1 ‘Ona fai atu ai lea o Palaamo ‘ia Palako, “‘Ia e faia ‘i‘inei mo a‘u o fatafaitaulaga e fitu, ma sauniuni mai ‘i‘inei mo a‘u o povi po‘a e fitu ma mamoe po‘a e fitu.”
2 ‘Ua faia fo‘i e Palako e pei ‘ona fai atu ai a Palaamo; ‘ona osi ai lea e Palako ma Palaamo ‘ua ta‘itasi ai i fatafaitaulaga o le povi po‘a ma le mamoe po‘a.
3 ‘Ona fai atu ai lea o Palaamo ‘iā Palako, “‘Ia e tu latalata ane i lau taulaga mū; a ‘ou alu, atonu e afio mai le ALI‘I ma te fetaia‘i ma a‘u; o le ‘upu fo‘i na te fa‘aali mai ‘iā te a‘u, ‘ou te ta‘uatua ‘iā te oe.” ‘Ona alu ai lea o ia i le mea maualuga.
4 ‘Ua afio mai fo‘i le Atua ‘iā Palaamo; ‘ona fa‘apea atu ai lea o ia ‘iā te ia, “‘Ua ‘ou saunia fatafaitaulaga e fitu, ma ‘ou osia e ta‘itasi ai i fatafaitaulaga o le povi po‘a ma le mamoe po‘a.”
5 ‘Ona tu‘uina mai lea e le ALI‘I le ‘upu i le gutu o Palaamo, na fa‘apea mai, “‘Inā fo‘i atu ia ‘iā Palako, ma ia fa‘apea ‘ona e fai atu ai.”
6 ‘Ona toe fo‘i atu ia lea o ia ‘iā te ia, fa‘auta fo‘i, ‘ua tu o ia e lata ane i lana taulaga mū, o ia ma ali‘i uma o Moapi.
7 ‘Ona saunia ai lea e ia o lana fa‘ata‘oto, ‘ua fa‘apea atu,“Na ‘amia a‘u e Palako, le tupu o Moapi mai Arama,mai le atu mauga i sasa‘e, ‘ua fa‘apea mai o ia,‘‘Inā sau ia, ‘ia e fetu‘u ‘iā Iakopo mo a‘u;‘inā sau ia ‘ia e fa‘afano ‘iā Isaraelu.’
8 Pe fa‘apefea ‘ona ‘ou fetu‘u i lē ‘ua lē fetu‘uina e le Atua?pe fa‘apefea fo‘i ‘ona ‘ou fa‘afano i lē ‘ua lē fa‘afanoa e le ALI‘I?
9 Auā ‘ou te iloa atu o ia a‘i tumutumu o papa,‘ou te va‘aia o ia mai mauga;fa‘auta, e nonofo nu‘u na o i latou lava;‘ae lē ta‘ufa‘atasia i latou ma nu‘u ‘ese.
10 O ai ‘ea na te mafaia ‘ona faitau le efuefu o Iakopo,po o le aofa‘i o lona vaega e fa o Isaraelu?‘Ia oti lava a‘u i le oti o ē ‘ua amiotonu ia tusa fo‘i lo‘u i‘uga ma lona.”
11 ‘Ona fai mai ai lea o Palako ‘iā Palaamo, “Se a ‘ea lenei mea ‘ua e faia ‘iā te a‘u? Na ‘ou ‘amia oe e fetu‘u i o‘u fili, fa‘auta mai fo‘i, ‘ua e fa‘amanuia atu ai lava.”
12 ‘Ona tali atu ai lea o ia, ‘ua fa‘apea atu, “‘Ou te lē ‘ana‘ana ‘ea e ta‘u atu le ‘upu ‘ua tu‘uina mai e le ALI‘I i lo‘u gutu.”
13 ‘Ona fai mai ai lea o Palako ‘iā te ia, “‘Ou te ‘ai‘oi atu lava, ‘ia tā ō atu i se tasi mea ‘e te iloa atu ai i latou i lea mea; tau lava o ē aupito mai ‘e te iloa, a ‘e te lē iloa atu i latou uma; ‘e te fetu‘u atu fo‘i ‘iā te i latou i lea mea mo a‘u.”
14 ‘Ona ‘ave ai lea o ia ‘iā te ia i le fanua o Sofima i le tumutumu o Peseka; ‘ua faia fo‘i e ia o fatafaitaulaga e fitu; ‘ua ia osia fo‘i o le povi po‘a ma le mamoe po‘a ‘ua ta‘itasi ai i fatafaitaulaga.
