1 ‘Ua nonofo Isaraelu i Setima; ‘ona amata lea ‘ona faita‘aga o le nu‘u ma fafine o Moapi.
2 ‘Ua latou ‘a‘ami fo‘i i le nu‘u i taulaga i o latou atua; ‘ona ‘a‘ai ai lea o le nu‘u ma ifo atu i o latou atua.
3 ‘Ua fa‘atasia fo‘i Isaraelu ma Paalapeoro; ‘ona tupu ai lea o le to‘asā o le ALI‘I ‘iā Isaraelu.
4 ‘Ona fetalai mai ai lea o le ALI‘I ‘iā Mose, “‘Ia e ‘ave ali‘i uma o le nu‘u, ma fa‘atautau ‘iā te i latou i le lā, i luma o le ALI‘I, ‘ina ‘ia liu‘esea le to‘asā tele o le ALI‘I ‘iā Isaraelu.”
5 ‘Ona fai atu ai lea o Mose i fa‘amasino o Isaraelu, “‘Ia ‘outou ta‘itasi ma fasioti i ona tagata na latou fa‘atasi ma Paalapeoro.”
6 Fa‘auta fo‘i, o le tasi tagata mai le fānauga a Isaraelu ‘ua sau, ‘ua ia ‘aumai i ona uso o le fafine Mitiana, i luma o Mose, ma luma o le fa‘apotopotoga uma o le fānauga a Isaraelu, a o fētāgisi i latou i le faitoto‘a o le fale fetāfa‘i o le fa‘apotopotoga.
7 ‘Ua iloa fo‘i e Fineaso le atali‘i o Eleasaro, o le atali‘i ia o Arona le ositaulaga; ‘ona tula‘i ai lea o ia i totonu o le fa‘apotopotoga, ‘ua ‘ave le tao i lona lima.
8 ‘Ua mulimuli atu fo‘i o ia i le tagata o Isaraelu i le afeafe, ‘ua soso‘a ‘ua ati ‘iā te i lā‘ua, o le tagata o Isaraelu, ‘atoa fo‘i ma le fafine i lona manava; ‘ona tāofia ai lea o le fa‘ama‘i a‘i le fānauga a Isaraelu.
9 O ē na oti fo‘i i le fa‘ama‘i e luafulu o afe ma le fa o afe i latou.
10 ‘Ona fetalai mai ai lea o le ALI‘I ‘iā Mose, ‘ua fa‘apea mai,
11 “O Fineaso le atali‘i o Eleasaro, o le atali‘i o Arona le ositaulaga ‘ua liu‘eseina ai lo‘u ita i le fānauga a Isaraelu, i lo‘u mā‘elegā ‘iā te i latou, ‘ua ‘ou lē fa‘aumatia ai le fānauga a Isaraelu i lo‘u fuā.
12 O lenei, ‘ia e fai atu, ‘Fa‘auta, ‘ou te tu‘uina atu ‘iā te ia la‘u feagaiga e manuia ai.
13 E ‘iā te ia ma lana fānau pe a mavae atu o ia, o le feagaiga o le faiva o le ositaulaga e fa‘avavau, auā na mā‘elegā o ia ‘ona o lona Atua, na faia fo‘i e ia le togiola mo le fānauga a Isaraelu.’”
14 O le igoa fo‘i o le tagata Isaraelu na fasiotia, o lē na fasiotia fa‘atasi ma le fafine Mitiana, o Semeri le atali‘i o Salu, o le ali‘i sili fo‘i o ia o le tasi ‘āiga o sa Simeonā.
15 O le igoa fo‘i o le fafine Mitiana ‘ua fasiotia, o Kosepi le afafine o Suro, o le ali‘i sili o ia o le tasi ‘āiga o Mitiana.
16 ‘Ua fetalai mai fo‘i le ALI‘I ‘iā Mose ‘ua fa‘apea mai,
17 “‘Ia ‘outou fa‘atigā ‘iā Mitiana, ma fafasi ‘iā te i latou;
18 auā ‘ua latou fa‘atigā ‘iā te ‘outou ‘iā latou mailei, ‘ua latou maileia ai ‘outou i le mea a Peoro, ma le mea a Kosepi le afafine o le tasi ali‘i sili o Mitiana, o lo latou fafine na fasiotia i le aso o le fa‘ama‘i ‘ona o le mea a Peoro.”