1 ‘Ua mavae le fa‘ama‘i, ‘ona fetalai mai lea o le ALI‘I ‘iā Mose ma Eleasaro le atali‘i o Arona le ositaulaga, ‘ua fa‘apea mai,
2 “‘Inā faitau mai ia le aofa‘i o le fa‘apotopotoga uma o le fānauga a Isaraelu, e āfua mai ē ‘ua luafulu o latou tausaga, ‘atoa ma ē ‘ua matutua ai, i ‘āiga o latou tamā; ‘atoa uma o Isaraelu e mafai ‘ona ō i le tau‘a.”
3 ‘Ua fai atu fo‘i Mose ma Eleasaro le ositaulaga ‘iā te i latou i le ‘ele‘ele laugatasi o Moapi, e latalata ane i Ioritana, e fesagai ma Ieriko, ‘ua fa‘apea atu,
4 “‘Inā faitau mai ia ē āfua mai i ē ‘ua luafulu o latou tausaga, ‘atoa ma ē ‘ua matutua ai;” e pei ‘ona poloa‘i mai ai o le ALI‘I ‘iā Mose ma le fānauga a Isaraelu na ō mai mai le nu‘u o Aikupito.
5 O Reupena, o le ulumatua a Isaraelu; o atali‘i o Reupena; o Enoka, na tupu mai ai le ‘āiga sa Enokā; mai ‘iā Falu le ‘āiga sa Falū;
6 mai ‘iā Esarona le ‘āiga o sa Esaronā; mai ‘iā Karame le ‘āiga o sa Karamē.
7 O ‘āiga ia o sa Reupenā; o latou fo‘i na faitaulia e fa sefulu o afe ma afe e tolu ma le fitu o selau ma le to‘atolu sefulu.
8 O le atali‘i fo‘i o Falu, o Eliapo.
9 O atali‘i fo‘i o Eliapo, o Nemueli, ma Tatano, ma Apiramo; o Tatano ma Apiramo ia sa ta‘ua i le fa‘apotopotoga, na la fa‘amisa ‘iā Mose ma Arona, fa‘atasi ma ē na ‘au ma Koru, ‘ina ‘ua latou fa‘amisa i le ALI‘I.
10 Na fa‘amaga le gutu o le ‘ele‘ele, ma folo ifo ‘iā te i latou fa‘atasi ma Koru, ‘ina ‘ua oti lea fa‘apotopotoga, ‘ina ‘ua fa‘aumatia i le afi o tagata e to‘alua lau ma le to‘alimagafulu; na faia fo‘i i latou ma fa‘ailoga.
11 A o atali‘i o Koru na lē oti i latou.
12 O atali‘i o Simeona i o latou ‘āiga; na tupu mai ia Nemuelu o le ‘āiga o sa Nemuelū; mai ia Iaminu o le ‘āiga o sa Iaminū; mai ia Iakinu o le ‘āiga o sa Iakinū;
13 mai ‘iā Sera o le ‘āiga o sa Serā; mai ‘iā Saulo o le ‘āiga o sa Saulō.
14 O ‘āiga ia o a Simeonā, e lua sefulu o afe ma afe e lua ma le to‘alua selau.
15 O atali‘i o Kato i o latou ‘āiga; na tupu mai ia Sefiono o le ‘āiga o sa Sefionō; mai ‘iā Haki o le ‘āiga o sa Hakī; mai ia Suni o le ‘āiga o sa Sunī,
16 mai ‘iā Aseni o le ‘āiga o sa Asenī; mai ‘iā Eri o le ‘āiga o sa Erī;
17 mai ‘iā Aroti o le ‘āiga o sa Arotī; mai ‘iā Areli o le ‘āiga o ē sa Arelī.
18 O ‘āiga ia o atali‘i o Kato; o i latou na faitaulia, e fa sefulu o afe ma le to‘alima selau.
19 O atali‘i o Iuta, o Eru ma Onani; na oti Eru ma Onani i le nu‘u o Kanana.
20 O atali‘i fo‘i ia o Iuta i o latou ‘āiga; na tupu mai ‘iā Sila o le ‘āiga o sa Silā; mai ‘iā Faresa o le ‘āiga o sa Faresā; mai ‘iā Sera o le ‘āiga o sa Serā.