15 ‘Ona fai atu ai lea o ia ‘iā Palako, “‘Ia e tu ‘i‘inei ‘ia lata ane i lau taulaga mū; a o a‘u, ma te fetaia‘i ma le ALI‘I i ō.”
16 ‘Ua afio mai fo‘i le ALI‘I ‘iā Palaamo, ma tu‘u mai le ‘upu i lona gutu, ‘ua fa‘apea mai, “‘Ia e toe fo‘i atu ‘iā Palako, ma ia fa‘apea ‘ona e fai atu.”
17 ‘Ona alu atu ai lea o ia ‘iā te ia, fa‘auta fo‘i, ‘ua tu o ia e lata ane i lana taulaga mū, sa ‘iā te ia fo‘i o ali‘i o Moapi. ‘Ona fai mai ai lea o Palako ‘iā te ia, “Se a ‘ea se fetalaiga mai le ALI‘I?”
18 ‘Ona saunia ai lea e ia o lana fa‘ata‘oto, ‘ua fa‘apea atu:“Palako e, ‘inā tula‘i mai ia, ma fa‘afofoga mai,‘ia liliu mai ou fofoga ‘iā te a‘u, o oe na le atali‘i o Seporu.
19 E lē se tagata le Atua e tala pepelo ai o ia,po o se atali‘i o se tagata e salamō ai o ia;‘ua fetalai mai o ia, na te lē faia ‘ea?‘ua fetalai mai fo‘i o ia na te lē fa‘ataunu‘uina ‘ea?
20 Fa‘auta na tu‘uina mai ‘iā te a‘u e fa‘amanuia atu;‘ua uma fo‘i ‘ona fa‘amanuia e ia, ‘ou te lē maliua.
21 Na te lē silafia se leaga ‘iā Iakopo;na te lē silafia fo‘i se agasala ‘iā Isaraelu;o lo‘o ‘iā te ia le ALI‘I lona Atua,o lo‘o ‘iā te ia le ‘alaga i le tupu.
22 ‘Ua ‘aumaia i latou e le Atua a‘i Aikupito;‘ua ‘iā te ia e peiseaī o le tele vave o le rema.
23 Auā e leai se mātemāte ‘iā Iakopo,po o se togafiti fa‘ataulāitu ‘iā Isaraelu;o ona po nei e fa‘apea mai ai ‘iā Iakopo ‘atoa ma Isaraelu.‘Fa‘auta i mea ‘ua faia e le Atua!’
24 Fa‘auta, e tula‘i le nu‘u e pei se leona fafine,e tula‘i lava ia e pei se leona; e lē toe ta‘otose‘ia na ‘aina le mea ‘ua saeia, ma inumia e ia le toto o ē ‘ua fasia.”
25 ‘Ona fai mai ai lea o Palako ‘iā Palaamo, “‘Aua lava ‘e te fetu‘u ‘iā te i latou, ‘aua fo‘i ‘e te fa‘amanuia atu ‘iā te i latou.”
26 A ‘ua tali atu Palaamo, ‘ua fa‘apea atu ‘iā Palako, “‘Ou te le‘i fai atu ‘ea ‘iā te oe, ‘ua fa‘apea atu, ‘O mea uma e fetalai mai ai le ALI‘I, o mea ia ‘ou te faia.’”
27 ‘Ona fai mai ai lea o Palako ‘iā Palaamo, “‘Inā sau ia, tā te ō ma a‘u i se tasi mea, atonu e tatau i le Atua ‘ona e fetu‘uina ai o i latou i lea mea mo a‘u.”
28 ‘Ona ‘aveina a‘e lea o Palaamo e Palako i le tumutumu o Peoro e fesagai ma le vao.
29 ‘Ona fai atu ai lea o Palaamo ‘iā Palako, “‘Ia e faia ‘i‘inei mo a‘u o fatafaitaulaga e fitu, ma sauniuni mai ‘i‘inei mo a‘u o povi po‘a e fitu ma mamoe po‘a o fitu.”
30 ‘Ona fai ai lea e Palako e pei ‘ona fai atu ai o Palaamo, ‘ua ia osia fo‘i le Povi po‘a ma le mamoe po‘a, ‘ua ta‘itasi ai i fatafaitaulaga.