1 ‘Ua fetalai mai fo‘i le ALI‘I ‘iā Mose, ‘ua fa‘apea mai,
2 “‘Ia e ‘a‘auina atu tagata, latou te asiasi le nu‘u o Kanana ‘ou te foa‘iina i le fānauga a Isaraelu, e ta‘ito‘atasi le tagata i itū‘āiga o latou tamā ‘ia e ‘a‘auina atu ai, o ali‘i uma i latou ‘iā te i latou.”
3 ‘Ona ‘a‘auina atu ai lea o i latou e Mose a‘i le vao o Parana e tusa ma le afioga a le ALI‘I; o ia tagata uma lava o matai i latou o le fānauga a Isaraelu.
4-15 O latou igoa fo‘i nei; Itū‘āiga O Matai Reupena o Samua o le atali‘i o Sakuro Simeona o Safata o le atali‘i o Hori Iuta o Kalepo o le atali‘i o Iefune Isakara o Ikalo o le atali‘i o Iosefa Efaraima o Hosea o le atali‘i o Nuno Peniamina o Paleti o le atali‘i o Rafo Sepulona o Katieli o le atali‘i o Soti Manase o Kati o le atali‘i o Suse Tanu o Amueli o le atali‘i o Kameli Asera o Seturi o le atali‘i o Mekaeli Nafatali o Naepi o le atali‘i o Vapese Kato o Keueli o le atali‘i o Maki
16 O igoa ia o tagata na ‘a‘auina e Mose e asiasi le nu‘u. ‘Ua fa‘aigoa fo‘i e Mose ‘iā Hosea le atali‘i o Nuno o Iosua.
17 ‘Ua ‘a‘auina atu i latou e Mose e asiasi i le nu‘u o Kanana, ‘ua fai atu fo‘i ‘iā te i latou, “‘Inā ō a‘e ia ‘outou i lenei ala i le itū i saute, ma ō a‘e i le mauga.
18 ‘Ia ‘outou matamata i le lau‘ele‘ele pe fa‘apefea ia, ma tagata e nonofo ai, pe malolosi i latou pe vaivai, pe to‘aitiiti i latou pe to‘atele,
19 pe fa‘apefea fo‘i le lau‘ele‘ele ‘ua latou nonofo ai, pe lelei pe leaga, pe fa‘apefea fo‘i ‘a‘ai ‘ua latou nonofo ai, pe nonofo fa‘atoagalauapi, pe nofo ‘olo;
20 pe fa‘apefea fo‘i le lau‘ele‘ele, pe lafulemū pe lafuā; pe i ai ni la‘au pe leai; ‘ina fa‘alototetele ia ‘outou, ‘ia ‘outou ‘aumai fo‘i ni fua o le fanua.” (O ona po fo‘i ia o vine e mua‘i matutua.)
21 ‘Ona latou ō a‘e ai lea ma latou matamata i le nu‘u, e amata i le vao o Tisina e o‘o i Reopa e ui ai i Amato.
22 ‘Ua latou ō a‘e i le itū i saute, ma latou o‘o atu i Heperona, sa i ai o Aimano, ma Sesai, ma Talemai, o le fānau i latou a Anaki. (Na faia Heperona e muamua i Soana i Aikupito, e fitu lava tausaga na vā a‘i i lā‘ua.)
23 ‘Ua o‘o fo‘i i latou i le alia o Esekolo, ‘ona latou sala ai lea o le la o le vine ma le fuifui vine e tasi, ‘ua tausoa e le to‘alua i le amo, ‘ua ‘aumai fo‘i e i latou ni rimoni ma ni mati.
24 Na fa‘aigoa fo‘i lenā mea o le alia o Esekolo, ‘ona o le fuifui vine na sala mai ai e le fānauga a Isaraelu.
25 ‘Ua mavae po e fagafulu, ‘ona fo‘i mai ai lea o i latou i le asiasiga o le nu‘u.
26 ‘Ua latou toe ō mai ia Mose, ma Arona, ma le fa‘apotopotoga uma lava o le fānauga a Isaraelu i le vao o Parana, i Katesa; ‘ua latou ‘aumai la latou tala ‘iā te i latou ma fa‘apotopotoga uma, ‘ua latou fa‘aali mai fo‘i ‘iā te i latou o fua o le fanua.
27 ‘Ua latou talatala mai fo‘i ‘iā te ia, ‘ua fa‘apea mai, “Na matou o‘o atu i le nu‘u na e ‘a‘auina i ai i matou, e moni fo‘i ‘ua tafe ai le suāsusu ma le meli, o ona fua fo‘i nei.
28 ‘Ae peita‘i ane e malolosi lava tagata o nonofo i le nu‘u, o ‘a‘ai fo‘i e nofo ‘olo e matuā tetele lava; i le ma lea fo‘i na matou iloa ai le fānau a Anaki.
29 O lo‘o nonofo Amaleka i le nu‘u i le itū i saute; o sa Hetī fo‘i, ma sa Iepusē, ma sa Amorī, o lo‘o nonofo i latou i mauga; o sa Kananā fo‘i o lo‘o nonofo i latou e lata ane i le sami ‘atoa ma le itū e i ai Ioritana.”
30 ‘Ona vavao ai loa e Kalepo i le nu‘u ‘ia filemū i luma o Mose, ‘ua fa‘apea atu, “Se‘i tatou matuā ō a‘e lava i ai, ma fai ai mo i tatou; auā e mafai lava ‘ona tatou manumālō ai.”
31 ‘Ona fai ane ai lea o ia tagata na ō a‘e ma ia, “Tatou te lē mafaia ‘ona ō a‘e e tau ma lenā nu‘u; auā e sili lo latou malosi i lo tatou.”
32 ‘Ua latou fai tala leaga mai fo‘i i le fānauga a Isaraelu i le nu‘u na latou asiasi i ai, ‘ua fa‘apea mai, “O le nu‘u na matou ō atu i ai e asiasi i ai, o le nu‘u lava lea e fa‘aumatia e o nonofo ai, o tagata uma fo‘i na matou iloa ai o tagata tino ‘e‘ese lava i latou.
33 Na matou iloa ai fo‘i tagata maualuluga, o atali‘i o Anaki, na tutupu mai i tagata maualuluga; e pei ni sē lava i matou i o matou manatu, sa fa‘apea fo‘i i matou i o latou manatu.”#