21 O atali‘i fo‘i ia o Faresa; na tupu mai ‘iā Esarona o le ‘āiga o sa Esaronā; mai ‘iā Hamulu o le ‘āiga o sa Hamulū.
22 O ‘āiga ia o Iuta; o i latou na faitaulia, e fitu sefulu o afe ma afe e ono ma le to‘alima selau.
23 O atali‘i o Isakara i o latou ‘āiga; na tupu mai ‘iā Tulaga o le ‘āiga o sa Tulagā; mai ‘iā Pua o le ‘āiga o sa Puā;
24 mai ‘iā Iasuvi o le ‘āiga o sa Iasuvī; mai ‘iā Semarona o le ‘āiga o sa Semaronā.
25 O ‘āiga ia o Isakara; o i latou na faitaulia, e ono sefulu o afe ma afe e fa ma le to‘atolu selau.
26 O atali‘i o Sepulona i o latou ‘āiga; na tupu mai ‘iā Seretu o le ‘āiga o sa Seretū; mai ‘iā Aluna o le ‘āiga o sa Alunā; mai ‘iā Ialelu o le ‘āiga o sa Ialelū.
27 O ‘āiga ia o sa Sepulona; o i latou na faitaulia, e ono sefulu o afe ma le to‘alima selau.
28 O atali‘i o Iosefa i o latou ‘āiga, o Manase ma Efaraima.
29 O atali‘i o Manase; na tupu mai ‘iā Makiro o le ‘āiga o sa Makirō; na fānaua fo‘i e Makiro o Kiliata; mai ‘iā Kiliata o le ‘āiga o sa Kiliatā.
30 O atali‘i ia o Kiliata; mai ‘iā Ieseru o le ‘āiga o sa Ieserū; mai ‘iā Eleka o le ‘āiga o sa Elekā;
31 mai ‘iā Aserieli o le ‘āiga o sa Aserielī mai ‘iā Sakema o le ‘āiga o sa Sakemā;
32 mai ‘iā Semita o le ‘āiga o sa Semitā; mai ‘iā Eferu o le ‘āiga o sa Eferū.
33 O Selofeata o le atali‘i o Eferu, e leai ni ona atali‘i, na o afafine; o igoa fo‘i ia o afafine o Selofeata, o Maala, ma Noa, ma Hakelu, ma Meleka, ma Tiresa.
34 O ‘āiga ia o Manase; o i latou na faitaulia, e lima sefulu o afe ma afe e lua ma le to‘afitu selau.
35 O atali‘i ia o Efaraima i o latou ‘āiga; na tupu mai ‘iā Sutelu o le ‘āiga o sa Sutelū; mai ‘iā Pekaru o le ‘āiga o sa Pekarū; mai ‘iā Taana o le ‘āiga o sa Taanā.
36 O atali‘i ia o Sutelu; mai ‘iā Erana o le ‘āiga o sa Eranā.
37 O ‘āiga ia o atali‘i o Efaraima; o i latou na faitaulia, e tolu sefulu o afe ma afe e lua ma le to‘alima selau o atali‘i ia o Iosefa i o latou ‘āiga.
38 O atali‘i o Peniamina i o latou ‘āiga; na tupu mai ia Pela o le ‘āiga o sa Pelā; mai ‘iā Asepelu o le ‘āiga o sa Asepelū; mai ‘iā Airamo o le ‘āiga o sa Airamō;
39 mai ‘iā Supimo o le ‘āiga o sa Supimō; mai ‘iā Hupimo o le ‘āiga o sa Hupimō;
40 O atali‘i ia o Pela, o Aratu ma Naamanu; mai ‘iā Aratu o le ‘āiga o sa Aratū; mai ‘iā Naamanu o le ‘āiga o sa Naamanū.
41 O atali‘i ia o Peniamina i o latou ‘āiga; o i latou na faitaulia, e fa sefulu o afe ma afe e lima ma le to‘aono selau.
42 O atali‘i ia o Tanu i o latou ‘āiga; na tupu mai ‘iā Suama o le ‘āiga o sa Suamā o ‘āiga ia o Tanu i o latou ‘āiga.
43 O ‘āiga uma o sa Suamā o i latou na faitaulia, e ono sefulu o afe ma afe e fa ma le to‘afa selau.
44 O atali‘i o Asera i o latou ‘āiga; na tupu mai ‘iā Iemina o le ‘āiga o sa Ieminā; mai ia Iesivi o le ‘āiga o sa Iesivī; mai ‘iā Peria o le ‘āiga o sa Periā.
