā te i latou e le fānauga a Isaraelu.
21 O sa Levī; fo‘i ‘ua fa‘amamāina i latou e i latou, ma latou ta o latou ‘ofu; ‘ua ‘aveina atu i latou e Arona e fai ma taulaga lūlū i luma o le ALI‘I, ‘ua faia fo‘i e Arona le togiola mo i latou ‘ina ‘ia fa‘amamāina i latou.
22 E mulimuli ane ‘ona ulu atu ai lea o sa Levī e ‘au‘auna ‘iā latou galuega i le fale fetāfa‘i o le fa‘apotopotoga i luma o Arona ma luma o ona atali‘i; e pei ‘ona poloa‘i mai ai o le ALI‘I ‘iā Mose i sa Levī; ‘ua fa‘apea lava ‘ona latou faia ‘iā te i latou.
23 ‘Ua fetalai mai fo‘i le ALI‘I ‘iā Mose, ‘ua fa‘apea mai:
24 O le mea lenei ‘ua i sa Levī; e āfua mai i ē ‘ua luafulu ma le lima o latou tausaga ‘atoa ma ē ‘ua matutua ai, latou te ulu atu ai e ‘au‘auna i le galuega o le fale fetāfa‘i o le fa‘apotopotoga;
25 a limagafulu o latou tausaga, ‘ona latou tu‘u ai lea ‘ona ‘au‘auna i le galuega, ma latou le toe ‘au‘auna ai lava;
26 ‘ae latou te ‘au‘auna fa‘atasi mai o latou uso i le fale fetāfa‘i o le fa‘apotopotoga, ‘ina ‘ia tausi i le tausiga, ‘ae peita‘i latou te lē ‘au‘auna i le galuega. ‘Ia fa‘apea ‘ona e faia i sa Levī; i o latou faiva.#