45 O atali‘i o Peria; mai ‘iā Kaveru o le ‘āiga o sa Kaverū; mai ‘iā Mekielu o le ‘āiga o sa Mekielū.
46 O le igoa fo‘i o le afafine o Asera o Sera.
47 O ‘āiga ia o atali‘i o Asera, o i latou na faitaulia, e lima sefulu o afe ma afe e tolu ma le to‘afa selau.
48 O atali‘i o Nafatali i o latou ‘āiga; na tupu mai ‘iā Iasielu o le ‘āiga o sa Iasielū; mai ‘iā Kuni o le ‘āiga o sa Kunī.
49 mai ‘iā Iesaru o le ‘āiga o sa Iesarū; mai ‘iā Selimo o le ‘āiga o sa Selimō.
50 O ‘āiga ia o Nafatali i o latou ‘āiga; o i latou na faitaulia, e fa sefulu o afe ma afe e lima ma le to‘afa o selau.
51 O i latou ia o le fānauga a Isaraelu na faitaulia, e ono selau o afe ma le afe e tasi ma le fitu selau ma le to‘atolu sefulu.
52 ‘Ona fetalai mai ai lea o le ALI‘I ‘iā Mose, ‘ua fa‘apea mai:
53 O i latou ia ia tufatufaina atu i ai le fanua e fai ma tofi, ‘ia fa‘atatau i le faitau o igoa;
54 o ē to‘atele ia e avatu i ai le tofi ‘ia tele; a o ē to‘aitiiti ‘ia e avatu i ai le tofi ‘ia itiiti; ‘e te avatu lona tofi i le tagata e tusa ma le faitau o ē ‘ua ‘iā te ia.
55 ‘Ae peita‘i e tufatufaina le fanua i le vili; e fai fo‘i o latou tofi e tusa ma igoa o itū‘āiga o latou tamā;
56 o tufatufaina fo‘i e tusa ma le vili o le tofi i ē to‘atele ‘atoa fo‘i ma ē to‘aitiiti.
57 O i latou fo‘i ia na faitaulia i sa Levī i o latou ‘āiga; na tupu mai ‘iā Keresona o le ‘āiga o sa Keresonā; mai ‘iā Koato o le ‘āiga o sa Koatō mai ‘iā Merari o le ‘āiga o sa Merarī.
58 O ‘āiga ia o Levi o Le ‘āiga o sa Lepenī, o le ‘āiga o sa Heperonā, o le ‘āiga o sa Maalī, o le ‘āiga o sa Musē, o le ‘āiga o sa Korū. Na fānaua fo‘i e Koato o Amaramo.
59 O le igoa fo‘i o le avā a Amaramo o Iokapeta, o le afafine ia o Levi, na fānaua o ia ‘iā Levi i Aikupito; na fānaua fo‘i e ia ‘ia Amaramo o Arona, ma Mose, ma lo la tuafafine o Miriama.
60 Na fānaua fo‘i ‘iā Arona o Natapu ma Aviu, o Eleasaro ma Itamaro.
61 A ‘ua oti Natapu ma Aviu ‘ina o la avatu le afi ‘ese i luma o le ALI‘I.
62 O i latou fo‘i na faitaulia e lua sefulu o afe ma afe e tolu, o tane uma, e āfua mai i ē ‘ua tasi lo latou masina, ‘atoa ma ē ‘ua matutua ai; auā e le‘i faitaulia i latou fa‘atasi ma le fānauga a Isaraelu, ‘ona ‘ua lē avatua se tofi ‘iā te i latou fa‘atasi ma le fānauga a Isaraelu
63 O i latou ia na faitaulia e Mose ma Eleasaro le ositaulaga; o i lā‘ua na faitaulia le fānauga a Isaraelu i le ‘ele‘ele laugatasi o Moapi, e latalata ane i Ioritana, e fesagai ma Ieriko.
64 ‘Ae lē o i ai ‘iā te i latou nei se tagata e to‘atasi na faitaulia e Mose ma Arona le ositaulaga, ‘ina o la faitaulia le fānauga a Isaraelu i le vao o Sinai.
65 Auā na fetalai mai le ALI‘I ‘iā te i latou, “E matuā oti lava i latou i le vao. Na le toe lava so latou e to‘atasi; na o Kalepo le atali‘i o Iefune, ma Iosua le atali‘i o Nuno.” #